ފަރުނީޗަރު އާކޮށް ގޭތެރެ ޒީނަތްތެރި ކުރުމުގެ ބަދަލުގައި ރަމަޞާން މަހާ ބައްދަލުކުރާއިރު ބޮޑު އިސްކަމެއް ދޭންޖެހޭނީ އެމަހުގެ ފުރިހަމަ ދަރުމައާއި ސަވާބު ހާސިލްކުރެވޭނެ ގޮތަކަށް ކަންކަން ރާވައިގެން އެ މައްސަރާ ބައްދަލުކުރުން ކަމަށް ހުތުބާގައި ބުނެފިއެވެ.

"ރަމަޟާން މަހަށް ތައްޔާރުވުން" މި މައުޟޫއަށް ހާއްސަކޮށްގެން ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ހުތުބާގައި ބުނެފައި ވަނީ ރަމަޟާން މައްސަރާ ބައްދަލުކުރަންޖެހޭނީ އަހަރެމެންގެ ހަޔާތުގައި ކުރެވެމުންދާ ކުށްފާފަތަކާ ދުރުހެލިވެ، މުޅިން އައު ހަޔާތަކަށް ބަދަލުކޮށް އިސްލާހު ކުރުމާއެކުގައި ކަމަށެވެ. އަދި މި ބަރަކާތްތެރި މައްސަރުގެ ދުވަސްތަކާއި ކުރިމަތިލާންވާނީ ފުރިހަމަ އީމާންކަމާއެކު އެ މައްސަރުގެ ފުރިހަމަ ދަރުމައާއި ސަވާބު އެދޭ ހާލުގައި ކަމަށެވެ.

އީމާންކަމާއެކު ﷲ ގެ ރަޟްރަތުގައި ދަރުމައާއި ސަވާބަށް އެދި ރަމަޟާން މަހު ރޯދަ ހިފައިފި މީހާގެ އިސްވެގޮސްދައިވާ ފާފަތައް ފުހެވިގެންދާނޭ ކަމަށް ރަސޫލާ (ޞ) ހަދީޡްކުރައްވާފައިވާ ކަމަށްވެސް މިއަދުގެ ހުތުބާގައި ވަނީ ބުނެފައެވެ.

މީގެ އިތުރުން ހުތުބާގައި ބުނެފައިވަނީ ރަމަޟާން މަހަކީ ތަގްވާވެރިކަމަށް ވާސިލުކޮށްދޭ ހުރިހާ ސަބަބުތަކެއް ޖަމާވާ މަތިވެރި މައްސަރެއް ކަމަށެވެ. އަހަރުގެ އެހެން މަސްތަކާ ހިލާފަށް އަޅުކަމުގައި ހީވާގިވެ، ވަރުގަދަ އަޒުމެއްގައި މި މައްސަރާ ކުރިމަތީލާންޖެހޭ ކަމަށްވެސް ހުތުބާގައި ބުނެފައިވެއެވެ.

އެހެންކަމުން އެ މައްސަރަކީ އަޅުކަމާ ދުރުވެ، ހަމައެކަނި ބަނޑުހައި ހޫނުކަމާއި ކަރުހިއްކުން ލިބޭ ދުވަސްވަރަކަށް ވިޔަ ނުދިނުމަށް ހުތުބާގައި ވަނީ އެކި ގޮތްގޮތުން ނަސޭހަތްތެރި ވެފައެވެ.