ކަންކަމަށް ކެތްކުރުން ވަނީ އަހަރެމެންނަށް ވަރަށް ބޮޑު ކަމަކަށެވެ. ގިނަފަހަރަށް ރުޅި އަންނަ ކަމަކަށެވެ. އެހެންނަމަވެސް ކެތްތެރިކަމުގެ ސިފައިގާ ހުރި ހެޔޮކަމާއި އެ ސިފައިގެ މާތްކަން އަހަރެމެންނަށް އިހުސާސް ކުރެވޭނަމަ، ކަންކަމުގައި ކެތްކުރުން އެއީ މާބޮޑު ކަމެއް ކަމުގައި ނުވާނެއެވެ.

ކެތްކުރުން އޮންނަނީ ހަމައެކަނި ހިތާމައާއި މޮޅިވެރިކަމުގެ ވަގުތުގައި އެކަންޏެއް ނޫނެވެ. އިންތިޒާރެއް ކުރުމުގައިވެސް ކެތްތެރިވާން ވާނެއެވެ. ކާމިޔާބެއް ލިބޭ ހިނދުގައިވެސް ކެތްތެރިކަން އިސްކުރަންވާނެއެވެ. ނާކާމިޔާބީތަކުގައި ގޮތް ހުސްވެ އުންމީދުކަނޑާލުމަކީވެސް އަހަރެމެންނަށް އޮތް ކަމެއް ނޫނެވެ. އެފަދަ ހާލަތްތަކިގައި ކެތްތެރިވެ އައު ހިތްވަރާއެކު އައުފެށުމަކުން ފަށަން ވާނެއެވެ. އަދި އެ ނާކާމިޔާބީގައި ކެތްތެރިވެ، އެ ކެތްތެރިކަމާއި އަދި ނަމާދުން އިންސާނާ ވާގި ހޯދަން ވާނެއެވެ. މާތް ﷲ ކީރިތި ޤުރުއާނުގައި ވަޙީކުރައްވާފައި ވަނީ މިފަދައިންނެވެ.

﴿153﴾ يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ ۚ إِنَّ اللَّهَ مَعَ الصَّابِرِينَ 

މާނައީ: އޭ إيمان ވެއްޖެ މީސްތަކުންނޭވެ! ކެތްތެރިކަމާއި ނަމާދުން ތިޔަބައިމީހުން ވާގި އެދޭށެވެ! ހަމަކަށަވަރުން اللَّه ވޮޑިގެންވަނީ ކެތްތެރިންނާ އެކުގައެވެ. (އަލް ބަޤަރާ 153 ވަނަ އާޔަތް،)

މި އާޔަތުގައި ކެތްތެރިކަމާއި ނަމާދުން ވާގި އެދެން އޮތް އޮތުމުގެ މުރާދުގައި ޢިލްމުވެރިން ވިދާޅުވަނީ ހިތްވަރު ހޯދާ ލިބިގަތުން ވަނީ ކެތްކުރާ ކުރުމުންނާއި ނަމާދުން ކަމެވެ. އެހެނީ ކެތްކުރާ ވަގުތުގައި ކެތްތެރިވެވިއްޖެނަމަ އެއީ އަނެއްކާ ކުރިއަށް ދާން ލިބޭ ހިތްވަރެކެވެ. އަދި ނަމާދުގައި ﷲ އަށް ދަންނަވާ ދެންނެވުމަކީ ސާފު އަގީދާގެ ވެރިއެއްގެ ހިތުގައި ހިތްވަރު އާ ވާނޭ ކަމެކެވެ. ކަން މިހެން ހުރުމާއި އެކު އީމާންވީ މީސްތަކުން (މުސްލިމުން) ވާގި އެދެންވީ ކެތްތެރިކަމުންނާ ނަމާދުންކަން އަހަރެމެންނަށް އެނގެއެވެ.

އަދި މި އާޔަތުގެ ފަހުބައިގާ މާތް ﷲ އެ ވަޙީ ކުރައްވަނީ އެކަލާނގެ ވޮޑިގެންވަނީ ކެތްތެރިންނާއި އެކުގައި ކަމެވެ. މިއީ ކަންކަމުގައި ކެތްތެރިވާ މީހުންނަށް ލިބޭނޭ ކިހާ ބޮޑު ހިތްވަރެއް ތޯއެވެ. ކަމެއްގައި ކެތްކުރަން ޖެހިއްްޖެނަމަ، ﷲ ގެ މި ވަޙީ ބަސްފުޅުމަތިން ހަނދުމަ ކުރާށެވެ. އަދި އިހުލާސްތެރި ހިތަކާއި އެކު ކެތްކުރާނަމަ، ﷲ އެމީހަކާއި އެކު ވޮޑިގެންވާނޭކަން ހަނދާން ކުރާށެވެ. މިއީ ރޫހާނީގޮތުން އިމާންތެރިކަމުގެ އަގީދާގައި ވަރުގަދަވެގެންދާ ވަރަށް ވަރުގަދަ ހިތްވަރެކެވެ.