ތައުރީފު ކުރުމާއި ހުޝާމަދު ކުރުމަކީ އިސްލާމް ދީނުގައި ކުރުން ހުއްދަ ކަމަކެވެ. އަދި އަނެކުންނާއި މެދު ހެޔޮ ބަހެއް ނޫނީ ނުބުނުން އެއީ އެންމެ އެދެވޭ ގޮތްވެސް މެއެވެ. އަހަރެމެން މުސްލިމުންނަށް ވީތީ، އަނެކުންނާއި މެދު އަބަދުވެސް ހެޔޮބަސް ބުނަން ވާނެއެވެ. އަނެކާއަށް ފައިދާކުރާނެ ބަސްތައް ބުނަން ވާނެއެވެ. އަނެކާ އުފާވާނޭ ގޮތް ގޮތަށް ތައުރީފުކޮށް ހުޝާމަދުވެސް ކުރަންވާނެއެވެ. ނަމަވެސް އެކަންކަމުގައި އަނެކާ، ބޮޑާވުމެއް ކިބުރުވެރިވުމެއް ނުވާނަމައެވެ.

އަހަރެމެން އިސްލާމުން، ހެޔޮބަސް ބުނުމަށް މާތް ﷲ ވަނީ އަމުރުފުޅު ކުރައްވަވައިފައެވެ. އެހެންކަމުން އަހަރެމެންނީ އަނެކުންނާއި މެދު ހެޔޮބަސް ބުނާ ބަޔަކަށް ވާން ޖެހެއެވެ. އިސްލާމީ އުޚުއްވަތްތެރި މުޖުތަމައެއް ބުނާކުރުމުގަައި އިޖްތިމާއީ ގުޅުންތަކާއި ދޭދޭ ފަރުދުންގެ މެދުގައި އޮންނަ ގުޅުންތައްވެސް ހަރުދަނާ ވާނީ އޭރުންނެވެ.  

ހެޔޮބަސްބުނުމުގެ މުހިންމުކަން އަހަރެމެންނަށް އެނގެން އިތީ، ހެޔޮބަސް ބުނުމަށް އަމުރުފުޅު ކުރައްވަވާފައި އެއިގެ ފަހަތުން ނަމާދުކުރުމާއި ޒަކާތްދިނުމަށް އަމުރު ކުރައްވާފައިވާ އަމުރުފުޅުންނެވެ. ވީމާ ހެޔޮބަސް ބުނުމަށް އެވަނީ ދީނުގެ ފަރުޟުތައް އަދާކުރުމާއި އެކުއެކުގައި ވަޙީކުރައްވަވާފައެވެ. އިސްލާމްދީނުގެ ރުކުންތައް ފުރިހަމަވާނީ، އެ ރުކުންތައް އަދާކުރުމުގައި އިންސާނާގެ ނިޔަތާއި އިހްލާސްތެރިކަމާއި، އަދި އެ ރުކުންތައް އަދާކުރުމުގައި ތިމާގެ އަޚާ އާއި މެދު ފަރުވާތެރިވެ ވިސްނާ ނަމައެވެ. އަނެކާގެ ހައްގުތަކުގެ މަތިންވެސް ހަނދާން ކުރާނަމައެވެ. 

އަހަރެމެންގެ އާދައަކީ އަބަދުވެސް ގޯސް ވާހަކަތައް ދެކެވުމެވެ. އެއީ ފަހަރުގައި އިންސާނުންގެ ފިޠުރަތުގައި ލައްވާފައިވާ ކަމެއްކަމުގައި ވެދާނެއެވެ. އެހެންނަމަވެސް، މީހުންނާއި މެދު ހެޔޮބަސް ބުނުމަކީވެސް އަހަރެމެންގެ ކަށީގައި ހިފުވަން ޖެހޭނޭ އާދައެކެވެ. މީހަކާއި މެދު އޭނާގެ ގޯސްކަންތައް ތަކާއި އޭނާ އެކަންކަމުން އިސްލާހުވާން ޖެހޭނޭ ގޮތާއި އިސްލާހު ވުމަށްޓަކައި ނުވަތަ ރަނގަޅު ކުރުމަށްޓަކައި ކުރަންޖެހޭ ކަންކަން ބުނެދީ ހެދޭ އިރު، އޭނާގެ ކިބައިގައި ހުންނަ ރަނގަޅު ސިފަތަކުގެ ވާހަކަ ބުނެދީ، ތައުރީފު ކުރަން ވާނެއެވެ. މިފަދައިން ބުނެވޭ ހެޔޮ ބަސް ވެގެން ދާނީ، އެމީހަކު އިސްލާހުވުމަށް ނުވަތަ ރަނގަޅުކުރުމަށް ލިބޭ ވަރަށްބޮޑު ހިތްވަރަކަށެވެ. ނަމަވެސް އެއާއި ހިލާފަށް ތައުރީފުގެ ހެޔޮ ބަހެއް ނުބުނާނަމަ، ދިރުމެއް ނުވާނެއެވެ. ހިތްވަރެއް ނުލިބޭނެއެވެ. އެހާލުގައި އިސްލާހުވުމާއި ރަނގަޅު ވުމުގެ މާ ބޮޑު ޝައުގެއް ހިތަކު ނުހުންނާނެއެވެ.

ކަންއޮތީ މިހެން ކަމުން، އަބަދުވެސް އަނެކާ އާއި މެދު ހެޔޮ ބަސްބަސް ބުނަން އާދަ ކުރާށެވެ. އެއީ އަހަރެމެންގެ ޠަބީއަތެއް ކަމުގައި ދެކެންވާނެއެވެ. މުޖުތަމައުތައް އިސްލާހު ވުމުގައި މިއީ، އެޅޭ ވަރަށް ބޮޑު ބާރެކެވެ.