ދުނިޔޭގެ އެކި ކަންކޮޅުތަކުގައި ކާއެތިކޮޅަކަށް ބޭނުންވެފައި ތިބި އެތައް އިންސާނުންނަކާއި މުސްލިމުންގެ ހާލާމެދު ވިސްނާ، އިސްރާފު މަދުކުރުމަށް މިއަދުގެ ހުކުރު ހުތުބާގައި ވަނީ ގޮވާލާފައެވެ. ނަމަވެސް މި އަޑުތައް އަހާނޭ ބަޔަކު ނެތްކަމީ ހިތާމަ ހުރި ކަމެކެވެ. އެހެންކަމުން އެ ވާހަކަތައް އަލުން ތަކުރާރުކޮށްލުމުގެ ނިޔަތުގައި މި ލިޔުން ލިޔެލާނަމެވެ.

"އިސްރާފުކުރުމުގެ ނުބައިކަން" މި މައުޟޫއަށް މިއަދު ދިން ހުކުރު ހުތުބާގައި އިއްވާފައިވަނީ، މުއްސަނދިކަމާއި ތަނަވަސްކަން އިންސާނުންގެ ތެރެއިން ބަޔަކަށް ލިބިއްޖެ ނަމަ، އެއީ އެމީހުންގެ ހަރަދުތައް އިތުރުވެ، ހޭދަކުރުން ގިނަވެދާނެ ކަމަށާއި އަދި މުދާތައް ބޭކާރު ގޮތުގައި ނަގައިލަން ފަހިވެދާނޭ މަގެކެވެ. ނަމަވެސް އިސްރާފުކުރާ މީހުންދެކެ މާތް ﷲ ލޯބިވެ ވޮޑިގެން ނުވާނޭ ކަމަށް ޤުރުއާނުގައި މާތް ﷲ ވަހީކުރައްވާފައިވާ ކަމަށްވެސް ހުތުބާގައި ވަނީ ބުނެފައެވެ.

އިސްރާފުކުރުމަކީ ވަރަށް ފުޅާ މާނައެއްގައި އައިސްފައިވާ ކަމެއް ކަމަށާއި، ކޮންމެ ކަމެއްގައިވެސް ހައްދު ފަހަނައަޅައި ދިއުންކަން ފާހަގަކޮށް ހުތުބާގައި ބުނެފައިވަނީ، އެއީ ހަމައެކަނި ކެއިން ބުއިމާއި ފައިސާއާއި ގުޅިފައިވާ ކަމެއް ނޫން ކަމަށެވެ. އުރެދުންތަކަށް އަރައިގަތުން ގިނަކޮށް، ކުފުރުވުމާ ހަމައަށް ހިނގައްޖެ ނަމަ އެއީވެސް އިސްރާފުކުރުން ކަމަށް ވަނީ ބުނެފައެވެ. އަދި ފޭރާމާއި ސަވާރީއާއި ހިފާ ގެންގުޅޭ ތަކެތި، ހިސާބަށްވުރެ ގިނަކުރުމަކީވެސް އިސްފާރުކުރުން ކަމުގައި ހުތުބާގައި ވަނީ ބުނެފައެވެ.

މި ބަރަކާތްތެރި ރަމަޟާން މަހަކީ އާންމު ގޮތެއްގައި އިސްރާފުކުރުން ބޮޑު މަހެކެވެ. އެގޮތުން ރޯދަ ވީއްލުމަށްޓަކައި ތަފާތު އެތައް ބާވަތެއްގެ ކާބޯތަކެތި ތައްޔާރުކުރުމަކީ މިއަދު އަހަރެމެންގެ އާދައެކެވެ.

މީގެ އިތުރުން ހުތުބާގައި ބުނެފައިވަނީ، ރޯދައަކީ ހަށިގަނޑު ދުޅަހެޔޮކޮށްދޭ އަޅުކަމެއް ކަމަށާއި ރޯދައިން އެ މަގުސަދު ހާސިލު ކުރެވޭނީ އިސްރާފު ކުރުމާ ދުރުހެލިވެގެން ކަމަށެވެ.

ހުތުބާގައި ފާހަގަ ކުރެވުނު އެންމެ އަސަރުގަދަ އެއް ނުކުތާއަކީ، މުސްލިމުން ކައިބޮއި އުޅެންވާނީ ދިރިހުރުމަށްޓަކައި ކަމަށާއި ކެއުމަށާއި ބުއިމަށްޓަކައި ދިރިއުޅޭ ބަޔަކަށް މުސްލިމުން ވެގެންނުވާނެ ކަމަށް ބުނެ ފާހަގަ ކުރި ނުކުތާއެވެ. މިއީ އަހަރެމެން ކޮންމެ މުސްލިމަކުވެސް ވަރަށް ބޮޑަށް ވިސްނަން ޖެހޭ އަދި އަމަލުކުރަންޖެހޭ ނުކުތާއެކެވެ.