މިދިޔަ ހުކުރުދުވަހު، އިއްވި ހުކުރު ހުތުބާ އަމާޒު ކުރެވިފައިވަނީ ހެޔޮބަސް ބުނުމުގެ މާތްކަމާއި އެކަމުގެ މަތީގައި ދެމިހުރުމުގެ މުހިންމުކަމުގެ މަށްޗަށެވެ. އެގޮތުން އެ ހުތުބާގައި ބުނެފައިވަނީ ހެޔޮ ބަހަކީ ހެޔޮ ގަހެއްފަދަ އެއްޗެއް ކަމަށެވެ. ދެން އެ ގަހުގެ ސިފަ ބަޔާންކޮަސް ހުތުބާގައި ބުނެފައިވަނީ އެއީ ހިޔާ ބޮޑު ގަހެއް ކަމާއި އެއީ ތަސްވީރު ރީތި ގަހެއް ކަމަށެވެ. އަދި އެއީ ވަސްމީރު، މޭވާ ފޮނި ގަހެއް ކަމަށެވެ. އެގަހުގެ މޫތައް ވަރުގަދަ ވެފާ މަތިވަރު ރަނގަޅު ކަމަށެވެ. އަދި އެ ގަހުގައި އަބަދު މޭވާ އަޅާ ފުރިފައިވާ ކަމަށާއި އެ ގަހުން މޭވާ ދުވަހަކުވެސް ހުސްނުވާކަމަށެވެ. އަދި އެ ގަހުގެ ފައިދާ ގިނަގުނަ ކަމަށްވެސް ހުތުބާގައި ވަނީ ބުނެފައެވެ. 

މި ގަހުގެ ސިފަތައް ބަޔާންކުރުމަށްފަހު ދެން ބަޔާންކޮށްފައިވަނީ އެފަދަ ގަހެއް ހެދޭނޭ ނުވަތަ ހެއްދޭނޭ ބިމެއްގެ ވާހަކައެވެ. އެފަދަ ބިމެއް ވާން ޖެހޭނީ ރަނގަޅު ބިމަކަށެވެ. އެ ބިމުގެ ސިފަތަކުގެ ގޮތުގައި ހުތުބާގައި ފާހަގަ ކޮށްފައިވަނީ އެއީ ﷲ އަށް އަޅުކަން ކުރާ ޞާލިހް މުއުމިނާގެ ހިތް ކަމުގައެވެ. އަދި އެއީ ﷲ ގެ އަޅުތަކުންނާއި ރިވެތި ގޮތުގައި މުޢާމަލާތްކުރާ މީހާއެވެ. ދެން އެފަދަ ބިމެއް ބިނާކުރުމަށް ނުވަތަ އެފަދަ ނަފްސެއް ބިނާކުރުމަށް ކުރެވުދާނޭ ކަންތައްތަކުގެ ތެރޭގައި ހުތުބާގައި ފާހަގަކުރި ކަންތައްތަކަކީ ޢާއިލީ ރަނގަޅު ތަރުބިއްޔަތާއި ރިވެތި ނަމޫނާ އާއި މަދްރަސީ ރަނގަޅު ތަރުބިއްޔަތާއި ޞާލިހު ރަނގަޅު ވެއްޓެއް އެ އިންސާނަކަށް ލިބިގެންނެވެ. މިއީ ހުތުބާގައި ފާހަގަ ކޮށްފައި ހުރި ބައެއް ކަންކަމެވެ.

