ކުޅިވަރުގައި މޮޅުވެ ކާމިޔާބުވާ ފަރާތްތަކަށް އިނާމާއި މެޑައްޔާއި ފައިސާ ވެސް ލިބެއެވެ. މަޝްހޫރުކަމާއި ރުހުމާއި ލޯބި ވެސް ލިބެއެވެ. މި ހުރިހާ މޮޅެއް އޮތީ ކުޅުންތެރިންނަށެވެ. ސަޕޯޓަރުންނަކަށް ނޫނެވެ. ސަޕޯޓަރުންނަށް ލިބެނީ ވަގުތީ ހިތްހަމަޖެހުމެކެވެ. ކުޑަ އިރުކޮޅެއްގެ މަޖަލަކާއި އުފަލެކެވެ. އެ ކަން ދެމިއޮތުމަކީ ވެސް އެކަށީގެންވާ ކަމެކެވެ. އެހެނަސް އޭގެ ފޮނިކަމާއި ލައްޒަތު އެންމެ ފުރިހަމައަށް ލިބުމެއް ނުވެއެވެ. އެކަން ވާނީ ވެސް އެހެންތާއެވެ! ހުރިހާ ވޭނަކާއި ތުރާލެއް ތަޙައްމަލުކުރީ ކުޅުންތެރިންނެވެ. ވަރުބަލިވީ އެ މީހުންނެވެ. ހުރިހާ ހަކަތައެއް ހޭދަކުރީ އެ މޮޅު ހޯދާށެވެ. ހަޔާތުމް ވަގުތު ހުސްކުރީ އެ ކަމަށެވެ. ޖާނާއި މާލު ޤުރުބާން ކުރީ އެހެންވެއެވެ.

މި މިސާލުން އިސްލާމްދީނަށް ބަލައިލަމާތޯއެވެ. މި ދީނަށް އުޅޭ ބަޔަކާއި މި ދީނަށް ސަޕޯޓްކުރާ ބަޔަކު ތިބެނީއެވެ. ސަޕޯޓަރުންގެ ބަހަކީ ތިމަންނާމެން އެވެނިމިވެނި ކަންތައްތަކެއް ނުކުރިޔެއްކަމަކު ތިޔަ ކަންކަމަށް ތާޢީދު ކުރަމެވެ. ހިތްވަރު ވެސް ދެމެވެ. ކުޅުންތެރިންނަކީ ދީނީ ކަންކަމަށް ސަމާލުވާ މީހުންނެވެ. ކޮންމެހެން ކުރަންޖެހޭކަން ދަނެގެން އުޅޭ މީހުންނެވެ. ގަޑިންގަޑިއަށް ނަމާދު ޤާއިމުކުރާ މީހުންނެވެ. ޒަކާތް ދޭ މީހުންނެވެ. ޞަދަޤާތް ދޭ މީހުންނެވެ. ފަރުޟު ރޯދަތަކާއި ސުންނަތް ރޯދަ ވެސް ހިފާ މީހުންނެވެ. ނަތީޖާގެ ދުވަހު ކާމިޔާބު ލިބި ނަޖާވާނެ ބަޔަކީ މިއީއެވެ. ސަޕޯޓަރުންނަށް އޮތީ އެ މީހުން ކުޅަ ސަޕޯޓު އެކަންޏެވެ.

އިސްލާމްދީނަކީ ދިރިއުޅުމުގެ މަންހަޖު ކަމުގައި ވީހިނދު ސަޕޯޓްކޮށްގެން އެކަނި ވާކަށް ނެތެވެ. ދިރިއުޅުމުގެ ހުރިހާ ބަހާއެއްގައި ރަނގަޅު ކުޅުންތެރިއެއް ފަދައިން ޙަރަކާތްތެރިވާން ޖެހެއެވެ. ވަރުބަލިވާންވީ މި ކަމުގައެވެ. ވަގުތު ހޭދަކުރަންވީ މި ކަމަށެވެ. ޖާނާއި މާލު ޤުރުބާންކުރަންވީ މި ދީން ކުރިއަރުވަން ކުރާ މަސައްކަތުގައެވެ.

ދީން ކުރިއެރުވުމަކީ ތިބާ ދީނީ ކަންކަމުގައި ސާބިތުވެ ހުރުމެވެ. ތިބާގެ ފުށުން ދީނަށް އުޅުމުގެ ނަމޫނާ ދެއްކުމެވެ. ތިބާގެ ވަށައިގެންވާ މާޙައުލުގައި ދީނުގެ ކުލަ ޖެއްސުމެވެ. ރައްޓެހިންނާ ގާތްތިމާގެ މީހުން ދީނުގެ ފަރާތަށް ގެންނަށް އުޅުމެވެ. ތިމާއަށް ފަހު އިސްލާމްދީނުގެ މަތީ ތިބޭނެ ބަޔަކު އުފެއްދުމެވެ. ތިބާގެ ދަރިންނަށް އެ މަގަށް ވަޞިއްޔަތް ކުރުމެވެ. މި ދީނުގެ އެންމެ އިސް ކާބަފައިން ވަނީ އެ ކަން އެ ގޮތަށް ކުރައްވައިފައެވެ. ޔަޢުޤޫބުގެފާނު މަރުގެ އާލާސްކަންފުޅުގައި ވީހިނދު އެކަލޭގެފާނުގެ ދަރިދަރިކަލުންނަށް ވިދާޅުވިއެވެ. "ތިމަން މަރުވެދިޔުމަށްފަހު ތިޔަބައިމީހުން އަޅުކަންކުރާނީ ކޮންފަރާތަކަށް ހެއްޔެވެ؟ އެއުރެން ދެންނެވޫއެވެ. ތިމަންމެން އަޅުކަންކުރާނީ، ކަލޭގެފާނުގެ އިލާހަށެވެ." (އަލްބަޤަރާ: 133)

ދަރީންނަށް ތަޢުހީދުގެ ވަޞިއްޔަތް ކުރުން މުހިންމެވެ. ދުނިޔޭގައި ވަނަ ހޯދުމަށާއި ވަނަ ހޯދާ ފަރާތްތަކަށް ސަޕޯޓުކުރަން އެ ކުދިން ބޭތިއްބޭކަށް ނެތެވެ. މާދަމާގެ ކާމިޔާބު ލިބޭތޯ އެ ކުދިންލައްވައި މި ދީނަށް ކުޅުވަން ފަށާށެވެ.

 

(ހުރިހާ މޮޅެއް އޮތީ ކުޅުންތެރީންނަށެވެ. ސަޕޯޓަރުންނަކަށް ނޫނެވެ. - އައްޝެއިޚް މުޙައްމަދު އަފްޟަލް؛ ދީނުގެ މަގު ޢަދަދު 52, ޞ.1 - 23 ޑިސެންބަރު 2022)