މައިންބަފައިންނާ ދިމާލަށް ނުރުމުގެ ކުޑަ މިންވަރެއްވެސް ބުނެގެން ނުވާނޭ ކަމަށް މިއަދުގެ ހުކުރު ޚުތުބާގައި ބުނެފިއެވެ.

"މައިންބަފައިންނަށް ކަމޭހިތުން" މި މައުޟޫގެ މައްޗަށް މިއަދު އިއްވި ޚުތުބާގައި ބުނީ މައިންބަފައިންނަށް ކަމޭހިތުމަކީ ދަރިންގެ މައްޗަށް ވާޖިބުކަމެއް ކަމަށެވެ. އަދި އެމީހުންނަށް އިހާނަތްތެރިކޮށް ހިތުމުން، އާހިރަތްދުވަހުން ލިބޭ އަޒާބުގެ އިތުރުން، އޭގެ ކުރިން ދުނިޔެމަތީގައި ވެސް އެކަމުގެ އުޤޫބާތް ލިބޭނެ ކަމަށް ކީރީތި ރަސޫލާ ﷺ ހަދީޘް ކުރެއްވި ކަމަށެވެ.

މިއަދު ފެންނަމުންދާ ބައެއް މަންޒަރުތަކަކީ ހިތާމަހުރި މަންޒަރުތަކެއްކަން ފާހަގަކޮށް ޚުތުބާގައި ބުނީ ބައެއް ދަރިން، އެކުދިންގެ މައިންބަފައިން އުމުރުން ދުވަސްވުމުން ދޫކޮށްލާ ކަމަށެވެ. އެމީހުން ބަލަހައްޓަން ބޭނުންނުވާ ކަމަށެވެ. އަދި އެމީހުން އެހެން މީހުން ގާތަށްގޮސް ސަލާމް ޖަހައިގެން، ކައިބޮއެ އުޅޭއިރު ދަރިން އުފަލާއި އަރާމުގައި އާއިލާއެކު އުފާ ކުރާ ކަމަށެވެ. އަދި މިއީ ހިތާމަހުރި ކަމެއް ކަމަށެވެ.

ތިމާގެ ހަޔާތުގައި މަންމަ ނުވަތަ ބައްޕަ އުމުރުން ދުވަސްވެ، ލޯބޯ ކޮށިވެފައިވާ ހާލުގައި، އެމީހުންނަށް އެހީތެރިވެ އަޅައިލުމަކީ ކޮންމެ ދަރިއެއްގެ ވާޖިބެކެވެ. އެ ހާލުގައި އެމީހުންގެ ފުށުން ކުރިމަތިވާ އުނދަގޫތަކަށް ކެތްތެރިވާންވާނެ ކަމަށް ވެސް ޚުތުބާގައިވެއެވެ.

މައިންބަފައިންނަށް ކަމޭހިތުމުގެ ތެރޭގައި އެމީހުން ދުނިޔެ ދޫކޮށް ދިޔުމުން، އެމީހުންނަށް ހެޔޮ ދުޢާ ކުރުމާއި އެބައިމީހުންގެ ރަހުމަތްތެރިންނާ ގާތްގުޅުން ބާއްވަން ޖެހޭނެ ކަމަށް ވެސް ޚުތުބާގައި ބުންޏެވެ. އުރެދުމަކަށް އަމުރު ނުކުރާހާ ހިނދަކު މައިންބަފައިންނަށް ކިޔަމަންތެރިވާން ޖެހޭނެ ކަމަށާއި އުރެދުމަކަށް ކުރާ އެއްވެސް އަމުރަކަށް އެއްވެސް މަހުލޫގަކަށް ކިޔަމަން ގަތުމެއް ނުވާނޭ ކަމަށަވެސް ޚުތުބާގައި ވަނީ ބުނެފައެވެ. މީގެ އިތުރުން މައިންބަފައިންނަކީ ޣައިރު މުސްލިމުން ކަމުގައި ވީނަމަވެސް، އެބައި މީހުންނަށް އޯގާތެރިވެ އަޅާލާ އިހުސާންތެރިވުމަށް ވެސް ޚުތުބާގައި ވަނީ ނަސޭހަތްތެރިވެފައެވެ.