ރާއްޖޭގެ އެކިކަންކޮޅުތަކަށް ''ރަމަޟާންމަހުގެ ފަހުދިހަ'' މިމައުޟޫއަށް އިއްވި ހުކުރު ޚުތުބާގައި ބުނީ ފަހުދިހައިގެ ދުވަސްތަކަކީ މަތިވެރި ދުވަސްތަކެއް ކަމަށާއި، ބަރަކާތްތެރި ރޭތަކެއް ކަމަށެވެ. އަދި އެ ރޭ ހޯދުމަށް ފަހު ދިހައިގައި ގަދައަޅައި މަސައްކަތް ކުރުމަށް ލޮބުވެތި ރަސޫލާ އިރުޝާދު ދެއްވާފައިވާ ކަމަށާއި، އެއީ ލައިލަތުލްޤަދްރި ގެ ނަމުން ނަންދެވިފައިވާ ބަރަކާތްތެރި ރެއެކެވެ. އަދި އެރޭގެ ހެޔޮކަން ބޭނުންވާ މީހާ ހިތްސާފްކޮށް ބަދަލު ހިފުމުގެ ރޫހު ދޫކޮށްލާ މީހުނަށް މަޢާފް ކުރަންޖެހޭނޭ ކަމަށްވެސް ޚުތުބާގައި ވަނީ ބަޔާންކޮށްފައެވެ.

ރަމަޟާން މަހުގެ ފަހު ދިހައިގެ ދުވަސްތަކުގައި ކީރިތި ރަސޫލާ، އެކަލޭނގެފާނުގެ އަނބިއަނބިކަނބަލުން ފަހު ދިހައިގެ ރޭތައް އިހްޔާ ކުރެއްވުމަށްޓަކައި އަވަހާރަފުޅުން ނެންގެވި ކަމަށާއި، އެކަލޭގެފާނު ވެސް ފަހު ދިހަައިގައި އަޅުކަން ކުރެއްވުމުގައި އެހެން ދުވަސްތަކަށްވުރެ ބޮޑަށް ހީވާގިވެ ވަޑައިގެން ގަދައަޅުއްވާ ހިތްމަތް ކުރެއްވި ކަމަށް ޚުތުބާގައި ވަނީ ފާހަގަކޮށްފައެވެ.

މީގެ އިތުރުން ޚުތުބާގައި ބުނީ ލައިލަތުލްޤަދްރި ވިލޭރެއަކީ އަމާންކަމުގެ ރެއެއް ކަމަށާއި، އެއީ ސުލްހަ މަސަލަސްކަމުގެ ރެއެއް ކަމަށެވެ. އެ ރޭގައި ކޯފާ ލެއްވުމެއް ނުވާ ކަމަށާއި، އަޒާބު ދެއްވުމެއް ނެތް ކަމަށެވެ. އަދި މިއަމާންކަން ފަތިސްވެއްޖައުމަށް ދާންދެން މި ބިމުގައި އޮންނާނެކަމަށް ޚުތުބާގައި ބުނެފައިވެއެވެ.

ލައިލަތުލްޤަދްރި ވަންހަނާ ކުރައްވާފައިވާކަން ފާހަގަކޮށް ޚުތުބާގައި ބުނީ އެކަމުގެ ސިއްރަކީ އެކަމަށް ޝައުގުވެރި ކުރެއްވުން ކަމަށާއި އަދި އެއީ ރަމަޟާން މަހުގައިވާ ރެއެއްކަން ކަށަވަރު ކޮށްދެއްވި ކަމަށްވެސް ޚުތުބާގައި ވަނީ ބުނެފައެވެ. އަދި އެރޭ ވަނީ ރަމަޟާން މަހުގެ ފަހު ދިހައިގެ އޮނަހިރި ރެއްގައި ކަމަށް ވެސް އިޝާރާތް ކުރެއްވާފައިވާ ކަމަށާއި އަދި ލައިލަތުލްޤަދްރި ވިލޭރޭގެ އިޙްތިފާލުތަކުގައި މަލާއިކަތްބޭކަލުން ބައިވެރިވެޑައި ގަންނަވާނެ ކަމަށްވެސް ޚތުބާގައި ފާހަގަކުރިއެވެ.

މީގެ އިތުރުން ޚުތުބާގައި ވަނީ ފިތުރުޒަކާތް ދެއްކުމަށާއި، ހަރޯދަ ހިފުމަށް ހަނދުމަކޮށްދީފައެވެ. ފިތުރުޒަކާތަކީ ފަގީރުންނަށް ތަނަވަސް ކޮށްދިނުމާއި އެމީހުންގެ ބޭނުންތައް ފުއްދައި ދިނުމަށްޓަކައި ދިއްކޮށްލެވޭ އެހީގެ އަތެއް ކަމަށް ޚުތުބާގައި ބުނެފައިވެއެވެ. އަދި ރަމަޟާން މަހު ރޯދަ ހިފުމަށްފަހު ޝައްވާލުމަހު އިތުރު ހަ ދުވަހު ރޯދަ ހިފުމުން ތިން ސަތޭކަ ފަސްދޮޅަސް ހެޔޮކަން ލިބޭނެ ކަމަށާއި، އެއީ މުޅި އަހަރުގެ ދުވަސް ރޯދަހިފުން ފަދަ ކަމެއްކަމަށް ޚުތުބާގައި ވަނީ އިޝާރާތްކޮށްފައެވެ.