އަހަރެމެންގެ ދިރިއުޅުމުގެ ވައްޓްފާޅީގައި، އަވަހަށް ނިދުމަކީ މިހާރު މާ މުހިއްމު ކަމެއް ދީގެން ކޮށް އުޅޭ ކަމެއް ނޫނޭ ބުނެވިދާނެއެވެ. ނަމަވެސް ހެނދުނަށް ކޮންމެވެސް ކަމަކާ ހޭލަން ޖެހޭ ނަމަ އަވަހަށް ނިދަން ހަނދާން ހުރެއެވެ. ދަރިން ލައްވާވެސް އަވަހަށް ނިދަން އާދަކޮށްދެނީ މިގޮތަށް، ހެނދުނަށް އަވަހަށް ހޭލަން ޖެހޭ ދުވަހަކު އެކަންޏެވެ.

އާއްމު ގޮތެއްގައި ހެނދުނާ ސުކޫލަށް ދާން ޖެހޭތީ، ދަރިން އަވަހަށް ނިންދަވަން ކޮންމެ މަޔަކުވެސް އުޅެއެވެ. ހެނދުނާ ރަށަށް ދާތީ، ނުވަތަ ޕިކުނިކު ދާތީ ނުވަތަ މޫދަށް، ކުޅެން ދާން ޖެހޭތީ ދަރިން އަވަހަށް ނިންދަވަން މައިމް ނިކަން މަސައްކަތް ކުރެއެވެ. އަވަހަށް ނިދުމުގެ ރީތި އާދަ އަށަގަންނުވަން މިއީ ރަނގަޅު ކަމެކެވެ. ނަމަވެސް އަވަހަށް ނިދަން އާދަކުރަންވީ ވަކި ކަންކަމެއް ތާވަލުވެފައި އޮތީތީހެއްޔެވެ؟

ނޫނެކެވެ. ދަރިން ތަރުބިއްޔަތުކޮށް، އަހުލާގާ އުޅުމުގެ ރީތި ސިފަތައް ދަސްކޮށްދީ ބުނެދޭއިރު، އަވަހަށް ނިދަން ދަސްކޮށްދޭންވީ ނުވަތަ އާދަކޮށްދެންވީ ވަކި ދުވަހެއް ބަލާފައެއް ނޫނެވެ. އެހެނީ އަހަރެމެންނީ މުސްލިމުން ކަމުގައި ވީހިނދު، ފަރުޟު ފަސް ނަމާދުގެ ތެރެއިން ފަތިސްނަމާދަކީ ފަތިހާ ކުރަން އޮންނަ ނަމާދެކެވެ. އެ ނަމާދު ކުރަން ޖެހޭނެތީ ފަތިހަށް ހޭލަން ޖެހޭނެތީ، އަވަހަށް ނިދަން އަހަރެމެންގެ ދަރިންނަށް ނަސޭހަތްތެރިވެވެނީ އަހަރެމެންގެ ތެރެއިން ކިތައްކިތައް މައިންނަށް ތޯއެވެ. 

އާދޭހެވެ! ފަހަރުގައި އެކުދިންގެ އުމުރުގެ ގޮތުން ނަމާދު ވާޖިބުވާ އުމުރަށް އެކުދިން ނުފޯރަފާނެއެވެ. ނަމަވެސް އެ އުމުރާ ހަމައަށް އެކުއްޖާ ފޯރާއިރު، ފަތިހާ ތެދުވަން، އަވަހަށް ނިދުމުގެ އާދަ، އާދަ އަކަށްވެފައިވާނަމަ، އެއީ ކުރަން މާ އުނދަގޫ ކަމެއް ނޫނެވެ. އަޅުގަނޑުމެންނަށް މި ފެންނަނީ ބޮޑެތި މީހުންނަށްވެސް ފަތިސްނަމާދު ކޮށްލާނޭ ވަގުތު ހުއްޓާ ނިދާ ނުހޭލެވޭތަނެވެ. މިއީ ހިތާމަ ހުރި ކަމެކެވެ.

އެނގޭހެއްޔެވެ! ދުނިޔެމަތީގައި ކިޔޭ އެއްމެ މޮޅު "ގުޑް މޯނިން" އަކީ ފަތިސް ނަމާދެވެ! އެއީ މުޅި ދުވަހުގެ ކާމިޔާބީއެވެ. އެއީ މުޅި ދުވަހުގެ އަމާން ކަމެވެ. އެއީ މުޅި ދުވަހުގެ ފަސޭހަ ކަމެވެ. ވީ އިރު، ފަތިސްނަމާދަށް ހޭލަން ޖެހޭނެތީ، އަވަހަށް ނިދުން ނުވަތަ ނިދުމަށް އާދަކޮށްދިނުން ކީއްވާނެތޯއެވެ. 

އަހަރެމެންގެ ގިނަ ބަޔަކު ފަތިސްނަމާދު އަޅަނީ ހަމަ އާދައިގެ ކަމެއް ކަމުގައި ދެކިގެންނެވެ. ބޮޑެތި މީހުންގެ މި ނުބައި އާދައިގެ ސަބަބުން، ބޮޑެތިވަމުން އަންނަ ކުދިންނަށް، ފަތިސް ނަމާދަކީ އޮންނަ ނަމާދެއްކަންވެސް އިހުސާސްކުރަން ދަތިވެއެވެ. ފަތިސްނަމާދާމެދު އަހަރެމެން މިހާ ފަރުވާކުޑަ ކުރާއިރު، އަހަރެމެންގެ ކިބައިން ނަމޫނާ ލިބިގަންނަ ދަރީން ދަސްކުރާނީ ކޮން އެއްޗެއް ތޯއެވެ.

އޭ ލޮބުވެތި މައިންބަފައިންނެވެ. ބެލެނިވެރިންނެވެ. ދަރިން އަވަހަށް ނިންދަވަންވީ، ސުކޫލަން ދާން ޖެހޭތީކީއެއް ނޫނެވެ. ދަތުރުދާން މޫދަށް ދާން ޖެހޭތީކީއެއްވެސް ނޫނެވެ. އަވަހަށް ދަރިން ނިންދެވުމުގެ މައިގަނޑު ސަބަބީ ފަތިސްނަމާދު ކުރާނެ ވަގުތު ހުއްޓާ އެކުދިން ހޭލަން އާދަ ކުރުމެވެ. އިސްލާމީ މުޖުމަތަމެއްގައި މިކަން އޮންނަން ވާނީ މިހެންނެވެ.