ޤައުމީ ދުވަސް އަހަރެމެން ދިވެހިން ފާހަގަ ކުރަމުން މިދަނީ ދިވެހިންނަށް އިސްލާމީ ހިދާޔަތު ލިބުމަށްފަހު، އެ އިސްލާމީ ވަހުދަތު މި ރާއްޖެއިން ބަޔަކު މީހުން ފޮހެލަން އުޅުނު އުޅުމުގެ މައްޗަށް ދިވެހިން ހޯދި ނަސްރާ ކާމިޔާބީ ފާހަގަ ކުރުމަށެވެ. ޕޯޗުގީޒުންގެ އަނިޔާވެރިކަމުގައި ދިވެހިން 15 އަހަރާއި 6 މަސް ހޭދަކުރީ އެ އަނިޔާތަކުގައި ދިވެހިންގެ ލޭ ކޮށެވިގެންނެވެ. އެބައިމީހުންގެ މަގުސަދަކަށް ވެފައި އޮތީ ދިވެހިފަސްގަނޑުން އިސްލާމް ދީން ފޮހެލުމެވެ. އެގޮތުން ދިވެހިންނަށް އެތައް އަނިޔާއެއް ކުރުމާއި ގަދަކަމުން ދިވެހިންގެ ކަރަށް ބަނގުރާ އަޅަމުން ދިޔަކަން ތާރީހީ ލިޔުންތަކުން ފެންނަން އެބަ އޮތެވެ.

ކޮންމެއަކަސް މި އަނިޔާވެރިކަމާއި ދެކޮޅަށް ދިވެހިން ވަނީ ހަނގުރާމަ ކޮށްފައެވެ. އިސްލާމް ދީނާއި ދިވެހި ޤައުމުގެ ހައްގުގައެވެ. 15 އަހަރު އެ އަނިޔާތަކުގައި ހޭދަކުރީ ޕޯޗުގީޒުންނާ ހަނގުރާމަ ކުރަށް ދިވެހިން ފަދްޖެހިފައި ވާތީއެވެ. ނަމަވެސް އެ ފަސްޖެހުމުގެ ތެރެއިން އައު ހިތްވަރަކާއި އެކު، ކުރަން ބޭނުން ނުވި ނަމަވެސް، ދީނާއި ގައުމުގެ ހައްގުގާ ހަނގުރާމަ ކުރުމުގެ މަތިވެރި އަޒުމުގައި މުޙައްމަދު ތަކުރުފާނު އިސްވެ ކުރެއްވި މަސައްކަތް ފާހަގަ ކުރެވެއެވެ. އަހަރެމެން މުސްލިމުން ހަނގުރާމަ ކުރުމުގައި އޮތީ ކޮން ހުކުމެއްތޯ ބަލާލާއިރު، ކީރިތި ޤުރުއާނުގެ މި އާޔަތް ފުދެއެވެ. މާތް ﷲ ވަޙީ ކުރައްވާފައި ވެއެވެ.

﴿216﴾ كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ ۖ وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ.

މާނައީ: ހަނގުރާމަކުރުން ތިޔަބައިމީހުންގެ މައްޗަށް فرض ކުރައްވައިފިއެވެ. އެއީ، (އެކަމަކީ) ތިޔަބައިމީހުންނަށް ނުރުހެވޭ ކަމެއް ކަމުގައި ވަނިކޮށެވެ. އަދި ތިޔަބައިމީހުން ނުރުހޭ ކަމެއް އެއީ ތިޔަބައިމީހުންނަށް ލާބަހުރި ކަމަކަށް ވެދާނެތެވެ. އަދި ތިޔަބައިމީހުން ރުހޭ ކަމެއް، އެއީ ތިޔަބައިމީހުންނަށް ގެއްލުންހުރި ކަމަކަށް ވެދާނެތެވެ. އަދި اللَّه ހުރިހާ ކަމެއްމެ ދެނެވޮޑިގެންވެއެވެ. ތިޔަބައިމީހުންނަކަށް ނޭނގެއެވެ. (އަލް ބަޤަރާ 216 ވަނަ އާޔަތް)

މި އާޔަތުގެ އިރުޝާދުން ދަރުސް ލިބިގަންނައިރު، މުޙައްމަދު ތަކުރުފާނުން އެ ހަނގުރާމަ ނުކުރެއްވިނަމަ ދިވެހިންނަށް މިއަދު ލިބިފާ އޮންނާނީ ކޮންފަދަ ބޮޑު ގެއްލުމެއް ކަމެއް ނޭނގެއެވެ. މާތް ﷲ އަބަދުވެސް ކަންކަން ހިންމަވައި ދެއްވަނީ އެ ކަލާންގެއަށް ކިޔަމަންތެރި އަޅުންނަން ރަނގަޅަށެވެ. 15 އަހަރު އިސްލާމް ދީން ފޮހެލަން މި ރާއްޖޭގައި ތިބި ބަޔަކު ކުރަމުން ދިޔަ މަސައްކަތަށް ދިވެހިން ދެއްކި ސާބިތުކަމާއި ހިތްވަރުގެ ނަތީޖާއަކީ މިއަދު ދިވެހިންގެ ދީނާ ގައުމު ދިވެހިންގެ އަތްމަތީގައި މިނިވަންކަމާއި އެކުގައި އޮތުމެވެ. މިއީ ކޮންފަދަ މާތް އަދި އެހާމެ ބޮޑު ނިއުމަތެއް ތޯއެވެ. ހަނގުރާމަ ކުރުމުގެ ހުއްދަ ދެއްވި މާތް ﷲ އަށް ހަމްދާއި ޝުކުރު ކުރަމެވެ. އަދި ތާ އަބަދު، މި ރާއްޖެ މިނިވަންކަންމަތީ ލަހައްޓަވާންދޭވެ!

ނަމަވެސް ހަނދާން ކުރާށެވެ. ހަނގުރާމަ އަކީ ހިތަށް އެރި ގޮތަކަށް ކުރަން އޮންނަ ކަމެއް ނޫނެެވެ. ހަނގުރާމަ ވާޖިބުވާ ހާލަތްތަކެއް އިލްމުވެރިން ބަޔާން ކުރައްވައެވެ. އެނޫން ހާލަތަތެއްގައި ހަނގުރާމައިގެ ނަމުގައި ހިންގާ ގަތުލް އާންމުތަކަކީ އިސްލާމްދީން ބަލައިގަންނަ ކަންކަމެއް ނޫނެވެ.