ލައިލަތުލްޤަދްރުގެ ރެއަކީ ކޮންމެ ރަމަޟާން މަހެއްގެ ފަހުދިހައިގެ ރޭތަކުގެ ތެރެއިން ރެއެއްގައި އަންނަ ރެއެކެވެ. އަހަރަކު އެއްފަހަރު، މުސްލިމުންނާއި ބައްދަލުކުރާ މިރެއަކީ އެތައް މުސްލިމުންނެއް އެ ރެއަކަށްޓަކައި އިންތިޒާރުކުރާ ރެއެކެވެ. ނަމަވެސް އެ ރޭގެ ސީދާ ތާރީހެއް ފާޅުވެ ބަޔާން ވެގެނެއް ނުވެއެވެ. އެހެނީ އެރޭ ހޯދުމަށް އިންސާނުން މަސައްކަތް ކުރުމަށްޓަކައެވެ.

އާދޭހެވެ! ލައިލަތުލްޤަދްރުގެ ރޭ، މުސްލިމުންނަށް ހާއްސަވެފާ އެރޭގެ މާތްކަން ބޮޑުވަނީ ކީއްވެ ހެއްޔެވެ؟ އެރޭގެ ވާހަކަ މާތް ﷲ ކީރިތި ޤުރުއާނުގައި ވަނީ ބަޔާންކުރައްވާފައެވެ. އެގޮތުން ޤަދްރުގެ ނަމުން ނަންދެވިފައިވާ ސޫރަތެއް މާތް ﷲ ވަނީ ބާވާލައްވާފައެވެ. އެ ސޫރަތުގައި، ލައިލަތުންޤަދްރުގެ ރޭ މުސްލިމުންނަށް ހާއްސަވެފައި، މާތްވަނީ ކޮން ސަބަބުތަކަކާއި ހުރެކަން ބަޔާންވެގެން ވެއެވެ. އެ ސޫރަތުގައި ވެއެވެ:

﴿1﴾ إِنَّا أَنزَلْنَاهُ فِي لَيْلَةِ الْقَدْرِ 

 ހަމަކަށަވަރުން، ތިމަންރަސްކަލާނގެ އެ قرآن ބާވައިލެއްވީ ليلةالقدر ވިލޭރޭގައެވެ. 

﴿2﴾ وَمَا أَدْرَاكَ مَا لَيْلَةُ الْقَدْرِ 

 އަދި ليلةالقدر ވިލޭރެޔަކީ، ކޮންރެޔެއްކަން ކަލޭގެފާނަށް އަންގައިދިނީ ކޮންއެއްޗެއްތޯއެވެ؟ 

﴿3﴾ لَيْلَةُ الْقَدْرِ خَيْرٌ مِّنْ أَلْفِ شَهْرٍ 

 ليلةالقدر ވިލޭރޭ، އެއްހާސް މައްސަރަށްވުރެ ހެޔޮކަން ބޮޑެވެ. 

﴿4﴾ تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ 

 ملائكة ންނާއި، جبريل ގެފާނު އެބޭކަލުންގެ ވެރިރަސްކަލާނގެ إذن ފުޅާއެކު، ހުރިހާ أمر ފުޅަކާއިގެން އެރޭ ފައިބައިވަޑައިގަންނަވާނެތެވެ. 

﴿5﴾ سَلَامٌ هِيَ حَتَّىٰ مَطْلَعِ الْفَجْرِ 

 އެއީ فجر ގެ އަލިކަން ފާޅުވެއްޖައުމަށްދާންދެން، أمان ކަމާއި، ސަލާމަތްކަން ލިބިގެންވާ ރެޔެކެވެ.

ލައިލަތުލްޤަދްރުގެ ރެއަކީ އެރެއެއްގައި ޤުރުއާން ބާވާލެއްވި ރެއެވެ. އަދި އެއީ އެއްހާސް މައްސަރަށްވުރެ ހެޔޮަކަން ބޮޑު ރެއެއްކަމާއި މަލާއިކަތުންނާއި ޖިބްރީލްގެފާނު، އެރޭގައި، ހުރިހާ އަމުރަކައިގެން ދުނިޔޭގެ ބިމަށް ފައިބާވަޑައިގަންނަވާނޭކަން އެނގެއެވެ. އަދި އެރެއަކީ މުޅިންހެން އަމާންކަން ލިބިގެންވާ ރެއެއްކަން އެނގެއެވެ. މިއީ ހައްތަހާވެސް ލައިލަތުލްޤަދްރުގެ ރޭ މާތްވެ، ހާއްސަވެގެންވާ ސަބަބުތަކެވެ. މިއީ ސީދާ ޤުރުއާނުގައި އެރެއަކީ ކޮން ރެއެއްކަން ބަޔާންކުރައްވާ މާތް ﷲ ބާވާލެއްވި ސޫރަތުގައި އެރޭ ސިފަކުރައްވާފައިވާ ގޮތެވެ.