ގިނައިން އިވޭ ވާހަކައެކެވެ. "ސައިންސާއި ޤުރުއާން ދުވަހަކު ވެސް ދެބަހެއް ނުވާނެއެވެ." ނަމަވެސް މިއީ ހަމަ ޙަޤީޤަތް ބާއެވެ؟

ފުރަތަމަ ކަމަކަށް ހަނދާނުގައި ބަހައްޓަން ޖެހޭ ކަމަކީ، ޤުރްއާނަކީ ސައިންސް ފޮތެއް ނޫން ކަމެވެ. އެއީ ޢާލަމްތަކުގެ ވެރި އިލާހުގެ ކަލާމްފުޅެވެ. ދެވަނަ ކަމަކީ، ޤުރްއާނުގައި ޙަޤީޤަތާ ޚިލާފު އެއްވެސް ވާހަކައެއް ނުވާނެ ކަމެވެ. އޭގައިވާ ޣައިބުގެ ވާހަކައެއް ނުވަތަ ސައިންސުގެ ދާއިރާގެ ވާހަކައެއް ވިޔަސް ވާނީ ހަމަ ސީދާ ތެދަށެވެ. މިއީ ޤުރްއާނާއި ސައިންސާ ފަރަޤުކުރާ މައިގަނޑު ހިސާބެވެ. އެހެނީ، ސައިންސުގެ ދާއިރާގައި މިއަދު "ފެކްޓެއް" ނުވަތަ ޙަޤީޤަތެއް ކަމުގައި ބަލާ ކަމެއް މީގެ އަހަރުތަކެއް ފަހުން ބޯދާ ވިސްނުމަކަށް ވެސް ވެދާނެ އެވެ. މީގެ އެތަކެއް މިސާލެއް ސައިންސުގެ ދިގު ތާރީޚުން ފެންނަން އެބަހުއްޓެވެ.

ޤުރްއާނާއި ސައިންސާ ދުވަހަކު ވެސް ދެބަހެއް ނުވާނޭ ބުނުމުން ޖެހޭ މައިގަނޑު މައްސަލައަކީ، ކުރުކޮށް ބުނަންޏާ، ޙަޤީޤަތް ބަޔާންކުރާ އެއްޗެއްގެ ގޮތުގައި ޤުރްއާނަށް ދޭން ޖެހޭ ދަރަޖަ ދަށްކުރުމެވެ. ތަފްޞީލަކަށް ދަންޏާ، ސައިންސަކީ މިއަދުގެ ދުނިޔޭގައި ކަންކަމުގެ ޙަޤީޤަތް ބަޔާން ކުރުމަށް ބޭނުންކުރާ މިންގަނޑެކެވެ. މިކަން ހާމަވާ އެއް ގޮތަކީ، ކަމެއް ޤަބޫލުކުރުމަށްޓަކައި ސައިންސުގެ އަލީގައި އެ ކަމެއް ސާބިތުވާން ޖެހޭ ކަމަށް ބައެއް މީހުން ދެކޭ ދެކުމެވެ.

