މާތް ﷲ ރިބާ ކާ މީހާ ސިފަކުރައްވާފައިވަނީ ދެފައިގެ ބާރުގޮސްފައިވާ މީހެއްގެ ގޮތުގައި ކަމަށް ހުކުރު ޚުތުބާގައި ބުނެފިއެވެ.

"ރިބަވީ މުއާމަލާތުގެ ނުބައިކަމާއި ފާފަވެރިކަން" މި މައުޟޫއަށް ރާއްޖެގައި އިއްވި ޚުތުބާގައި ބުނީ އަމިއްލަ މަސައްކަތުން މުދާ ހޯދައިގެން، ކައިބޮއެ އުޅުމަށާއި، ދިރިއުޅުން ތަނަވަސްކުރުމަށް އިސްލާމްދީން ވަރަށް ބޮޑަށް ބާރުއަޅާ ކަމަށެވެ. އަދި ފަގީރުންނާއި، މުހުތާދުވެރިން ނިކަމެތިކޮށްގެން ދިރިއުޅޭ މީހަކަށް ނުވުމަށް އިސްލާމް ދީން އިރުޝާދުދޭކަމަށް ޚުތުބާގައި ވަނީ ބުނެފައެވެ.

ދެބާވަތެއްގެ ރިބާ ވާކަމަށް ޚުތުބާވައި ވަނީ ބުނެފައެވެ. އެއް ބާވަތަކީ ރިބައްނަސީއާއެވެ. އަދި އަނެއް ބާވަތަކީ ރިބަލްފަޟްލެވެ.

ރިބައްނަސީއާ އަކީ ގަތް އެއްޗެއްގެ އަގު ވަކި މުއްދަތެއްގެ ތެރޭގައި އަދާކުރުމަށް ޝަރުތުކޮށް، އެއްޗެއް ވިއްކުން ކަމުގައި ޚުތުބާގައި ބުނެފައިވެއެވެ. އަދި އެ މުއްދަތު ހަމަވިއިރު އޭގެ އަގު އަދާނުކުރެވިއްޖެނަމަ މުއްދަތު އިތުރުކޮށްދިނުމުގައި ކުރިން އެއްބަސްވި މިންވަރަށްވުރެ އިތުރަށް ދޭން ޖެހުން ކަމުގައ ޚުތުބާގައި ބުނެއެވެ. ރިބަލްފަޟްލަކީ މުދަލެއް ހަމަ އެ ބާވަތުގެ އެހެން މުދަލަކާ ބަދަލުކުރާއިރު، އިތުރުކޮށްފައި ބަދަލުކުރުން ކަމުގައި ޚުތުބާގައި ވަނީ ބުނެފައެވެ.

މީސްތަކުންނަށް މިއަދު ރިބާ ފެންނަނީ ވަރަށް ރީތި ދަޅައެއްގެ ގޮތުގައި ކަމަށް ޚުތުބާގައި ފާހަގަކުރިއެވެ. ތަރައްގީވެފައިވާ މި ޒަމާނުގައި ރިބާގެ ބާވަތްތައް ވަރަށް ގިނަ ކަމަށާއި، މިއަދު އެއީ ގަވާއިދުތަކާ އުސޫލުތަކުގެ މަތިން ކުރެވޭ މުއާމަލާތެއް ކަމުގައި ޚުތުބާގައި ބުނެފައިވެއެވެ. އަދި ގިނަ ބަޔަކު އޭގެ ދަލުގައި ޖެހިފައިވާކަންވެސް ޚުތުބާގައި ފާހަގަކޮށްފައިވެއެވެ.

އިސްލާމްދީނުގައި ރިބާ ހަރާމްކުރައްވާފައިވަނީ އެއީ މީހުންނަށް ކުރިމަތިވާ ބޮޑު މުސީބާތަކަށް ވާތީ ކަމަށް ޚުތުބާގައި ވަނީ ބުނެފާ ވާއިރު، ރިބާއަކީ ތަކެތީގެ އަގުބޮޑުވުމުގެ ސަބަބުތަކުގެ ތެރެއިން ސަބަބެއް ކަމަށާއި، އެއީ އިންސާނިއްޔަތަށް ކުރިމަތިވެފައިވާ ބޮޑު ތުރާލެއް ކަމަށްވެސް ޚުތުބާގައި ބުނެފައިވެއެވެ.

ޚުތުބާގައި ރިބާ އާއި ބެހޭގޮތުން ސީދާ މައުލޫޢެއް ކަނޑައަޅާ ޚުތުބާ އިއްވުމަކީ އެކަމާ އަހަރެމެން ފުންކޮށް ވިސްނަން ޖެހޭނޭ ކަމެކެވެ. ވިޔަފާރިވެރިންނާއި އާންމު ފަރުދުންނެވެ. ޚަރާމް އެއް ކަައިގެން ބޮއެގެން އުޅޭކަށް އެކަކުވެސް ނޭދޭނެއެވެ. އެހެންކަމުން ރިބަވީ މުޢާމަލާތަކާ ގާތްވެސް ނުވާށެވެ. ރިބާ ދޭ މީހާ އާއި ހިފާ މީހާ އާއި ހެކިވެރި އާއި އަދި ލިޔެކިޔުން ތައްޔާރު ކުރާ މީހާއަށްވެސް މާތް ﷲ ލަޢުނަތް ލައްވާކަމަށްވެސް ޚުތުބާގައި ވަނީ ބުނެފައެވެ. އެހެންކަމުން ރިބަވީ މުޢާމަލާތެއް ކަމަށް ކިތިޔާވެސް ޝައްކުވާނަމަ، ޢިލްމުވެރިން ކުރެ އަހާ އޮޅުން ފިލުވަން ވާނެއެވެ. ބުއްދިވެރިއަކީ އެއީއެވެ.