އިސްލާމްދީން ޒުވާނުންނަށް ހާއްސަ ޝަރަފެއް ދެއްވާފައިވަނީ ޙަޟާރަތްތަކުގެ ތަރައްޤީއާއި، ޤައުމުތަކުގެ މުސްތަޤްބަލް އެމީހުންގެ އަތުގައި އޮތުމުންނެވެ. ޒުވާނުންނީ އެ ޤައުމުތަކުގެ ބިން ރައްކާތެރިކޮށް، އޭގެ ޝަރަފު ބިނާކުރަނީ އެމީހުންގެ ހުޅުވިފައިވާ ސިކުނޑިއާއި، ތަނަވަސް ވިސްނުމާއި، ސާފު ހިތްތަކާއި، ވަރުގަދަ އަތްތިލަތަކާއި އެ މުލައްދަނޑިތަކުގެ އިޚްތިޔާރާއި، އޭގައި ނުތާހިރުކަމެއް ނެތް ހަގީގީ އީމާންތެރިކަމުގެ ސަބަބުންނެވެ.

ކީރިތި ޤުރުއާނުގައި މާތް ﷲ ޒުވާނުންނަށް އިޝާރާތް ކުރައްވާ ވަޙީ ކުރައްވާފައި ވަނީ މިފަދައިންނެވެ ﴿13﴾ نَّحْنُ نَقُصُّ عَلَيْكَ نَبَأَهُم بِالْحَقِّ ۚ إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى. މާނައީ: ތިމަންރަސްކަލާނގެ، ކަލޭގެފާނަށް އެއުރެންގެ خبر ތެދަށް ކިޔައިދެއްވަމެވެ. ހަމަކަށަވަރުން، އެއުރެންނީ އެއުރެންގެ ވެރިރަސްކަލާނގެއަށް إيمان ވެ، އެއުރެންނަށް، ތިމަންރަސްކަލާނގެ ތެދުމަގު އިތުރުކުރައްވާފައިވާ ޒުވާން ފިރިހެނުން ތަކެކެވެ. (އަލް ކަހްފް 13 ވަނަ އާޔަތް)

އިސްލާމްދީނުގައި ޒުވާނުންނަށް ވަރަށް ބޮޑު ސަމާލުކަމެއް ދީ، އެއުރެންނަށް ރަނގަޅު ތައުލީމެއް ފޯރުކޮށްދީ، އަދި މުސްލިމުންނަށް، އެއުރެންގެ ކިބައިން ރަނގަޅު ތައުލީމެއް ފޯރުކޮށްދިނުމަށް ބާރު އަޅުއްވައެވެ. ރަނގަޅު ތަޢުލީމެއް ލިބިއްޖެނަމަ، އެބައިމީހުން މާތް ﷲ އަށް އީމާންވެ، އެކަލާނގެއަށް ކިޔަމަންތެރިކަމާއެކު ހިދާޔަތް ލިބިގެންދާނެއެވެ. އަދި އެ ހިދާޔަތު އެެއުރެންނަށް އިތުރުކުރައްވަވާފާނެއެވެ.

ޒުވާން ދުވަސްވަރުން ފެށިގެން ޙައްޤު މަގަށް ތަބާވެ الله އަށް ކިޔަމަންވާ މީހަކީ ހަމަކަށަވަރުން މި ޙަޔާތާއި އާޚިރަތުގައި ކާމިޔާބު ހޯދާ މީހެކެވެ. ﷲ އަށް ކިޔަމަންވެ، އެކަލާނގެ އަމުރުފުޅުތަކަށް ތަބާވެ ބޮޑުވި ޒުވާނުންނަކީ ޤިޔާމަތް ދުވަހު އަމާންކަމުގެ ހިޔަނި ދެއްވާނެ ހަތް ގިންތިއެއްގެ ތެރޭގައި ހިމެނޭނެ ޒުވާނުންތަކެއް ކަމުގައި އިސްލާމްދީނުގެ އެކި އެކި ދަރުސްތަކާއި ފިލާވަޅުތަކުން އެނގެން އެބަ އޮތެވެ.