ނަމަވެސް ދަންނާން ޖެހޭ ޙަޤީޤަތަކީ، ޤުރްއާން އަބަދުވެސް ސައިންސަށް ވުރެ އިސްވާނެ ކަމެވެ. ޤުރްއާނަކީ، ހުރިހާ ކަމެއް އެންމެ މޮޅަށް ބައްލަވައިވޮޑިގެންވާ އަދި އެންމެ މޮޅަށް އައްސަވައިވޮޑިގެންވާ އަދި އެންމެ މޮޅަށް ކަންކަން ތަދުބީރުކުރައްވަވާ ޢާލަމްތަކުގެ ވެރި އިލާހުގެ ކަލާމްފުޅެވެ. ވުމާ އެކު، އެ އިލާހުގެ ކަލާމްފުޅުގައި ނުވަތަ ވަޙީ ބަސްފުޅުގައި އެއްވެސް މިންވަރަކަށް ޙަޤީޤަތާ ޚިލާފު ވާހަކަތަކެއްް ހިމެނިފައިވުމަކީ މުސްތަޙީލު ކަމެކެވެ. ނަމަވެސް ސައިންސަކީ ޢިލްމާއި ބުއްދި އާއި ވިސްނުމާއި ފިކުރުގެ ގޮތުން އިންސާނުންގެ މަޚްދޫދުކުރެވިފައިވާ ހިއްސުތަކަކުން ދެނެގަނެވޭ ކަންތައްތަކެއްގެ މައްޗަށް ބިނާވާ އެއްޗެއް ކަމުގައި ވާތީ، މިފަދަ ބައެއްގެ ހޯދުންތަކުގައި ކުށް ހުރުމަކީ ނުވަތަ ކުށް ގިނަވުމަކީ ވުން ވަރަށް އެކަށީގެންވާ އަދި ކިއެއްތޯ ވުން ވަރަށް ގާތް ކަމެކެވެ. ޒަމާންތައް ވެއަތުވަމުން ގޮސް ސައިންސުގެ ދާއިރާ ތަރައްޤީ ވާ ވަރަކަށް، ހޯދިފައިވާ ސައިންސުގެ ބައެއް "ޙަޤީޤަތްތައް" ބަދަލުވާ ކަމީ މީގެ އަލިގަދަ ހެއްކެކެވެ.

ވީމާ، ޤުރްއާނާ ސައިންސާ ސައްތައިން ސައްތަ އެއްބަސް ވާނޭ "މި މާނައިގައި" ނުބުނާށެވެ. އެފަދައިން ބުނަންޏާ، ސައިންޓިސްޓުންތަކަކަށް ހޯދައިގަނެވޭ ހޯދުމެއް ޤުރްއާނުގައިވާ އާޔަތަކާ ފުށު އަރަންޏާ، ނުވަތަ ޤުރްއާނުގައިވާ ކަމެއް ސައިންސުން ސާބިތު ނުކުރެވެންޏާ، އީމާންކަން ބަލިކަށި މީހުން ޤުރްއާނުގެ ޞައްޙަކަމާ މެދު ސުވާލުކުރަން ފަށައިފާނެއެވެ. މިސާލަކަށް އިސްރާ އާއި މިޢުރާޖުގެ ދަތުރަކީ އެ ޒަމާނުގައި ހިނގައިފާނޭ ކަމެއްކަމަށް ސައިންސުގެ ދާއިރާއިން ސާބިތުނުވާތީ، އެއީ ޙަޤީޤަތެއް ނެތް ފުލޯކު ވާހަކައެއް ކަމުގައި މުލްޙިދުން ޤަބޫލުކޮށް މުސްލިމުންނަށް މަލާމާތްކޮށް ހަދައެވެ. ނަމަވެސް މިއީ، ސީދާ ކީރިތި ޤުރްއާނުގައި އެ ދަތުރުގެ ވާހަކަ ވަރަށް ޞަރީޙަކޮށް ބަޔާންވެފައިވާ ހާދިސާއެކެވެ. އޭގެ ޞައްޙަކަމާ މެދު އެއްވެސް ޝައްކެއް ނެތް ހާދިސާއެކެވެ. ވީމާ ހަނދާނުގައި ބަހައްޓަވާށެވެ. އެފަދަ ވާހަކަތަކެއް ދައްކައިގެން ބަޔަކު އަޅުގަނޑުމެންނަށް މަލާމާތްކުރި ކަމުގައި ވިޔަސް، ހުރިހާ ޙަޤީޤަތެއް އެންމެ މޮޅަށް ދެނެވޮޑިގެންވާ ﷲ سبحانه وتعالىގެ ޙަޟްރަތުގައި މަލާމާތް ލިބިގެންވާ ސަފީހުންނަކީ އެއީ އެވެ.

 

(ސައިންސާއި ޤުރްއާން 100% އެއްގޮތްވާނެ ހެއްޔެވެ؟ - އައްޝެއިޚް މުޠީޢު އިސްމާޢީލު މުޙައްމަދު؛ ދީނުގެ މަގު އަދަދު 31, ޞ.4 - 29 ޖުލައި 2022)