އިންސާނާ ދުނިޔެއަށް އައުމާއި އެކު، އެންމެ ފުރަތަމަ ލިބޭ ކާނާ އަކަށް ވަނީ މައިމީހާގެ ގާތުން ދޭ ކިރެވެ. މިއީ އެ ދަރިފުޅަށް އެންމެ ރަނގަޅު ކާނާއެވެ. ދަރިފުޅުގެ އުމުރާއި އެއްވަރަށް މައިމީހާގެ ކިރުގެ ތާސީރުވެސް ބަދަލުވަމުން ދެއެވެ. އަދި މިއީ މައިމީހާ އާއި ދަރިފުޅުގެ ގުޅުން އިންތިހާއަށް ގަދަކޮށްދޭނޭ ކަމެކެވެ.

އިސްލާމް ދީނުގައި ވަނީ ގާތުން ދިނުމަށް ވަރަށްބޮޑަށް ބާރު އަޅުއްވާފައެވެ. އެކަމަށް ދަލީލުކޮށްދެނީ ކީރިތި ޤުރުއާނުގެ ދެވަނަ ސޫރަތުގައި މާތް ﷲ ވަޙީ ކުރައްވާފައިވާ ބަސްފުޅެވެ. އެ އާޔަތުގައި ގާތުން ކިރުދިނުމާއި ޝަރުއީ ކަންކަން ވަރަށް ސާފުކޮށް ބަޔާންކުރައްވާފައި ވެއެވެ.

﴿233﴾ ۞ وَالْوَالِدَاتُ يُرْضِعْنَ أَوْلَادَهُنَّ حَوْلَيْنِ كَامِلَيْنِ ۖ لِمَنْ أَرَادَ أَن يُتِمَّ الرَّضَاعَةَ ۚ وَعَلَى الْمَوْلُودِ لَهُ رِزْقُهُنَّ وَكِسْوَتُهُنَّ بِالْمَعْرُوفِ ۚ لَا تُكَلَّفُ نَفْسٌ إِلَّا وُسْعَهَا ۚ لَا تُضَارَّ وَالِدَةٌ بِوَلَدِهَا وَلَا مَوْلُودٌ لَّهُ بِوَلَدِهِ ۚ وَعَلَى الْوَارِثِ مِثْلُ ذَٰلِكَ ۗ فَإِنْ أَرَادَا فِصَالًا عَن تَرَاضٍ مِّنْهُمَا وَتَشَاوُرٍ فَلَا جُنَاحَ عَلَيْهِمَا ۗ وَإِنْ أَرَدتُّمْ أَن تَسْتَرْضِعُوا أَوْلَادَكُمْ فَلَا جُنَاحَ عَلَيْكُمْ إِذَا سَلَّمْتُم مَّا آتَيْتُم بِالْمَعْرُوفِ ۗ وَاتَّقُوا اللَّهَ وَاعْلَمُوا أَنَّ اللَّهَ بِمَا تَعْمَلُونَ بَصِيرٌ މާނައީ: މައިން، އެކަނބަލުންގެ ދަރިންނަށް ކިރުދޭހުށީ، ފުރިހަމަ ދެއަހަރުގެ مدة އަށެވެ. އެއީ، ކިރުދިނުން ފުރިހަމަކުރުމަށް قصد ކޮށްފި މީހަކަށެވެ. އަދި އެކަށީގެންވާ ހެޔޮގޮތުގައި އެކަނބަލުންނަށް ކާންދިނުމާއި، އަންނައުނުދިނުން އެއީ، (ކުއްޖާގެ) ބަފާގެ މައްޗަށް ވާޖިބުވެގެންވާ ކަމެކެވެ. އެއްވެސް نفس އަކަށް، އެ نفس އަކަށް ކުޅަދާނަވެގެންވާ މިންވަރަކަށް މެނުވީ، تكليف އެއް ނުޖައްސަވަތެވެ. މައިމީހާއަށް، އެކަނބުލޭގެ ދަރީގެ ސަބަބުން ގެއްލުމެއް ދީގެން ނުވާނެތެވެ. އަދި، ބަފަޔަކަށްވެސް، އޭނާގެ ދަރީގެ ސަބަބުން ގެއްލުމެއް ދީގެން ނުވާނެތެވެ. އަދި، (ކުއްޖާގެ ބަފާގެ މައްޗަށް لازم ވީ ކަންތައް) ވާރުތަވެރިޔާގެ މައްޗަށްވެސް އެފަދައިން لازم ވެގެންވެތެވެ. ފަހެ، އެ ދެމީހުންގެ ރުހުމާއި، مشورة އާއެކު (ދެއަހަރު ހަމަވުމުގެ ކުރީގައި) ކިރުދިނުން ހުއްޓާލަން قصد ކޮށްފިނަމަ، (އެކަމުގައި) އެ ދެމީހުންގެ މައްޗަަކަށް ކުށެއްނެތެވެ. އަދި، ތިޔަބައިމީހުންގެ ދަރިންނަށް އެހެން މީހަކު ލައްވާ ކިރުދިނުމަށް قصد ކޮށްފިނަމަ، ހެޔޮގޮތުގައި އެކަނބަލުންނަށް ދޭންޖެހޭ އުޖޫރައެއް ތިޔަބައިމީހުން އެކަނބަލުންނަށް ދެނީނަމަ، (އެކަމުގައި) ތިޔަބައިމީހުންގެ މައްޗަކަށް ކުށެއްނެތެވެ. އަދި، ތިޔަބައިމީހުން اللَّه އަށް تقوى ވެރިވާށެވެ! އަދި، ހަމަކަށަވަރުން، اللَّه އީ، ތިޔަބައިމީހުން ކުރާ ކަންތައް މޮޅަށް ބައްލަވާވޮޑިގެންވާ ރަސްކަލާނގެކަން ތިޔަބައިމީހުން ދަންނާށެވެ! (އަލް ބަޤަރާ 233 ވަނަ އާޔަތް)

މި އާޔަތުގެ މާނައިގެ އޮޅުމެއް ނެތި އެތައް ކަމެއް ސާފުވާން އެބަ ބުއްޓެވެ. އަހަރެމެންނީ ކިޔާ ދަސްކުރާ ބަޔަކަށް ވަމާ ހިނގާށެވެ. އެނގި ފަރިތަ ބަޔަކަށް ވާން ހިނގާށެވެ. ޑަކްޓަރާއި ސައިންސުވެރިން މައިމީހާގެ ކިރުގެ ވާހަކަ ދެއްކުމުގެ މާ ކުރިން ކީރިތި ޤުރުއާނުގައި އެވާހަކަ މިއޮތީ ވަރަށް ތަފްސީލުކޮށް އައިސްފައެވެ. ޤުރުއާނުގައި އެ ބުއިމެއްގެ ވާހަކަ، ތަޢުރީފު ކުރުމަކާއި އެކު ހިމެނިގެންވާނީ ހަމަ ގައިމުވެސް އެ ބުއިމެއްގެ މޮޅުކަމުންނެވެ. އިންސާނާ ހެއްދެވީ މާތް ﷲ އެވެ. އެ އިންސާނާއަށް ބޭނުންވާ ކަންތައްތައް ވެސް މޮޅަށް ދެނެވޮޑިގެންވާނޭ ފަރާތަކީވެސް ހަމަ އެ އިލާހެެވެ! މާތް ﷲ އީ މޮޅަށް ދެނެވޮޑިގެންވާ ކުޅަދުންވަންތަ އިލާހެވެ!