ބަލާޔާއި މުސީބާތްތަކަކީ އަބަދުވެސް އަހަރެމެން އިންސާނުންނާއި އެކި ގޮތްގޮތުން ކުރިމަތިވަމުން އަންނަ ކަންތައްތަކެކެވެ. ފާޅުގައި ކުރިމަތިވާ ބޮޑެތި މުސީބާތްތަކާއި ކާރިސާތަކާއި، އަދި ފާޅު ނުވެ ނަމަވެސް، ކުރިމަތިވަމުންދާ އެކި އެކި ގޮންޖެހުންތަކާއި ދަތިތަކަކީވެސް މީގެ ތެރެއިންވާ ކަންކަމެވެ. އެއީ އެއްގަމުގައި ވީ ކަމުގައި ވީނަމަވެސް އަދި ކަނޑުގައި ވީނަމަވެސް މެއެވެ. މުޅި މި ކާއިނާތާ ގުރަހަ ތަކާއި އެ ގުރަހަތަކުގެ ހުރިހާ އެއްޗެއް މިލްކުވެ ވޮޑިގެންވަނީ މާތް ﷲ އަށެވެ. އެ އިލާހުގެ އިޒުނަފުޅާ ލައިގެން މެނުވީ ހަމަ އެއްމެ ކަމެއްވެސް މި ކާއިނާތާ ގުރަހަތަކުގައި ނުހިނގާނެއެވެ.

އެއްގަމާއި ކަނޑުގައި އަބަދުވެސް އަހަރެމެންނަށް ބިރުވެރިކަން އިހުސާސް ކުރެވޭފަދަ އެތައް ކަމެއް ތަރުތީބުވެ ހިނގައެވެ. ބިންހެލުން އައުމާއި ބިންގަނޑު ކަނޑައިގެން ދިއުމާއި، ވާރޭ ވެހުމުގެ ސަބަބުން ކޯރުތައް ބަންޑުން ވުމާއި ފެންބޮޑުވެ އަވަށްތައް ނެތި ދިޔުމާއި ވަޔާއި ހިރަފުހާއި ވެލީގެ ތޫފާންތަކާއި، އަލިފާނުގެ ބޮޑެތި ހާދިސާތަކާއި އަލިފާން ފަރުބަތަކަށް ގޮވުންފަދަ ކިތަންމެ ބިރުވެރި ހާދިސާއެއް އެއްގަމުގައި ހިނގައެވެ. ކަނޑުގެ ރާޅުތައް ބޮޑުވެ، ހޮޅިލާ ބިންދަމުން ދިއުމާއި، ބާރުގަދަ އޮއެވަރުތައް އުފެދުމާއި، ކަނޑު އަޑިން އަންނަ ބިންހެލުން ތަކުގައި ސުނާމީ އުފެދުމާއި މިފަދަ ކިތަންމެ ހާދިސާއެކެވެ. އަދި އެއްގަމާއި ކަނޑުގައި ހާދިސާއެއް ހިނގުމަކާއި ނުލާވެސް އިންސާނަކަށް އެތައް ބިރުވެރި ކަމެއް ވެއެވެ. އެއްގަމުގައި ވީ ކަމުގައި ވިޔަސް، ކަނޑުގައި ވީ ކަމުގައިވިޔަސް އިންސާނާގެ މަރަކީ އެ އިންސާނަކާއި އަބަދުވެސް އެއްމެ ކައިރީގައި ވާ އެއްޗެވެ.

މާތް ﷲ ކީރިތި ޤުރުއާނުގައި ވަޙީ ކުރައްވާފައި ވެއެވެ.

﴿63﴾ قُلْ مَن يُنَجِّيكُم مِّن ظُلُمَاتِ الْبَرِّ وَالْبَحْرِ تَدْعُونَهُ تَضَرُّعًا وَخُفْيَةً لَّئِنْ أَنجَانَا مِنْ هَٰذِهِ لَنَكُونَنَّ مِنَ الشَّاكِرِينَ. މާނައީ: ކަލޭގެފާނު ވިދާޅުވާށެވެ! އެއްގަމާއި، ކަނޑުގެ އަނދިރިތަކުގެ ތެރެއިން (އެބަހީ: އެއްގަމާއި، ކަނޑުގެ ބިރުުވެރިކަމުގެ ތެރެއިން) ތިޔަބައިމީހުން މިންޖުކުރާނީ ކާކުހެއްޔެވެެ؟ މަޑުމޮޅިކަމާއި، ވަންހަނާ ގޮތުގައި، ތިޔަބައިމީހުން އެކަލާނގެއަށް دعاء ކޮށް ދަންނަވަމުއެވެ. ހަމަކަށަވަރުން، އެކަލާނގެ ތިމަންމެން މިކަމުން ސަލާމަތް ކުރައްވައިފިނަމަ، شكر ވެރިވާ މީހުންގެ ތެރެއިން ހަމަކަށަވަރުން ތިމަންމެން ވާހުށީމެވެ. (އަލް އަންޢާމް 63 ވަނަ އާޔަތް)

އެއްގަމުގައި ވިޔަސް ކަނޑުގައިވިޔަސް، އެ ތަނެއްގެ ބިރުވެރިކަމުން އަހަރެމެން ސަލާމަތްކޮށްދެއްވާނޭ ހަމައެކަނި ފަރާތަކީ މާތް ﷲ އެވެ. ބިރުވެރިކަމެއް މުސީބާތެއް ނުވާނެ ތަނަކަށް އަހަރެމެންނަކަށް މި ދުނިޔެ މަތީގައި ނުމެ ދެވޭނެއެވެ. އެހެންކަމުން އެކަމުގައި އިންސާނާ އަށް ސިއްރުގައްޔާއި ފާޅުގައި މާތް ﷲ އަށް ދުޢާ ދެއްނެވުމެވެ. ބަލާޔާ މުސީބާތްތަކުން ސަލާމަތް ކޮށްދެއްވާ ކުއްލި މަރުތަކުން އަހަރެމެން ރައްކާތެރިކޮށްދެއްވުން އެދި ގިނަ ގިނައިން ދުޢާ ކުރުމެވެ. ދުޢާ ކުރުމަކީ ދެއަތް އުފުލާ ކުރާ ދުޢާ އެކަންޏެއް ނޫނެވެ. ގެއިން ނުކުންނަ ހިނދު އެ ކިޔާ ދުޢާ ކިޔުމާއި، ދަތުރެއް ކުރާ އިރު އެ ކުރާ ދުޢާ ކުރުމަކީވެސް ހަމަ ދުޢާ ކުރުމެވެ. ދުޢާތައް ވާރިދުވެ އައިސްފައިވަނީ ސަބަބަކަށް ޓަކައެވެ. 

އަހަރެމެން އެންމެންނީ ގިނަ ގިނައިން ދުޢާ ކުރާ ބަޔަކު ކަމުގައި ވަމާ ހިނގާށެވެ. މުސީބާތްތަކާއި ބަލާތަކުން ސަލާމަތްވުމަށް އެދި ގިނަ ގިނައިން ދުޢާ ކުރާށެވެ. ދުޢާ ކުރަން މިސްކިތަކަށް ދާކަށް ނުޖެހެއެވެ. ރައްކާތެރިކަމަށް އެދި ކޮންމެ ހާލެއްގައިވެސް ދުޢާ ކުރެވިދާނެއެވެ. މާތް ﷲ އީ މޮޅަށް ދެނެވޮޑިގެންވާ، އައްސަވާ ވޮޑިގެންވާ އިލާހެވެ.