އެންމެ ހެޔޮ ޢަމަލުގެ ގޮތުގައި ރަސޫލް ޞައްލަ ﷲ ޢަލައިވަސައްލަމަ ވަނީ ބައެއް ކަންކަން އުންމަތަށް ބަޔާން ކުރައްވަވައިފައެވެ. އެކަމަށް އިޝާރާތް ކުރައްވާ މަޝްހޫރު ދީނީ ޢިލްމުވެރިޔާ މުފްތީ މެންކު ވިދާޅުވަނީ އެއިގެ ތެރެއިން ކޮންމެ ކަމަކީވެސް އެކަމެއް ކުރުމުން އެމީހަކަށް ވަރަށް ގިނަ ޘަވާބް ދެއްވަވާނެ ކަމެއް ކަމަށެވެ. ﷲ ތަޢާލާގެ ޙަޟްރަތުގައި އެމީހެއްގެ ޤަދަރު އުފުލިގެންދާނެ ކަމަށްވެސް މުފްތީ ވިދާޅުވިއެވެ. 

އެންމެ ހެޔޮ ޢަމަލުގެ ގޮތުގައި ރަސޫލް ޞައްލަ ﷲ ޢަލައިހި ވަސައްލަމަ ޙަދީޘްފުޅުކުރައްވަވާފައިވާ 2 ކަމެއް މުފްތީ ވަނީ އޭނާގެ ދަރުހުގައި ފާހަގަކޮށްފައެވެ. ރަސޫލާ ޞައްލަ ﷲ ޢަލައިހި ވަސައްލަމް ޙަދީޘް ކުރައްވާފައިވާ ކަމަށް މުފްތީ ވިދާޅުވެފައި ވެއެވެ! "- أنَّ رجلًا سأل رسولَ اللهِ صلى الله عليه وسلم أيُّ الإسلامِ خيرٌ ؟ قال : تطعم الطعامَ، وتقرأ السلامَ، على من عرفتَ ومن لم تعرف 

މާނައީ: ”މީހަކު ރަސޫލާ صلى الله عليه وسلم ގެ އަރިހުން ސުވާލުކުރެއްވިއެވެ. އިސްލާމްދީނުގައި އެންމެ މާތްވެގެންވާ ޢަމަލަކީ ކޮބައިހެއްޔެވެ؟ ޙަދީޘްކުރެއްވިއެވެ. ތިބާ މީސްތަކުންނަށް ކާންދޭށެވެ. އަދި ތިބާ ދަންނަ މީހުންނާއި ތިބާ ނުދަންނަ މީހުންނަށް ސަލާމްކުރާށެވެ.“ "

މުފްތީ ވިދާޅުވީ މިޙަދީޘްފުޅުގައިވާ ފުރަތަމަކަމަކީ މީސްތަކުންނަށް ކާންދިނުމެވެ. ގޭތެރޭގެ ދަތިކަން ހުންނަ ގޮތުން ގެއަށް މީހަކު ގެންގޮސްގެން ކާންދޭން އުނދަގޫވާނަމަ އެމީހާއަށް އެއްފަހަރު ކެވޭނެ މިންވަރަށް ފައިސާ ދިނަސް އެއީ ކާންދިނުން ކަމުގައި ބެލެވިދާނެއެވެ.

ދެވަނައަށް ޙަދީޘްފުޅުކުރައްވަވާފައި އެއޮތީ ތިބާ ދަންނަ މީހުންނާއި ތިބާ ނުދަންނަ މީހުންނަށް ސަލާމްކުރުމަށެވެ. މީހަކާއި ބައްދަލުވުމުން "ޢައްސަލާމް ޢަލައިކުމް" ބުނެލިނަމަވެސް އެއޮތީ ސަލާމް ގޮވިފާ ކަމަށް މުފްތީ ވިދާޅުވިއެވެ. އެންމެ ކުޑަމިނުން އެވަރުކޮށްލަން މަސައްކަތްކުރުމަށާއި، އެއީ ކޮންމެހެން ތިމާ ދަންނަ ނުވަތަ އެކުވެރިއަކަށް ވާކަށް ނުޖެހޭ ކަމަށްވެސް މުފްތީ ވިދާޅުވިއެވެ. 

އާދޭހެވެ! ކޮންމެ މީހަކާއި ބައްދަލުވިނަމަވެސް އެންމެ ކުޑަމިނުން އެވަރުކޮށްލުމަކީ ބުރަކަމެއް ހެއްޔެވެ؟  އަހަރެމެންގެ ތެރޭގައި ސަލާމްގޮވުމުގެ ރީތި ސިފަ ގެއްލިއްޖެއެވެ. މިއަދު ބިދޭސީއަކު ނޫނީ ސަލާމްގޮވާލާ ނުހަދައެވެ. ދިވެއްސަކު އެފަދައިން ސަލާމްގޮވާ ހަދާނަމަ ކުރަނީ މަލާމާތެވެ! ހެޔޮވާނީ ކޮންފަދައަކުން ހެއްޔެވެ؟ އާދައިގެ ކުޑަ ކަމެކެވެ. އެކަމަކު މިއީ އެއްމެ ހެޔޮ އަމަލުތަކުގެ ތެރޭގައި ހިމެނޭ އަމަލެކެވެ. ލޮބުވެތި މުސްލިމުންނޭވެ! ސަލާމްގޮވުމަށް އާދަ ކުރާށެވެ!

 

ހަވާލާ: މުފްތީ މެންކުގެ ދަރުހަކުން