އިންސާނުންނައްޓަކައި މާތް ﷲ ވަނީ ތަފާތު ނިޢުމަތްތައް ލައްވާފައެވެ. ތަފާތު އެކި ގޮތްގޮތުން އެކަލާންގެ އަހަރެމެން އިންސާނުންނަށް ނިޢުމަތް ދެއްވައެވެ. މިއިން ހަމަ ކޮންމެ ނިޢުމަތަކަށް، އެކަލާންގެ ހަޟްރަތަށް ޝުކުރުވެރިވުން އެއީ މި އިންސާނާއަށް އޮތް މަތިވެރި ވާޖިބެކެވެ.

މާތް ﷲ ކީރިތި ޤުރުއާނުގައި ވާރޭ ފެނުގެ ވާހަކަ ބަޔާން ކުރައްވާފައި ވެއެވެ. އެފެނަކީ އުޑުން މާތް ﷲ ބާވައިލައްވަވާ ފެނެއްކަމަށް އިޝާރާތް ކުރައްވާ، އަދި އެ ފެނަކީ އޭގައި ދިރުމެއް ވާ ފެނެއްކަމުގައި ބަޔާން ކުރައްވާ މާތް ﷲ ވަޙީ ކުރައްވަނީ މިފަދައިންނެވެ.

﴿65﴾ وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَةً لِّقَوْمٍ يَسْمَعُونَ. މާނައީ: اللَّه، އުޑުން ފެން ބާވައިލެއްވިއެވެ. ފަހެ، ބިންގަނޑު މަރުވެ އޮތުމަށްފަހު، އެ ފެނުގެ ސަބަބުން، އެކަލާނގެ އެ ބިންގަނޑު ދިރުއްވިއެވެ. ހަމަކަށަވަރުން، އަޑުއަހާ ބަޔަކަށް، އެކަމުގައި ހެތްކެއްވާކަން ކަށަވަރެވެ. (އަންނަޙްލް 65 ވަނަ އާޔަތް)

އާދޭހެވެ! މިއާޔަތުގެ މާނައިގައި އިތުރަށް ސާފުވާންވީ ކަމެއް ނެތެވެ. ސާފުކޮށް އެނގޭ ގޮތުގައި މާތް ﷲ އުޑުން ބާވައިލައްވާ މި ފެނުގެ ސަބަބުން، މަރުވެފައިވާ ބިންތަކަށް ދިރުން ލިބިދޭކަން އެނގެއެވެ. އަދި މިކަންކަމުގައި ﷲ ގެ ކުޅަދުންވަންތަ ކަމުގެ ހެކިތަކެއް ވާކަން އެނގޭނީ އެކަންކަމާމެދު ވިސްނާ ބަޔަކަށް ކަންވެސް އެނގެއެވެ.

އިޑުން ބާވައިލައްވާ ފެނުގެ ވާހަކަ މާތް ﷲ އެހެން އާޔަތެއްގައި ބަޔާން ކުރައްވަނީ އެއީ އިންސާނާ ޠާހިރު ކުރެއްވުމަށާއި ވަސްވާހުން ދުރުކުރެއްވުމަށާއި އަދި ހިތްތަކަށް ގަދަކަން ދެއްވުމަށާއި ފައިތިލަތަށް ސާބިތު ކުރެއްވުމަށް ބާވައިލައްވާ ފެނެއްގެ ގޮތުގައެވެ. އެގޮތުން މާތް ﷲ ވަޙީކުރައްވަނީ މިފަދައިންނެވެ.

﴿11﴾ إِذْ يُغَشِّيكُمُ النُّعَاسَ أَمَنَةً مِّنْهُ وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَامَ. މާނައީ: އެކަލާނގެ حضرة ން އައި أمان ކަމެއްގެ ގޮތުގައި ނިދިޖެހުން ތިޔަބައިމީހުންގެ މައްޗަށް އެކަލާނގެ ފޮނުއްވައި، އަދި އެކަލާނގެ ތިޔަބައިމީހުން طاهر ކުރެއްވުމަށާއި، شيطان އާގެ ވަސްވާސް ތިޔަބައިމީހުންގެ ކިބައިން ފިއްލެވުމަށާއި، ތިޔަބައިމީހުންގެ ހިތްތަކަށް ގަދަކަން ދެއްވުމަށާއި، (ތިޔަބައިމީހުންގެ) ފައިތިލަތައް ސާބިތު ކުރެއްވުމަށްޓަކައި، ތިޔަބައިމީހުންގެ މައްޗަށް އުޑުން ފެން ބާވައިލެއްވިހިނދު، ހަނދުމަކުރާށެވެ! (އަލް އަންފާލް 11 ވަނަ އާޔަތް)

އުޑުން މާތް ﷲ ބާވައިލައްވާ މި ފެނަކީ ވަރަށްވެސް މަތިވެރި ނިޢުމަތެކެވެ. މަރުވެފައިވާ ބިންތައް އެފެނުން ދިރޭ ފެނެކެވެ. އަދި މިއީ އިންސާނާ ޠާހިރު ވުމަށާއި ވަސްވާހުން ދުރުކުރެއްވުމަށާއި އަދި ހިތްތަކަށް ގަދަކަން ދެއްވުމަށާއި ފައިތިލަތަށް ސާބިތު ކުރެއްވުމަށް ވާ ފެނެކެވެ. އުޑުން ބާވައިލައްވާ ވާރޭފެނުގެ މި ނިޢުމަތަށް ޝުކުރުވެރިވަމާތޯއެވެ. އެ ފެނުން އިސްރާފު ނުކުރަމާތޯއެވެ. އަދި ވާރޭ ވެހޭހިނދު، ދުޢާ ކިޔުންފަދަ ކަންކަމަށް ސަމާލުކަން ދެމާތޯއެވެ. މާތް ﷲ އީ އެކަލާންގެ ޙަލްޤުތަކުންނަށް އޯގާވަންތަ އިލާހެވެ!