ސިއްރިޔާތުގައި މާތް ﷲ އަށް ބިރުވެތިވާ އަޅުންނަށް އެކަލާނގެ ވަނީ މަތިވެރި ދަރުމަ އާއި ޘަވާބު ތައްޔާރު ކުރައްވައިފައެވެ. ހަޤީޤީ ތެދުވެރި މުއުމިނުންނަކީ އެއީ އެވެ. އެބައިމީހުންގެ ޢަމަލުތައް ސިއްރާއި ފާޅުގައި ތަފާތެއް ނުވާނެއެވެ. އެބައިމީހުން ކިޔަމަންތެރިކަމާ އެކު މާތް ﷲ އަށް އަޅުކަންކުރާނެ އެވެ. އެ މީހުންނަށް ފާފަ ފުއްސަވައި ބޮޑުވެގެންވާ އަޖުރު ދެއްވާނޭ ކަމަށް އެކަލާނގެ ވަނީ ވަޢުދުވެވޮޑިގެންފައެވެ. މާތް ﷲ ވަޙީކުރެއްވި ބަސްފުޅެއްގެ މާނައިގައި ވެއެވެ. "ހަމަކަށަވަރުން، ނުފެންނަ ތާނގައި އެއުރެންގެ ވެރިރަސްކަލާނގެއަށް ބިރުވެތިވާ މީހުން (ދަންނާށެވެ!) ފާފަ ފުއްސެވުމާއި، ބޮޑުވެގެންވާ ދަރުމަ، އެ މީހުންނަށް ހުއްޓެވެ." (މުލްކު: 12)

އެއާ ޚިލާފަށް މީސްތަކުންގެ ކުރިމަތީ ލަދުވެތިވެ، ފާފައިން އެއްކިބާވެ ތިބެ، އެހެނަސް ސިއްރިޔާތުގައި ފާފަކުރާ މީހުންނަށް މާތްﷲ ވަނީ ފާޑު ވިދާޅުވެ ކީރިތި ޤުރުއާނުގައި ބަސްފުޅު ވަޙީކުރައްވައިފައެވެ. އެފަދަ މީހުންނާ ބެހޭގޮތުން ކީރިތި ނަބިއްޔާ މުޙައްމަދުގެފާނު  ހަދީޘްކުރައްވައިފައި ވަނީ، ފަރުބަދައެއްހާ ގިނަ ހެޔޮކަން ހިފައިގެން ޤިޔާމަތް ދުވަހު ބަޔަކު އަންނާނޭ ކަމެވެ. ނަމަވެސް ބުރުވައިލެވިފައިވާ ކުނޑިތަކެއް ކަމުގައި މެނުވީ މާތް ﷲ އެއުރެންގެ ޢަމަލުތައް ނުލައްވާނެތެވެ. އަދި ހަމަ އެބައިމީހުންނަކީ ހެޔޮ ޢަމަލުކޮށް އުޅުނު މީހުން ކަމަށާއި، ނަމަވެސް އެކަހެރި ޙާލުގައި މާތްﷲ ޙަރާމްކުރެއްވި ކަންކަމަށް އަރައިގަންނަ މީހުން ކަމެވެ. ބިރުވެރި ޙަދީޘްފުޅެކެވެ. ޢިލްމުވެރިން ވިދާޅުވާ ގޮތުގައި މި ޙަދީޘްފުޅުގެ މުރާދަކީ ނިފާޤުކަމާއި ދެއްކުންތެރިކަމާ އެކު ހެޔޮ ޢަމަލުކުރާ މީހުންނެވެ. 

މީސްތަކުން ކުރިމަތީ އެބައިމީހުންނަކީ ތަޤްވާވެރިން ކަމުގައި ދައްކައެވެ. ސިއްރިޔާތުގައި އެބައިމީހުންގެ ޙަޤީޤަތް ފާޅުވެއެވެ. މާތްﷲ އަށް ދޭން ޖެހޭ ޤަދަރު އެބައިމީހުން ނުދެއެވެ. މި ޙަދީޘްފުޅުގައި އޮތް ވަޢީދުގެ ތެރެއަށް އަޅުގަނޑުމެން ވަދެދާނެތީ ބިރުވެތިވާން ޖެހެއެވެ.

