ތައުބާވާމީހާ އޭނާގެ ހިތުގެ އަޑިން ﷲ ގެ ފުއްސެވުމަށް އެދެންޖެހޭނެކަމަށް މިއަދުގެ ޚުތުބާގައި ބުނެފިއެވެ.

''ތައުބާގެ އަހައްމިއްޔަތާއި އޭގެ ދައުރު'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އިންސާނާ، އޭނާގެ އިއްޔެއަށްވުރެ އޭނާގެ މިއަދު ހެޔޮ ދުވަހަކަށް ހެދުމަށް ގަދައަޅައި މަސައްކަތް ކުރާނެ ކަމަށާއި، މިއަދަށްވުރެ މާދަމާގެ ހެޔޮކަން އިތުރުކުރުމަށް ދަހިވެތިވާނެ ކަމަށެވެ.

ޚުތުބާގައި ބުނީ، މީހެއްގެ ހިތުގައި މާތް ﷲ އަށް ބިރުވެތިވުން އަށަގެންފައިވާނަމަ އޭނާ އެކަލާނގެ މަނާކުރައްވާފައިވާ ކަމަކަށް އަރައެއް ނުގަންނާނެ ކަމަށެވެ. އަދި ތައުބާވުން ލަސްކުރުމަކީ ޝައިތާނާގެ ވަސްވާހުގެ ތެރޭގައި ހިމެނޭ ކަމެއް ކަމަށެވެ. އަދި ތިބާގެ ކުރިމަތީގައި އަދި ވަގުތު އެބައޮތް ކަމަށް ވިސްނައިދޭ ކަމަށާއި، ބައެއް ފަހަރު ޝައިތާނާ ވަސްވާސްދީ މާޔޫސް ވެސް ކޮށްލާކަމަށެވެ. ނަމަވެސް މާތް ﷲ ގެ ރަހުމަތުން އުންމީދު ކަނޑާލައިގެން ނުވާނެ ކަމަށާއި، ފާފައެއް ކުރެވޭއިރު އެކަމަކަށް ދެރަވެ، މާތް ﷲ ގެ މަގަށް އެނބުރި ރުޖޫއަވެ ތައުބާވުމަށް ޚުތުބާގައި ގޮވާލާފައިވެއެވެ.

ކީރިތި ޤުރުއާނުގައި ބަޔާން ކުރައްވާފައިވާ ގޮތުގައި ތެދުވެރި މުއުމިނަކީ އޭނާއަށް ކުރެވޭ ކުށްތަކުގެ މަތީގައި ދެމި ހުންނާނެ މީހެއް ނޫންކަން ފާހަގަކޮށް ޚުތުބާގައި ބުނީ، ތިން ކަމަކަށް ކޮންމެ މުސްލިމެއްގެ މައްޗަށް ވެސް ތައުބާވުން ވާޖިބުވެގެންވާ ކަމަށެވެ.

ޚުތުބާގައި ބުނީ، އާދަމުދަރިޔާގެ ވަށައިގެން އެތައް ދުޝްމަނުންތަކެއްވާ ކަމަށާއި، މި ދުޝްމަނުން ހަޑިހުތުރު އަމަލުތައް ޒީނަތްތެރިކޮށްދޭ ކަމަށެވެ. އަދި ރިވެތި އަމަލުތައް ހުތުރުކޮށްދޭއިރު، ނުބައިވެގެންވާ އަމަލުތަކަށް ދަލުގައި ޖައްސަން މަސައްކަތް ކުރާ ކަމަށް ޚުތުބާގައި ބުނެފައިވެއެވެ. މި ފަދަ ދަޅަތަކަށް ހެއްލުންތެރިވެގެން އުޚްރަވީ ހަޔާތް ކާމިޔާބެއް ނުކުރެވޭނެ ކަމަށާއި، ތައުބާވުން ލަސްކޮށްގެން ސަލާމަތްތެރިކަން ނުލިބޭނެ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ، ތައުބާވާމީހާ އޭނާގެ ހިތުގެ އަޑިން ﷲ ގެ ފުއްސެވުމަށް އެދެންޖެހޭނެ ކަމަށާއި، އަދި އެ ފާފަތަކަށް އެނބުރި ނުދިޔުމަށް އަޒުމް ކަނޑައަޅަންޖެހޭ ކަމަށެވެ. އަދި ތެދުވެރި އަޒުމަކާ އިހްލާސްތެރި ތައުބާއަކާއެކު ކުރިމަތިލާނަމަ ތިބާގެ ހިތަށް މާތް ﷲ ހިތްހަމަޖެހުން ވައްދަވާނެ ކަމަށް ޚުތުބާގައި ބުނެފައިވެއެވެ. އޭރުން ތިބާގެ ކުރިމަތީގައި އުންމީދުގެ ދޮރުތައް މާތް ﷲ ހުޅުއްވައި ދެއްވާނެ ކަމަށާއި، އޭރުން ތިބާގެ ނަފްސަށް އަލުން އިތުބާރު ލިބޭނެ ކަމަށެވެ. އަދި ތިބާއަށް ސީދާވެގެންވާ މިސްރާބު ހިފި، ތިބާއަށް އަމާންކަމާއެކު މިދުނިޔޭގައި ދަތުރުކޮށް އުޚްރަވީ މަންޒިލަށް ދެވޭނެ ކަމަށް ޚުތުބާގައި ބުނެފައިވެއެވެ.