މުޅި ހުތުބާ ވަރަށްވެސް ފުރިހަމައެވެ. ނަމަވެސް މި ގަހުގެ ވާހަކަ އާއި މި ގަސް ހެއްދުމަށް ބޭނުންވާނޭ ރަނގަޅު ބިމުގެ ވާހަކަ އަކީ މުޅި ހުތުބާއިންވެސް އަޅައިގަތް ތަންކޮޅެކެވެ. މިއީ އަހަރެމެން އިންސާނުން ވަރަށް ބޮޑަށް ވިސްނާލުން ރަނގަޅު ތަންކޮޅެކެވެ. ފުރަތަމަ އެ ގަހުގެ ސިފައެވެ. އެ ސިފަ ބަޔާންކުރުމުގައި ދެން އިތުރު އެހެން ވުސްނުމެއް ވިސްނާނޭ ޖާގައެއް ނެތެވެ. އެއަށްވުރެ އެ ގަހުގެ ސިފަތައް ފުރިހަމައެވެ. އެފަދަ ހެޔޮ ގަހެއް ލިބުމަށް ނޭދޭނޭ ހަމަ އެކަކުވެސް ނުހުންނާނެއެވެ. ނަވެސް އެފަދަ ގަހެއް ލިބެން އެދުނަސް އެފަދަ ގަހެސް ހެއްދުމަށް ވަކި ހާއްސަ ބިމެއް އެބަ ބޭނުންވެއެވެ.

އެފަދަ ބިމެއް ހެދުމަށްޓަކައި ބޭނުންވާނޭ އަސާސީ ކަންތައްތައްވެސް ވަރަށް ސާފުކޮށް އެއޮތީ ހުތުބާގައި ފާހަގަ ކޮށްފައެވެ. އޭގައިވެސް ސުވާލެއް ޝައްކެތް އުފެދޭނޭ ޖާގައެއް ނެތެވެ. ނަމަވެސް ހިތާމަ އަކީ އެ ވާހަކަތައް އަޑުއަހާނޭ ކަންފަތްތަކެއް ނެތް ކަމެވެ. ތިބެނީ ހައްތަހާވެސް އަޑު އިވޭ ކަންފަތްތަކެވެ. އެ އިވޭ އަޑެއް އަހާނޭ ހިތްވަރެއް އަހަރެމެންގެ ކިބަޔަކު ނުހުރެއެވެ. ހުތުބާގައި ފާހަގަ ކުރި މިފަދަ ފުރިހަމަ ގަހެއް ލިބުމަށް އެދޭމީހާ ކުރަންވީ ކަމަކީ ހެޔޮބަސް ބުނުމެވެ. އެކަމުގެ މަތީގައި ދެމިހުރުމެވެ. ހުތުބާގައި ބުނެފައިވާ ފަދައިން ހެޔޮ ބަހެއް ބުނުމަކީ ހޭދައެއް ކުރަން ޖެހޭ ކަމެއް ނޫނެވެ. އަހަރެމެންނަށް މިއަދު ވެފައި މިތިބަ ގޮތަކީ ހޭދައެއް ކުރަން ޖެހޭ، ނަމަވެސް އޭގެ މާލީ ނަތީޖާ މި ދުނިޔޭގައި ނުފެންނަ ނަމަ ހޭދަކުރަން ޖެހިލުންވުމެވެ. އެހެންކަމުން ހެޔޮބަހެއް ބުނުމަށް ހޭދައެއް ކުރަން ނުޖެހުމަކީ އެފަދަ މީހުންނަށްވެސް ހެޔޮ ގަހެއް އިންދާލުމަށް ލިބޭ ފުރުސަތެކެވެ.

ހެޔޮ ބަހަކީ ތިމާ ބުނާ ޖުމުލައިގައި އެތުރިފާ ލަފުޒުތައް އެކަންޏެއް ނޫނެވެ. އެ ބަހެއް ބުނެވޭ ތަނާއި ހާލަތާއި ނިސްބަތްކުރެވޭ ފަރާތާއި އެ ބަހެއް ބުނާ ރާގަކީވެސް ހަގީގަތުގައި އެ ބަސް ހެޔޮބަހަކަށް ވުނަށް މުހިންމު ޝަރުތު ތަކެކެވެ. އަހަރެމެން އެންމެންނީ ހެޔޮބަސް ބުނެ ހެޔޮބަސް އަހާ ބަޔަކު ކަމުގައި ލައްވާށިއެވެ!