ކީރިތި ޤުރުއާން ހިތުދަސްކުރުމަކީ މިއުންމަތަށް ޙާއްސަ ކަމެކެވެ. މި އުންމަތުގެ ފޮތް ރައްކާތެރިކުރުމަކީ ފަސޭހަ ކަމެއް ކަމުގައި ﷲ ސުބުހާނަހޫ ވަތަޢާލާ ވަނީ ލައްވާފައެވެ.

وَلَقَدْ يَسَّرْنَا ٱلْقُرْءَانَلِلذِّكْرِ فَهَلْ مِن مُّدَّكِرٍ

 " ހަމަ ކަށަވަރުން ތިމަން ރަސްކަލާންގެ އެ ޤުރުއާން ހަނދުމަކުޅައުމަށް ފަސޭހަ ކޮށްދެއްވީމެވެ. ފަހެ، ހަނދުމަ ކުރާމީހަކު ވޭހެއްޔެވެ؟ "

ކީރިތި ޤުރުއާން ހިތުދަސްކުރުމަށް ވަކި އުމުރެއް ނުވެއެވެ.

ބައެއް މީހުން ގަބޫލު ކުރާގޮތުގައި ޤުރުއާން ހިތުދަސްކުރެވޭނީ ވަކި އުމުރެއްގެ މީހުނަށެވެ. މިގޮތުން ބައެއް މީހުން ބުނާގޮތުގައި ކުޑައިރު ޤުރުއާން ހިތުގަސްކުރުމަކީ ހިލައިގައި އެ ޤުރުއާން ކަނޑައި ބިންވަޅު ނެގުންފަދަ ކަމެކެވެ. މާތް ﷲ ރުއްސުންލެއްވި ގިނަ ޞަހާބީން ކީރިތި ޤުރުއާން ހިތުދަސްކުރެއްވިއިރު އެބޭކަލުންނަކީ އުމުރުން ހަގު ބޭކަލުންނެއް ނޫނެވެ. މިފަދަ ބޭކަލުންގެ ތެރޭގައި ހަތަރު ޙަލީފާއިންނާއި ޢުބައްޔުބުން ކަޢުބްގެ އިތުރުން ޒައިދު ބިން ޘާބިތު ހިމެނެއެވެ.

  • އިޚްލާސްތެރިކަމާއި ނިޔަތް ރަނގަޅުވުން

ކޮންމެ ޢަމަލެއް ފެށުން ވަނީ ނިޔަތާ އެކުއެވެ. މިގޮތުން ޤުރުއާން ހިތުދަސްކުރަން ފަށަންވެސް ވާނީ ހެޔޮ ނިޔަތާއެކުއެވެ.

  • ބަލައިގެން ކިޔަވަން ފަރިތަކުރުން
  • ދަސްކުރުމަށްޓަކައި ރަނގަޅު ވަގުތަކާއި ތަނެއް އިޙްތިޔާރު ކުރުން

މިގޮތުން މީހުން މަދު އަޑުމަޑު ތަނަކާއި ވަގުތެއް އިޙްތިޔާރު ކުރުމަކީ ވިސްނުންތެރި ގޮތެކެވެ. އެގޮތުން  އެދުވަހު ހިތުދަސްކުރަން ބޭނުންވާ މިންވަރު ކަނޑައެޅުމަށްފަހު ވަރަށް ހުޝިޔާރު ކަމާއެކު ހަމަ އެކަނި އެބައި ކިޔަވައި  އެދުވަހު ހިތުދަސްކުރާބައިގައި ހިމެނޭ ކަލިމަތަކުގެ މާނަ އެނގޭނެ ގޮތެއްވާނަމަ، އެކަލިމަތަކުގެ މާނަ ނުވަތަ އާޔަތް ހަނދާންކުރަން ފަސޭހަވާނެ ލަފުޒުތަކުގެ މާނަ ދެނެގަތުން މުހިންމެވެ.

  • ދަސްކުރާ ސޫރަތްތައް މުރާޖާ ކުރުން

ކޮންމެ ހަފްތާއަކު ނުވަތަ ދުވަސްތަކަކަށް ބަހައިލައިގެން ހިތުދަސްކުރާ ސޫރަތްތައް މުރާޖާ ކުރާނެ ކުރާނެ ތާވަލެއް ހަދާ ދަސްކުރާ ސޫރަތްތައް މުރާޖާ ކުރުމަކީ ވަރަށް މުހިންމު ކަމެކެވެ. އަދި މުރާޖާ ކުރާދުވަހަކީ އާ ބައެއް ދަސްކުރާ ދުވަހަކަށް ހަދައިގެން ނުވާނެއެވެ. މުރާޖަޢާ ކުރާ ވަގުތަކީ އެކަމަށް ޙާއްސަ މުނާސަބު ވަގުތަކަށް ވާންވާނެއެވެ. ފަތިސް ނަމާދާއި މަޢްރިބް ނަމާދު ނިމިގެންވެސް މުރާޖާ ކުރެވިދާނެއެވެ.

  • ކުރިމަތިވެދާނެ ހުރަސްތަކާމެދު ސަމާލުވުން

ކީރިތި ޤުރުއާން ހިތުދަސްކުރުމުގެ މާތް މަސައްކަތަކީ އެކަމުގާ ހުރަސްތަކެއް ދިމާވާނެ ކަމެކެވެ. މީގެ ތެރޭގައި،

ނަފްސު އަބަދުމެ އެދޭ އަރާމް ކުރުން ނުވަތަ ފަސޭހައިގައި އުޅުމާ ދުރުވެލަން ޖެހިދާނެއެވެ. އެގޮތުން ކޮންމެދުވަހަކުވެސް ވަކި ވަގުތު ތަކެއްގައި ހޭލުމާއި ދުވާލު ނުވަތަ ރޭގަނޑުގެވެސް ވަކި ވަގުތުތަކެއް ޤުރުއާން ހިތުދަސްކުރުމުގައި ހޭދަކުރަން ޖެހެ އެވެ. މިކަން މިހެން އޮތުމުގެ ސަބަބުން ބޭނުންވާ އެތައް ކަމެއް މަޑުޖައްސާލަން ޖެހުމަކީވެސް އެކަށީގެންވާ ކަމެކެވެ.

މީގެ އިތުރުން އެހެން މީހުންނާއި ޝައިތާނާ ދޭ ވަސްވާސްތަކަށް ބެލުމެއްނެތި ތިމާ ކީރިތި ޤުރުއާން ހިތުދަސްކުރަންފެށި މަޤްސަދު ހަނދާންކޮށް އެކަމުގައި ސާބިތުވެ ހުންނަން ވާނެއެވެ.