މާތްﷲ އަށް ދޭން ޖެހޭ ޙައްޤު ޤަދަރު ނުދެވޭ ނަމަ ފާފަތަކަށް އަރައިގަނެވި، ހިތުގައި ލައް ޖެހެމުންގޮސް ޙައްޤާއި ބާޠިލު ވަކިނުވާ ހިސާބަށް ހިނގައިދާނެއެވެ. އަދި ފާފައަށް ދެވިހިފައި ފާފަ ދޫކޮށްލުމަށް އުނދަގޫވެ ނާއުމީދުވެދާނެއެވެ. ކުރެވޭ ފާފައަށް އެއްވެސް ދެރައެއް ހިތާމައެއް އެ ހިތަކަށް ނުވަންނާނެ އެވެ. މިހެންދަމުންގޮސް ހިތް މުޅީން މަރުވެ ތައުބާވާން ބޭނުން ވެސް ނުވެދާނެއެވެ.

މީގެ އިތުރުން ސިއްރިޔާތުގައި ކުރެވޭ ފާފައިގެ ސަބަބުން ތެދުމަގުން ކައްސާލައި ނުބައި ނިމުމަކުން މަރުވެގެންދެއެވެ. އިބުނުލް ޤައްޔިމް ރަހިމަތްﷲ ވިދާޅުވި ބަސްފުޅެއްގެ މާނައިގައި ވެއެވެ. "ޢިލްމުވެރިން އިއްތިފާގުވާ ގޮތުގައި ސިއްރިޔާތުގައި ނުބައި ޢަމަލުކުރުމަކީ މަގު ގެއްލިގެން ދިއުމުގެ އަސްލެވެ. އަދި ސިއްރިޔާތުގައި ހެޔޮ ޢަމަލުކުރުމަކީ ދީނުގައި ޘާބިތުވުމުގެ އެންމެ ބޮޑު ސަބަބެވެ."

ސިއްރިޔާތުގައި ކުރެވޭ ފާފަ ކިތަންމެ ގިނަ ވިޔަސް ތައުބާވެ އިސްތިޣްފާރުކުރުން އަޅުގަނޑުމެން ދޫކޮށްލައިގެނެއް ނުވާނެ އެވެ. މާތް ﷲ އީ ގިނަގިނައިން ފާފަފުއްސަވާ، ރަޙީމުވަންތަ ރަސްކަލާނގެއެވެ. ތެދުވެރިކަމާ އެކު ތައުބާވުން ދޫކޮށް ނުލައިހާ ހިނދަކު އަޅުގަނޑުމެން ދެމި ތިބޭނީ ހެޔޮކަމުގެ މަތީގައެވެ. ސުވަރުގެއަށް ދިއުމުގެ މަގުގައެވެ. ފާފައިގެ އަސަރު ނައްތައިލުމަށްސިއްރިޔާތުގައި ގިނަގިނައިން ހެޔޮ ޢަމަލުކުރާށެވެ. ފާފަކުރެވޭ ސަބަބުތައް ނައްތައިލާށެވެ. ހާސްވެ ކަންބޮޑުވުމުން ސަލާމަތްވެ ތިބުމަށްޓަކައި ހެޔޮ ރަނގަޅު ކަންކަން ކުރުން އާދަކުރާށެވެ.

އިޚްލާސްތެރިކަމާއެކު ﷲ އަށް ރުޖޫޢަވާ އަޅަކު ގެއްލެނި ނުކުރައްވާނޭ ކަން ޔަޤީނެވެ. ސިއްރިޔާތުގައި ފާފަތަކުން ސަލާމަތްކޮށްދެއްވުން އެދި އެކަލާނގެ ޙަޟްރަތަށް ގިނަގިނައިން ދުޢާކޮށް ދަންނަވަންވީއެވެ. ޞާލިހުންނަކީ ފާފަ ނުކުރެވޭ މީހުންނެއް ނޫނެވެ. އެހެނެއްކަމަކު އެ މީހުންނަކީ ތައުބާވުން ދޫކޮށްނުލާ މީހުންނެވެ.

(ސިއްރިޔާތުގައި ކުރެވޭ ފާފަތަކާ މެދު ބިރުވެތިވާށެވެ! - އައްޝެއިޚް ޖަޢުފަރު މުޙައްމަދު ޢުޘްމާނު؛ ދީނުގެ މަގު، އަހަރު 3، އަދަދު 37، ޞ.2 - 8 ސެޕްޓެމްބަރު 2023)