ދަރިންނަކީ މާތް ﷲ އިންސާނާއަށް ދެއްވާ ވަރަށްވެސް އަގުބޮޑު ނިޢުމަތެކެވެ. ނެތުމުގެ ތެރެއިން، އަންހެނަކާއި ފިރިހެނަކާއި މެދުވެރިކުރައްވާ މި ދުނިޔެއަށް ހަލްޤުކުރައްވާ އެ ދަރިންނަކީ މާތް ﷲ އިންސާނުންނަށް ދެއްވާ އަމާނާތެކެވެ. އެ އަމާނާތަށް އަމާނާތްތެރި ވުމަކީ ހަމަ ކޮންމެ އިންސާނެއްގެ މައްޗަށް އޮތް ވާޖިބެކެވެ. އަދި ދަންނައެވެ. ދަރިންގެ ނިޢުމަތަށް ޝުކުރުވެރިވުންވެސް އޮތީ ހަމަ އެފަދައިންނެވެ.

އިންސާނާއަށް ދަރިއަކު ދެއްވުމުން އަހަރެމެން އެކަމުގެ މައްޗަށް ޝުކުރުވެރިވަމެވެ. މާތް ﷲ ގެ ހަމަ ކޮންމެ ނިޢުމަތަކަށް އަހަރެމެން އިންސާނުން ޝުކުރުވެރިވާން ވާނެއެވެ. ދަރިއަކު ލިބުމުން، އެކަމުގެ މައްޗަށް ޝުކުރުވެރިވާނީ ކިހިނެއް ހެއްޔެވެ؟

ފުރަތަމައީ އެ ދަރިފުޅުގެ ކައިރީގައި ބަންގި ގޮވުމާއި އެކު އެކަމުގެ މައްޗަށް މާތް ﷲ އަށް ހަމްދުކުރުމެވެ. އޭގެ ފަހުގައި ޝުކުރުގެ ސަޖިދައެއް ޖެހިދާނެއެވެ. އަދި ސުންނަތް ނަމާދެއްވެސް ކުރެވިދާނެއެވެ. ދަރިފުޅަށް 7ވަނަ ދުވަސްވާ ދުވަހު އެދަރީގެ ބޯ ބާލާ، އެދަރިއަށް ނަން ކިޔުމުގެ ގޮތުން އަޤީޤާ ކަތިލަންވާނެއެވެ. އަދި އެއިން ޞަދަޤާތް ކުރެވިދާނެއެވެ. މިހުންނަނީ ދަރިއެއް ލިބުމާއި އެކު ޝުކުރުވެރިވުމުގެ ގޮތުން ކުރެވިދާ ކަންކަމެވެ.

ދަންނައެވެ! އެހިސާބަކުން އަދި އެފަދަ ބޮޑު ނިޢުމަތަކަށް ޝުކުރުވެރިވެ ނުނިމޭނެއެވެ. ދަރިއަކު ލިބުމާއި އެކު، އެދަރިއަކަށް އިސްލާމީ ސާފު އަޤީދާ ފޯރުކޮށްދިނުންވެސް ހިމެނިގެންދާނީ އެ ނިޢުމަތަށް ޝުކުރުވެރިވުމުގެ ތެރޭގައެވެ. އެ ދަރިއަކަށް ފޯރުކޮށްދޭން ޖެހޭ ރައްކާތެރިކަމާއި ހިމާޔަތާއި، ލޯތްބާއި އަޅާލުމާއި، އަދި ކުލުނާއި ހަމްދަރުދީވެސް ހިމެނިގެންދާނީ އެ ނިޢުމަތަށް ޝުކުރުވެރިވުމުގެ ތެރޭގައެވެ. ވީއިރު، މިއިން އެއްވެސް ކަމަކަށް އަހަރެމެން މުސްލިމުން ފަރުވާކުޑަކޮށް އިހުމާލު ވެގެން ނުވާނެއެވެ. އެ ދަރީގެ މައިންބަފައިންގެ ނޭވާ ހިނގާގާ ހިނދަކު، އެ ދަރިންނަށްޓަކައި ޝުކުރުވެރިވާން ވާނެއެވެ. ނިޢުމަތްތަކަށް ޝުކުރުވެރި ނުވެވޭނަމަ، އެ ނިޢުމަތްތައް ބީވެގެން ހިނގައިދާނޭކަން އެއީ ޢިލްމުވެރިން އަބަދާއި އަބަދު ދެއްވަމުންދާ ފަތުވާތަކެވެ.

ދަރިއެއްގެ ނިޢުމަތުން މަހުރޫމުވެފައިވާ އެތައް ބަޔަކު އަޅަމެންގެ ތެރޭގައި އުޅެއެވެ. ވީއިރު، އަހަރެމެންނަށް ލިބިފައިވާ ދަރިންނަކީ، އެ ނިޢުމަތަކަށް އަހަރެމެން އިންތިހާއަށް ޝުކުރުވެރިވާން ޖެހޭނޭ ނިޢުމަތެކެވެ. އެއީ ޝުކުރުވެރިވުން ނިމިގެން ނުދާނޭ ނިޢުމަތެކެވެ.