ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާ ހާއްސަކޮށްފައިވަނީ ހެޔޮލަފާ ރަޙްމަތްތެރިން އިޚްތިޔާރުކުރުމަށެވެ.

މިއަދުގެ ޚުތުބާގައި، ބުނެފައިވެއެވެ. ހަރުބަހެއްގައިވާ ގޮތުގައި ރަޙްމަތްތެރީން އެނގޭނީ މުޞީބާތުގެ ވަގުތުގައެވެ. މީހަކަށް މުޞީބާތެއް ނުވަތަ ކާރިޘާއެއް ނުވަތަ ދަތިކަމެއް ކުރިމަތިވުމުން، އޭނާގެ ގާތުގައި އެކުވެރީންކަމުގައި ހެދިގެން އުޅުނު ގިނަ ބަޔަކު، އޭނާ ދޫކޮށް ދުރަށް ދާތަން ފެންނަ ކަމަށެވެ.

މިކަމުގެ މިސާލެއްގެ ގޮތުން، އަލިއަޅުވާލައިފައިވެއެވެ. ﷲގެ ނަބިއްޔާ، ސަލާމް ލެއްވި އައްޔޫބުގެފާނާ އާލާސްކަންފުޅެއް ކުރިމަތިވެ، އެކަލޭގެފާނުގެ ބޭފުޅުން އަވަހާރަވެ، މުއްސަނދިކަމާއި، ތަނަވަސްކަން ގެއްލިގެން ދިޔަ ވަގުތު، އެކަލޭގެފާނަށް ޒިޔާރަތްކުރަމުން ދިޔަ މީހުންނާއި، އެކަލޭގެފާނުގެ މަޖިލީހަށް ޙާޒިރުވަމުން ދިޔަ މީހުންގެ ތެރެއިން ގިނަ ބަޔަކު، އެކަލޭގެފާނު ދޫކޮށް ދުރަށް ދިޔައެވެ. އެކަލޭގެފާނުގެ އަރިހުގައި ތިބީ އިޚްލާސްތެރި މަދު ރަޙްމަތްތެރީން ކޮޅެކެވެ. އިބްނު ޙިއްބާން ރިވާކުރައްވާފައިވާ ގޮތުގައި، އައްޔޫބުގެފާނު މި އާލާސްކަންފުޅުގައި އަށާރަ އަހަރު ހޭދަކުރެއްވިއެވެ. އެކަލޭގެފާނު ދޫކޮށްނުލައި އެކަލޭގެފާނުގެ އަރިހަށް ޒިޔާރަތް ކުރަމުން ދިޔައީ ހަމަ އެންމެ ދެ މީހެކެވެ.

ރަޙްމަތްތެރީންނަކީ ޖަމާޢަތެއްގެ ކުރިއެރުމާއި، ފަހަތަށް ޖެހުމުގައި ވަރަށްބޮޑު ދައުރެއް އަދާކުރާ ބަޔެކެވެ. ހިތްހަމަޖެހުމާއި، ނުތަނަވަސްކަން ގެނެސްދިނުމުގައި، މީހުންގެ ޙަޔާތާއި، ވިސްނުމާއި، ފިކުރަށް ވެސް ރަޙްމަތްތެރީންގެ އަސަރު ވަރަށް ބޮޑަށް ކުރާކަމަށް ބުނެފައިވެއެވެ.

ރަޙްމަތްތެރީން އިޚްތިޔާރު ކުރުމުގައި، އިސްލާމްދީން ވަނީ އަޅުގަނޑުމެންނަށް މަތިވެރި އިރުޝާދުތަކެއް ދެއްވާފައެވެ. ރަޙްމަތްތެރިކަމުގެ ގުޅުން އުފެދި އާލާވެފައިވަނީ، އިޚްލާސްތެރިކަމާއި، މަތިވެރި މަޤްޞަދެއްގައި ކަމުގައި ވާނަމަ، އެއީ މާތްﷲ، އެކަމުގައި ބަރަކާތް ލައްވާނެ ގުޅުމެކެވެ. އެއީ ދޯދިޔާ، ނުބައި ގުޅުމެއް ކަމުގައި ވާނަމަ، އޭގެ ނުބައިކަން މާތްﷲ، އެ ފަރާތަކަށް ރައްދު ކުރައްވާނެ ކަމަށް ވެސް ޚުތުބާގައި ބުނެފައިވެއެވެ.

ރަނގަޅު ރަޙްމަތްތެރީން އިޚްތިޔާރު ކުރުމަށް ކީރިތި ރަސޫލާ ﷺ އަޅުގަނޑުމެންނަށް އަމުރު ކުރައްވާފައި ވެއެވެ. އެ ކަލޭގެފާނު ޙަދީޘް ކުރައްވާފައިވެއެވެ. ރަނގަޅު ރަޙްމަތްތެރީންގެ މިޘާލަކީ ގޮމަކަސްތޫރި ވިއްކާ މީހެއްގެ މިޘާލެވެ. އޭނާގެ ފަރާތުން އެއްޗެއް ނުލިބުނު ކަމުގައި ވިޔަސް އޭނާގެ ގާތުން މީރުވަސް ލިބޭނެއެވެ. ނުބައި ރަޙްމަތްތެރިޔާގެ މިޘާލަކީ، ގިރުނބާ ދަމާ މީހެއްގެ މިޘާލެވެ. އޭނާގެ ކައިރިން ގެދަބުޅީގެ އަސަރު ނުފޯރިނަމަވެސް، ދުމުގެ އަސަރު ފޯރާނެއެވެ. 

މާތްﷲ އަށްޓަކައި އުފެއްދޭ ރަޙްމަތްތެރިކަން ދެމި އޮންނާނީ، ﷲ އަށް ކިޔަމަންގަތުމުގެ މަތީގައެވެ. އޭގެތެރެއިން، އެކެއްގެ ސުލޫކާއި އުޅުން ނުބައިވެއްޖެނަމަ އަނެކަކު އޭނާއާ ދުރުހެލިވެ، ރަޙްމަތްތެރިކަން ކަނޑައިލާނެއެވެ. ކީރިތި ރަސޫލާ ﷺ ގެ އަޞްޙާބު ބޭކަލުން އެބޭކަލުންގެ މެދުގައި ރަޙްމަތްތެރިކަން ބަދަހި ކުރެއްވުމަށްޓަކައި، އެއްބޭކަލަކު އަނެއްބޭކަލަކަށް ހެޔޮކަންތައްތައް ކުރުމުގައި އެހީތެރިވެ، އެއްބާރުލުން ދެއްވިއެވެ. އަދި މާތް ﷲގެ ރުހިވޮޑިގަތުން ލިބިގަތުމަށް މަސައްކަތްކުރުމާއި، ޙައްޤަށް ތަބާވުމަށް އެއްބޭކަލަކު އަނެއް ބޭކަލަކަށް ނަސޭހަތްތެރިވެ ވަޑައިގެންނެވިކަމަށް ވެސް ޚުތުބާގައި ބުނެފައިވެއެވެ.