"އިސްލާމް ދީނަކީ އެކުވެރިކަމުގެ ދީން" މި މައުލޫއަށް ހާއްސަކޮށްގެން މިއަދު ރާއްޖޭގެ އެކި ކަންކޮޅުތަކުގައި އިއްވި ހުތުބާގައި ވަނީ އިސްލާމް ދީނަކީ އެއްބަޔަކު އަނެއްކަބަޔަށް އޯގާވެރިވެ ރަހްމު ކުރުމަށް ގޮވައިލާ ދީނެއްކަން ހަނދާން ކޮށްދީފަ އެވެ.

އެގޮތުން ހުތުބާގައި ބުނި ގޮތުގައި ކީރިތި ގުރުއާނުގައި މާތް ﷲ އިސްލާމީ އުއްމަތުގެ އަފްރާދުން ސިފަކުރައްވާފައި ވަނީ އެއްބަނޑު އެއްބަފާ އަޚުންތަކެއްގެ ގޮތުގަ އެވެ.

އިސްލާމީ އަޚްވަންތަކަން ނުވަތަ އެކުވެރިކަމަކީ ވަރަށް މަތިވެރި މާތް ލަޅުދަނޑިތަކެއް އަދި ދީނީ މުހިންމު މަގްސަދުތަކެއް ހިމެނޭ ކަމެއް ކަމަށް ހުތުބާގައި ވަނީ ބުނެފައެވެ. އޭގެ ތެރެއިން އެންމެ މުހިންމު ކަމަކީ އެއް މުސްލިމަކު އަނެއް މުސްލިމަކަށް ހެޔޮ ކަންކަމުގައި ވާގިވެރިވުން ކަމަށެވެ.

"އެކަކުގެ ބޭނުންތައް ދަނެ، ތިމާގެ އަމިއްލަ ހަޔާތް ބާއްޖަވެރިކުރަން އެދޭ ފަދައިން ދިބާގެ މުސްލިމް އަޚާގެ ހަޔާތަށް އާރޯކަމާއި ބާއްޖަވެރިކަން ގެނައުމަށް މަސައްކަތް ކުރަންޖެހެ އެވެ،" -ހުތުބާ-

ހުތުބާގައި ބުނި ގޮތުގައި އިސްލާމީ އުޚުއްވަތްތެރިކަމާއި އެކުވެރިކަމަކީ އޭގެ ސަބަބުން ތިބާ ބޭނުންޖެހިފައިވާ ހާލުގައިވެސް ތިމާގެ އަޙުންނާއި އެކުވެރިންނަށް އިސްކަންދޭން ދަސްކޮށްދޭ ކަމެކެވެ.

"ތިމާގެ އެކުވެރި މުސްލިމް އަޚުންނަށްޓަކައި ހެޔޮ ދުއާ ކުރުމަކީ ނުހަނު މުހިންމު ކަމެކެވެ. އެއީ، އޭގެ ފައިދާ ޚުދު ތިމާއަށްވެސް ލިބޭނެ ކަމެއްކަން ލޮބުވެތި ނަބިއްޔާ ވަނީ އަންގަވާފަ އެވެ،" -ހުތުބާ-