އެސްޓީއޯގެ ސުޕާމާޓް ބޮޑު ބަދަލުތަކާއި އެކު އަލުން ހުޅުވައިފި އެވެ.

ރާއްޖެއަށް މުޅިން އާ ކޮންސެޕްޓެއް ކަމަށްވާ ތަފާތު ވިޔަފާރިތަކަށް ފުރުސަތު ލިބޭގޮތަށް އެސްޓީއޯ ޕީޕަލްސް ޗޮއިސް އަލުން ހުޅުވީ ރޭ ބޭއްވި ކުލަ ގަދަ ރަސްމިއްޔާތެއްގައި އެވެ.

ރަސްމީކޮށް އެ ތަން ހުޅުވައިދެއްވީ ނައިބު ރައީސް ފައިސަލް ނަސީމާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު އަދި އެ ފިހާރައިގައި މުދާ ވިއްކާ ކުންފުނިތަކުގެ އިސްބޭފުޅުންނެވެ.

އަލަށް ގެނައި ބަދަލާއި އެކު އެސްޓީއޯއިން ވިއްކާ މުދަލުގެ އިތުރުން އެ ކުންފުންޏާއި އެކު ޕާޓްނާޝިޕް ހަދާފައިވާ އަށް ކުންފުންޏެއްގެ މުދާ އެތަނުން ވިއްކާނެއެވެ. އެ ފިހާރަތަކަށް ހާއްސަކޮށް އެސްޓީއޯ ޕީޕަލްސް ޗޮއިސްގައި ވަނީ ސަރަހައްދުތަކެއް ކަނޑައަޅާފައި އެވެ. މީގެ ތެރޭގައި ހިމެނިގެން ޕީޕަލްސް ޗޮއިސްގައި ޚިދުމަތް ދޭ ވިޔަފާރިތަކަކީ:

  • ސިޓީ ބޭކަރީ
  • ނޯޓް ކޮސްމެޓިކްސް
  • ޕޮއިސް
  • މެކްސްކޮމް
  • މެރަތަން
  • އަސްރަފީ ބުކްޝޮޕް
  • ޕީކަބޫ

މި ވިޔަފާރިތަކުން ފާހަގަކުރަނީ މި ފުރުސަތަކީ އެ ފަރާތްތަކުގެ ވިޔަފާރި އިތުރަށް ފުޅާކުރުމަށް ލިބުނު ފުރުސަތެއް ކަމަށެވެ.

އެސްޓީއޯއިން ބުނީ މިހާރު ފިހާރައިގެ ޖާގަ ތިން ގުނަ ބޮޑުވާނެ ކަމަށެވެ.

މިފަހަރު ސުޕަމާޓް ހުޅުވިއިރު، އެ ފިހާރައިން ކުރިން ވެސް ލިބެން ހުރި އުފެއްދުންތަކުގެ އިތުރުން، އެސްޓީއޯ ހޯމް އިމްޕްރޫވްމަންޓު ފިހާރައާއި، ފާމަސީގެ އުފެއްދުންތައް ވެސް ލިބެން ހުރެއެވެ.

ބޮޑެތި މަރާމާތުތަކަކަށް ފަހު، ޕީޕަލްސް ޗޮއިސް ފިހާރަ އަލުން ހުޅުވިއިރު، އެ ފިހާރައިގެ ރޯދަ ސޭލް ވެސް ވަރަށް އަވަހަށް ފެށުމަށް ވަނީ ހަމަޖެހިފައެވެ.