އޭ ދިވެހި ޒުވާނުންނޭވެ! ހޭލާ ނިކަން ވިސްނާނުހޭ! މާދަމާ ޙަވާލުވާން ތިބި ބަޔަކީ ތިއީ އެވެ. ބަނިޔާދަނުވުން އެއީ ޒީނަތެއް ކަމުގައި ދެކޭށެވެ. ބޭއަދަބީކަމާއި ނޭއްގާނީ ކަމާއި ހަސީލަތް ނުބައިކަމުން މޫނުކަޅުވާ ބަޔަކު ކަމުގައި ނުވާށެވެ. ދިވެހިން، ދިވެހިންގެ ގޮތުގައި މިއަދާ ހަމައަށް އައިސްފައިވާ އެންމެ މަތިވެރި މާތް ސިފައިން ސިފަ ލިބިގަންނާށެވެ. އެއީ ތަޤުވާވެރި މުސްލިމުންގެ ސިފައެވެ. މާތްކަލާނގެއަށް އީމާންވުމެވެ. އެކަލާނގެ ނަބިއްޔާ ﷺ އަށް ފުރިހަމައަށް ކިޔަމަންތެރިވުމެވެ. އިސްލާމްދީނަށް ނަސްރުދިނުމެވެ.

އިސްލާމްދީނަށް ނަސްރުދެވޭނީ ނަފުސު ޠާހިރުކޮށްގެންނެވެ. ހަޑިމުޑުދާރު ނުބައި ފާޙިޝް ޢަމަލުތަކާ ދުރުގައި ތިބެގެންނެވެ. އަންނާން އޮތް ޖީލުތަކަށް ދުރުގައި އަޚްލާޤީ ރިވެތި ނަމޫނާއަކަށް ވެގެންނެވެ. އެ ޖީލަކީ ތިޔަ ޒުވާނުންގެ ދަރީންނެވެ. އެ ދަރީންގެ ކުރިމަތީ ތިމާއަށް ހުއްޓި ހުންނަން ނުކެރޭވަރުގެ ޝައިޠާނީ ޝިކާރަތަކުގައި ޖެހި އޭގެ ފުންމިނަށް ޣަރަޤުވަމުން ދާ ނަމަ، މާދަމާ އެ ދަރީން އެފަދަ ވަޅުގަނޑުގަނޑުން ސަލާމަތް ކުރާނެ އެއްވެސް ގޮތެއް އޮންނާނެ ހެއްޔެވެ؟

އޭ ޒުވާނުންނޭވެ! އުފަލާއި މަޖަލުގެ ދަޅައިގައި ޖެހި ޢިއްޒަތާއި ޤަދަރު ނަގައި ނުލާށެވެ. ޢިއްފަތާއި އަބުރު ވެއްޔާ ނުމޮޑޭށެވެ! މާދަމާއެއް އެބައޮތެވެ.

ލޮބުވެތި އަޚުންނޭވެ! ކީރިތި ޤުރުއާނުގައި އަޚުން ސިފަކުރައްވަނީ އެއްބަނޑުއެއްބަފައި ބައެއްގެ ގޮތުގައެވެ. ޒިންމާދާރު ފިރިހެނުންގެ ގޮތުގައެވެ. ﷲގެ ގެކޮޅުތަކުގައި އެ އިލާހުގެ ދީނަށް ގޮވައިލާ ބައެއްގެ ގޮތުގައެވެ. ދީން މަތިކުރާ ބައެއްގެ ގޮތުގައެވެ. އެއްވެސް ވިޔަފާރިއެއް ނުވަތަ ގަނެވިއްކުމެއް އެބައިމީހުން ނަމާދާ ދުރު ނުކުރެއެވެ. ޒަކާތްދިނުމުން އެއްކިބާ ނުކުރެއެވެ.

އޭ އަޚުންނޭވެ! މި ސިފަތަކުން ސިފަ ލިބިގަންނާށެވެ. އަމާނަތުގެ ގޮތުން ތިޔަބައިމީހުންނާ ޙަވާލުވާ އަންހެނުންނާ މެދު ރައްކާތެރިވާށެވެ! މިއިން ކޮންމެ ކަމަކީ ސުވާލުވެވޭނޭ ކަންކަމެވެ.

ލޮބުވެތި އުޚްތުންނޭވެ! ތިޔަ ކަނބަލުންގެ ބެލެނިވެރިން ކަމުގައިވާ:- ބައްޕަ، ކާފަ، މުނިކާފަ، އެއްބަނޑުއެއްބަފާ އަޚުން، އެއްބަފާ އަޚުން، އެއްބަނޑު އަޚުން، ދެ ފަރާތު ބޮޑުބޭބެއިން، ފިރިހެން ދަރީން، އަދި ފިރީން، ތިޔަ ކަނބަލުންގެ ކަންކަމާ ބަސްބުނެ އުޅުން އެއީ އުފާކުރުން ޙައްޤު ކަމެކެވެ. އެ މީހުން އެ ބެހެނީ ކަނބުލޮގެ ޒާތީ ކަމަކާ ނޫނެވެ. އެ މީހުން އެ އެދެނީ ކަނބުލޮއަށް އިއްފަތްތެރިކަމާއި ރައްކާތެރިކަމެވެ. އަނިޔާގެ ޝިކާރައިން ސަލާމަތްކުރުމަށެވެ. ޝައިޠާނާގެ މަކަރުވެރި ރޭވުންތަކުގެ ޝިކާރަޔަކަށް ތިޔަ ކަނބަލުން ނުވުމަށެވެ.

އަންހެނުންގެ ޙައްޤު ހޯދައިދިނުމުގެ ނަމުގައި ތިޔަ ކަނބަލުން އޮރިޔާންކޮށް މަގުމަތިކުރާ ފަރާތްތަކުގެ ގޮވެލިތަކަށް ނުހެއްލޭށެވެ!

 

(މާދަމާ މި ޤައުމާ ހަވާލުވާން ތިބި ބަޔަކީ ތިއީއެވެ. - އައްޝެއިޚް މުޙައްމަދު އަފްޟަލް؛ ދީނުގެ މަގު އަދަދު 33, ޞ.1 - 12 އޯގަސްޓް 2022)