އަހަރެމެންގެ މާތް ރަސޫލާ މުޙައްމަދު ޞައްލަ ﷲ ޢަލައިހި ވަސައްލަމް، އަބަދުވެސް ޒުވާނުންނަށް ސަމާލުކަން ދެއްވައި ޒުވާނުންނަށް ޝައުޤުވެރިކަން ދެއްވައި ޒުވާނުންގެ ބޭނުންތެރިކަމާއި މުހިންމުކަން ފާހަގަކުރެއްވިއެވެ. ފަސް ކަމެއްގެ ކުރިން ފަސްކަމެއްގެ ފައިދާ ހެޔޮގޮތުގައި ހިފުމަށް ދީނުގައި އައިސްފައިވާ އިރުޝާދުގައި އެ ވާ ފަސްކަމުގެ ތެރެއިން މުސްކުޅިވުމުގެ ކުރިން ޒުވާންކަމުގެ ފައިދާ ހެޔޮގޮތުގައި ހިފުމަށް އައސްފައި ވެއެވެ. މިކަމުންވެސް ޒުވާން އުމުރުގެ މުހިންމުކަމާއި ބޭނުންތެރިކަން ހާމަވެދެއެވެ.

ޒުވާނުންނަކީ އެމީހުންގެ ގާބިލްކަމާއި ހަކަތައިގެ ގޮތުން މޮޅު ބައެކެވެ. އެހެންކަމުން ބުރަ މަސައްކަތްތަކުގައްޔާއި ހިކުމަތްތެރި މަސައްކަޔްތަކުގައި ޒުވާނުން އަވަދިނެތި ތިބެން ޖެހެ އެވެ. ހުސް ވަގުތު ބޭކާރު ކުރުމާއި ކަމެއް ނެތި ވަގުތު ނަގާލުމަކީ ޒުވާންކަމުގެ ނިއުމަތަށް ފުރަގަސް ދެވުމެވެ. ޒުވާނުން މިއަދު އަބަދުވެސް ފެންނަނީ ފަސް ޖެހޭ ތަނެވެ. ކަންކަނުގައި ބިތް ޖެހޭ ތަނެވެ. މިއީ ހިތާމަ ހުރި ކަމެކެވެ. ހަގީގަތުގައި ޒުވާނުންގެ ޖޯޝާއި އަދި އުމުރުން ދުވަސްވީ މީހުންގެ ތަޖުރިބާ ގުޅުވައިލުމަކީ ކަންކަމުގެ ނަތީޖާ އިންތިހާއަށް ފޮނިވެގެންދާނޭ ކަމެކެވެ. އިސްލާމް ދީން ވެސް ބާރު އަޅަނީ ޒުވާންކަމުގެ ފައިދާ ހެޔޮގޮތުގައި ލިބިގަތުމަށެވެ. ވިސްނާށެވެ! މުސްކުޅިވެ ގައިބާރު ދެރަވުމުން ކުރާނޭ ކަމެއް ނޯންނާނެއެވެ. ހައްޖަށް ދިއުމަކީވެސް މުސްކުޅިން ކުރަން ޖެހޭ ކަމެކޭ ހީވާ ކަހަލައެވެ. އެހެން ނުހަދާށެވެ! ޒުވާނުންނަށް މިއަދު "ބޯކޮށް" ފައިސާ ލިބެއެވެ. ގައިމު ޒުވާން އުމުރުގައި ހައްޖެއް އަދާކޮށްލެވުމަކީ ކޮންފަދަ ނިއުމަތެއް ތޯއެވެ! އާދޭހެވެ! ޒުވާން ދުވަސްވަރު، ޒުވާންކަމުގެ ވަގުތު ނަގާ ނުލާށެވެ!