މި ދުނިޔޭގައި ވާހާ ކަމަކާއި ތަކެއްޗެއް މާތް ﷲ ހައްދަވާފައި ވަނީ އިންސާނުންނަށް ޓަކައެވެ. އެއިން ކޮންމެ ނިޢުމަތެއް އިންސާނާއަށް އަދަދު ނުކުރެވޭހާ ގޮތްގޮތުން ބޭނުންތެރިއެވެ. އެގޮތުން ދުނިޔޭގެ ބިމުގައި އެކި ދަރަޖަ ދަރަޖައިގާ ވާ ފަރުބަދަތަކާއި މެދު ވިސްނާލަމާތޯއެވެ. އެދި ވަރުވަރުން އެކި ހިސާބުތަކުގައި ފަރުބަދަތައް ވެއެވެ. މި ފަރުބަދަ ތަކުގެ ބޭނުމަކީ ދުނިޔޭގެ ބިން ހަރުލައްވާ ހިފެހެެއްޓުމެވެ. ސައިންސުވެރިންގެ ދިރާސާތަކާއި ހޯދުންތަކުގެ މާ ކުރިން، މާތް ﷲ ވަނީ ކީރިތި ޤުރުއާނުގައި މިކަމަށް އިޝާރާތް ކުރައްވާ ބަސްފުޅު ވަޙީ ކުރައްވާފައެވެ. އެގޮތުން ކީރިތި ޤުރުއާނުގެ އެތައް ތަނެެއްގައި ފަރުބަދަ ތަކުގެ ވާހަކަ އައިސްފައި ވެއެވެ.

﴿19﴾ وَالْأَرْضَ مَدَدْنَاهَا وَأَلْقَيْنَا فِيهَا رَوَاسِيَ وَأَنبَتْنَا فِيهَا مِن كُلِّ شَيْءٍ مَّوْزُونٍ. މާނައީ: އަދި ތިމަންރަސްކަލާނގެ ބިން ފެތުރުއްވީމެވެ. އަދި ހަރުލައި ހުންނަ ފަރުބަދަތައް، އެ ބިމުގައި ލެއްވީމެވެ. އަދި މިންވަރު ކަނޑައެޅި އެނގިގެންވާ ކޮންމެ އެއްޗެއް، އެ ބިމުން ތިމަންރަސްކަލާނގެ ފެޅުއްވީމެވެ. (އަލް ޙިޖްރު 19 ވަނަ އާޔަތް)

﴿31﴾ وَجَعَلْنَا فِي الْأَرْضِ رَوَاسِيَ أَن تَمِيدَ بِهِمْ وَجَعَلْنَا فِيهَا فِجَاجًا سُبُلًا لَّعَلَّهُمْ يَهْتَدُونَ. މާނައީ: އަދި އެއުރެންނާއިގެން އެ ބިން، ތެޅިފޮޅިގެންފާނެ ކަމަށްޓަކައި، ހަރުލައި ހުންނަ ފަރުބަދަތައް، ތިމަންރަސްކަލާނގެ ބިމުގައި ލެއްވީމެވެ. އަދި އެ ބިމުގައި، ބޮޑެތި ތަނަވަސް މަގުތައް ލެއްވީމެވެ. (އެއީ) އެއުރެންނަށް މަގު އެނގުމަށްޓަކެވެ. (އަލް އަންބިޔާ 31 ވަނަ އާޔަތް)

﴿7﴾ وَالْجِبَالَ أَوْتَادًا. މާނައީ: އަދި (ބިން ހިފެހެއްޓުމަށްވާ) ކަޑަތަކެއް ކަމުގައި، ތިމަންރަސްކަލާނގެ ފަރުބަދަތައް ނުލައްވަންހެއްޔެވެ؟ (އަންނަބާ 7 ވަނަ އާޔަތް)

﴿32﴾ وَالْجِبَالَ أَرْسَاهَا. މާނައީ: އަދި ފަރުބަދަތައް (އެ ބިމުގައި) ހަރުލެއްވިއެވެ. (އަންނާޒިޢާ 32 ވަނަ އާޔަތް)

މި އާޔަތްތަކުން އެނގި ހާމަވާގޮތުގައި ދުނިޔޭގެ ބިން ފެތުރި، ހަރުލާ ހުރުމުގެ ސިއްރަކީ ފަރުބަދަ ތަކެވެ. މިއީ ސައިންސުވެރިން އަދި މާ ފަހުން ހޯދި ސައިންޓިފިކް ހެކިތަކެވެ. އޭގެ އެތައް ސަތޭކަ އަހަރެއް ކުރިން އެތައް ތަނެއްގައި މާތް ﷲ މި ވަނީ މި ހިކުމަތުގެ ވާހަކަ ބަޔާން ކުރައްވާފައެވެ. 

އާދޭހެވެ! މިކަންކަމުގައި ވިސްނާ ފިކުރު ކުރާ ބަޔަކަށް ނޫނީ އިބުރަތެއްވެސް ލިބުމެއް ނެތެވެ. ބޮޑެތި ބިޔަ ފަރުބަދަ ތަކުން ފެށިގެން ކުދިކުދި ފަރުބަދަތައް މާތް ﷲ ލައްވާފައި ވަނީ ދުނިޔޭގެ ބިން ހަރުލެެއްވުމަށާއި މީސްތަކުންނަށް ދުނިޔޭގެ ބިމުގައި ހިނގާބިގާވެ އުޅުމުގައި ނިޔަމިކަން ކުރުމަށް ފަސޭހައަކަށެވެ. މާތް ﷲ ގެ ކުޅަދުންވަންތަ ކަމާއެވެ.