ހަފްތާއެއްގެ ދުވަސްތަކުގެ ތެރެއިން ދުވަހުގެ ގޮތުން އެއްމެ މާތް ދުވަހަކީ ހުކުރު ދުވަހެވެ. އެ ދުވަހަކީ އެ ދުވަހަށް ހާއްސަ ނަމާދެއް ވާ ދުވަހެކެވެ. ދެ ރަކުޢަތުގެ މި ނަމާދަކީ، އެ ނަމާދުގެ ކުރިން ޚުތުބާއެއް އިއްވާ ނަމާދެކެވެ. މި ނަމާދުގެ ފުރިހަމަ ޘަވާބާއި ދަރުމަ ލިބުން ވަނީ، ޚުތުބާވެސް އަޑު އަހައިފި މީހަކަށެވެ.

ކަންއޮތީ މިހެން ނަމަވެސް، ހުކުރު ނަމާދަށް ދިއުމުގައި އަދުގެ ގިނަ ބަޔަކު ފަރުވާ ކުޑަކޮށްފިއެވެ. ހުކުރު ނަމާދަށް، ލަހުން ދިއުމަކީ ފަހުރެއް ނުވަތަ ޝަރަފެއް ކަމުގައި ދެކެން ފަށައިފިއެވެ. ޚުތުބާ ކިޔާ ވަގުތު، މަގުތައްމަތީ، ތެމިގެން (މޫދަށް އެރިގެން) އުޅުން އެއީ ފެޝަނެއް ކަމުގައި ވެއްޖެއެވެ. ޚުތުބާ ކިޔާ ވަގުތު، މިސްކިތް ދޮރު ހުރަސްކޮށް، ކުރު ސޯޓުބުރިތަކުގައި ހިނގާފައި ނުވަތަ ސައިކަލު ތަކުގައި ދިއުން އެއީ އުފަލެއް ކަމުގައި ގިނަ ޒުވާނުން ދެކެން ފަށައިފިއެވެ.

ހުކުރު ނަމާދަށް އައިސް މިސްކިތަށް ނުވަދެ، މިސްކިތުގެ ބޭރުގައި ޖަމާއަތް ހަދައިގެ ދުނިޔެވީ ވާހަކަތަކުގައި ތިބެއެވެ. ޚުތުބާ އަޑު އެހުމުގެ ޝައުގެއް ނުހުރެއެވެ. މިސްކިތުގެ ތެރެއަށް ވަންނަނީ ހުކުރު ނަމާދުގެ ޖަމާއަތަށް ގޮވުމުންނެވެ. ސަފަށް އަރަން ހުންނަނީ އެއްމެ ލަހުންނެވެ. ބަލަން ހުންނަ މީހަކަށް، އެ ބައިމީހު ނަމާދަށް ޝައުގުވެރިކަން ނުހުންނަހެން ހީވާ ކަހަލައެވެ.

ހުކުރު ނަމާދާއި ބެހޭ ގޮތުން، ކީރިތި ޤުރުއާނުގައި މާތް ﷲ ވަޙީ ކުރައްވާފައި ވެއެވެ. ﴿9﴾ يَا أَيُّهَا الَّذِينَ آمَنُوا إِذَا نُودِيَ لِلصَّلَاةِ مِن يَوْمِ الْجُمُعَةِ فَاسْعَوْا إِلَىٰ ذِكْرِ اللَّهِ وَذَرُوا الْبَيْعَ ۚ ذَٰلِكُمْ خَيْرٌ لَّكُمْ إِن كُنتُمْ تَعْلَمُونَ. މާނައި: އޭ إيمان ވެއްޖެ މީސްތަކުންނޭވެ! ހުކުރުދުވަހު (ހުކުރު) ނަމާދަށް ގޮވައިލާހިނދު ފަހެ، اللَّه ހަނދުމަކުރުމަށް (އެބަހީ: خطبة އަޑުއެހުމާއި، ނަމާދަށް) ތިޔަބައިމީހުން ހިނގައިގަންނާށެވެ! އަދި ވިޔަފާރިކުރުން ހުއްޓައިލާށެވެ! ތިޔަބައިމީހުން ދަންނަކަމުގައިވާނަމަ، އެގޮތް ތިޔަބައިމީހުންނަށް ހެޔޮކަން ބޮޑެވެ. (އަލް ޖުމްޢަ 9 ވަނަ އާޔަތް)

ކަން މިހެން ހުރުމުން، ހުކުރުނަމާދަށް ލަހުން ދާން އެ ތިބޭ ޒުވާނުންނަކީ މި އާޔަތުގައި އެ ބަޔާންކުރައްވާ ހެޔޮކަން ބޮޑުކަން ނުދަންނަ މީހުންނެވެ. އެހެނީ އެކަން އެމަގުން ދަންނަ ނަމަ، ޚުތުބާ އަޑު އެހުމަށާއި އެއްކޮށް، އަވަހަށް މިސްކިތަށް ދާނެއެވެ.

އާދޭހެވެ! ނޭނގުމަށްވުރެ ބޮޑު ނިކަމެތިކަމެއް ވަކި ކޮބާ ހެއްޔެވެ؟ ހުކުރު ނަމާދަށް ލަހުން ދާން ތިބޭ މީހުންނަށް މި އާޔަތް ދައްކާށެވެ. މި އާޔަތާއި މެދު އެބައިމީހުން ފުންކޮށް ވިސްނުމުގެ ފުރުސަތު ދޭށެވެ. ހުކުރަށް ލަހުން ދިއުން ފެޝަނަކަށް ހަދައިގެން، ގިނަ ޒުވާނުން މި އުޅެނީ މާތް ﷲ ގެ ކުރިފުޅުމަތީ، މި ދުނިޔޭގައިވެސް ފޮނިކަނޑަން ހެއްޔެވެ؟ އެބައިމީހުންނަށް ނޭނގެނީއެވެ. މާތް ﷲ އީ ހުރިހާ ކަމެއް މޮޅަށް ދެނެވޮޑިގެންވާ އިލާހެވެ! އަދި އެކަލާންގެއީ އަޅުތަކުންގެ އަމަލުތަކަށް ޖަޒާ ދެއްވާ އިލާހުވެސް މެއެވެ!