ކީރިތި ޤުރްއާނަކީ ޝިފާއެއް ކަމަށް ބުނުމުން އެއީ ކިހިނަކުން ވެދާނެ ކަމެއްތޯ ސުވާލުކުރާ މީހުން ސިއްހީދާއިރާގައި އުޅެއެވެ. މިފަދަ މީހުންނަށް ޤުރުއާނުގެ ހެކި ނުފުދެނީބާއެވެ. ކީރިތި ޤުރްއާނުގެ އެތައް އާޔަތެއްގައި މިކަމަށް މާތް ﷲ ވަނީ އިޝާރާތް ކުރައްވަވާފައެވެ. އެއިގެ ތެރެއިން މި 2 އާޔަތަށް އެކަނި ބެލި ނަމަވެސް ކީރިތި ޤުރްއާނަކީ ޝިފާއެއްކަން އެނގި ޔަޤީންވެގެންދެއެވެ.

﴿57﴾ يَا أَيُّهَا النَّاسُ قَدْ جَاءَتْكُم مَّوْعِظَةٌ مِّن رَّبِّكُمْ وَشِفَاءٌ لِّمَا فِي الصُّدُورِ وَهُدًى وَرَحْمَةٌ لِّلْمُؤْمِنِينَ 

 އޭ މީސްތަކުންނޭވެ! ތިޔަބައިމީހުންގެ ވެރިރަސްކަލާނގެ حضرة ން ތިޔަބައިމީހުންގެ ގާތަށް وعظ އަކާއި، ހިތްތަކުގައިވާ ބަލިތަކަށް شفاء އަކާއި، مؤمن ތަކުންނަށް ތެދުމަގަކާއި، رحمة އެއް އަތުވެއްޖެކަން ކަށަވަރެވެ. (ޔޫނުސް 57 ވަނަ އާޔަތް)

﴿82﴾ وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا 

 ތިމަންރަސްކަލާނގެ قرآن ން مؤمن ންނަށް رحمة އާއި، شفاء ކަމުގައިވާ ތަކެތި ބާވައިލައްވަމެވެ. އަދި އެ قرآن ން، އަނިޔާވެރިވި މީހުންނަށް ގެއްލުމެއް މެނުވީ އިތުރެއް ނުވާހުށްޓެވެ.(އަލް އިސްރާ 82 ވަނަ އާޔަތް)

ޤަބޫލުކުރައްވާށެވެ! ކީރިތި ޤުރްއާނަކީ އެއްވެސް ޝައްކެއް ނެތް ގޮތުގައި ހުރިހާ ބަލިތަކަށްވެސް އޮތް އެންމެ ފުރިހަމަ ޝިފާއެވެ. ހުރިހާ މައްސަލަތަކަކަށް އޮތް އެންމެ ރަނގަޅު ޙައްލެވެ. ނަމަވެސް އެކަމުގެ ނަތީޖާ ފެންނާނީ ނުވަތަ ފައިދާ ޙާޞިލުކުރެވޭނީ ކިޔެވުމުގެ އިތުރަށް ކީރިތި ޤުރްއާނުން ލިބިދޭ ދަރުސްތަކާއި އެފޮތުގެ އަމުރުތަކާއި އެއްގޮތަށް ޢަމަލުވެސް ކޮށްގެންނެވެ.

އިންސާނާ ބަލިވުމުން އަބަދުވެސް ބޭސްފަރުވާ ކުރެވެއެވެ. އާދޭހެވެ! ބޭސްފަރުވާ ކުރަންވެސް ވާނެއެވެ. ބޭސް ކާންވެސް ވާނެއެވެ. ނަވެސް އަހަރެމެންނީ މުސްލިމުންނެވެ. އަހަރެމެން ދަސްކުރަކީ ޤުރުގައިވާ އެއްޗެކެވެ. އަހަރެމެން އެފޮތުގައިވާ ވާހަކަތައް ހިތުން ތެދުކޮށް ޤަބޫލުކުރަމުއެވެ. އެހެންކަމަށް ވާނަމަ އެ ފޮތުގައި ބަޔާންވެގެން އެވާ ފަދައިން ޤުރުއާނުން ޝިފާހޯދަން މަސައްކަތް ކުރަން ވާނެއެވެ. ބޭސް ކަމުން ޤުރުއާން ކިޔަވާށެވެ. ބަލި އެނދުގައި އޮންނަ އިރު ޤުރުއާން ކިޔަވާށެވެ. ތުއްތު ކުއްޖާ ބަލިވުމުން އެ ކުއްޖާގެ ކައިރީގައި ހުރެ ޤުރުއާން ކިޔަވާށެވެ. މުސްކުޅިން ވެސް ހަމަ މިފަދައެވެ. ސަބަބުތަކުގައި ހިފުމާއި އެކު ޝިފާދެއްވާ އިލާހަށް ދުޢާކުރުމާއި ޤުރުއާން ކިޔެވުން ގިނަ ކުރާށެވެ. ދުޢާ އާއި ޤުރުއާނަކީ މުސްލިމުންގެ އެންމެ ވަރުގަދަ ލަފުޒުތަކާއި ކަލިމަތަކެވެ.

އާދޭހެވެ! ކީރިތި ޤުރްއާން ކިޔަވާށެވެ. އުނގެނި ދަސްކުރާށެވެ. މާނަ ވެސް ކިޔައި އެނގޭށެވެ. އެނގި އަމަލުކުރާ މީހަކަށްވާށެވެ. އޭރުން އަހަރެމެންނަށް ލިބެންއޮތީ ހަމައެކަނި ލިބޭނީ ޝިފާ އާއި މައްސަލަތަކަށް ހައްލެއް ނޫނެވެ. އިހުސާސްނުކުރެވޭފަދަ ނިއުމަތްތައް ގިނަވެގެން ހިނގައިދާނެއެވެ.