"ހިޖުރައިގެ ދަރުސްތަކުގެ ތެރެއިން" މި މައުޟޫގެ މައްޗަށް އިއްވި ހުކުރު ޚުތުބާގައި އެތައް ދަރުސްތަކެއް ވަނީ ބަޔާންކޮށްފައެވެ. އެގޮތުން ޚުތުބާގައި ބުނެފައިވަނީ ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައާމެދު ފުންކޮށް ވިސްނާލަން ޖެހޭ ކަމަށެވެ.

ހިޖުރައަކީ ތިމާގެ އަމިއްލަ ވަޒަން ދޫކޮށް އެހެން ރަށަކަށް ދިއުމަށްވުރެ މާ ފުޅާ މާނައެއް އޮތް ކަމެއްކަން ފާހަގަކޮށް ޚުތުބާގައި ބުނީ، ހިޖުރައިގެ އެންމެ މަތިވެރި މާނައަކީ ނުބައި ކަންތައް ދޫކޮށް ހެޔޮކަމުގެ މަގަށް ރުޖޫއަވުން ކަމަށެވެ. އަދި ހިޖުރައިން ލިބޭ އެންމެ މަތިވެރި އެއް ފިލާވަޅަކީ އިސްލާމް ދީނަށްޓަކައި ތިމާގެ ހުރިހާ ކަމެއް ޤުރުބާން ކުރުމުގެ މަތިވެރި ފިލާވަޅު ކަމަށެވެ.

ހިޖުރައިން ލިބޭ އަނެއް ފިލާވަޅަކީ ކަމެއް ކާމިޔާބު ވުމުގެ އެންމެ މުހިއްމު އެއް ބަޔަކީ އެކަމެއް ފެށުމުގެ ކުރިން ފުރިހަމައަށް ރޭވުމާއި، ކަންކަން ކުރާނެ ފަރާތެއް ކަނޑައަޅައި ފުރިހަމައަށް ހަމަޖައްސާފައި ހުރުންކަންވެސް ޚުތުބާގައި ފާހަގަ ކޮށްފައިވެއެވެ. 

އޭގެ އިތުރުން، ދަތި އުނދަގޫ ވަގުތުގައިވެސް އިމާން ކަމުގެ އަހުލުވެރިން ސާބިތުކަމާއެކު ތިބޭނެކަމުގެ ފިލާވަޅަކީވެސް ހިޖުރައިން ލިއްބައިދޭ މުހިއްމު ފިލާވަޅެއްކަން ބަޔާންކޮށްފައިވެއެވެ.

މިއިން ކޮންމެ ފިލާވަޅަކީވެސް އިންސާނާގެ ދިރިއުޅުމުގެ ހަޔާތުގައި ވަރަށްވެސް އިބުރަތްތެރި ދަރުސްތަކާއި ފިލާވަޅުތައް ލިއްބައިދޭ މުހިންމު ފިލާވަޅުތަކެކެވެ. އިންސާނާގެ މައްޗަށް އޮތީ އެކަންކަން ދެނެގެން އެމަގުން އަމަލު ކުރުމެވެ.