އަދުގެ ގިނަ މައިންބަފައިންނަށް ނުވަތަ ބެލެނިވެރިންނަށް އިހްމާލްވެވޭ ވަރަށް ބޮޑު ކަމެއް އެބަ އޮވެއެވެ. ކަމެއްގެ ގޮތުން އެއީ އާދައިގެ ކަމެއް ކަމުގައި ހީކުރެވުނު ނަމަވެސް ހަގީގަތަކީ އެއީ ވަރަށްވެސް ބޮޑު ކަމެއް ކަމެވެ. އެއީ ދަރިންނާއި މުޢާމަލާތުކުރެވޭ ގޮތެވެ. އެކުދިންނާ ސުވާލުކޮށް ޖަވާބުދެވޭ ގޮތެވެ.

މިކަމަށް އިޝާރާތް ކުރައްވާ މަޝްހޫރު ދީނީ ޢިލްމުވެެރިޔާ މުފްތީ މެންކް ވިދާޅުވަނީ ބުރަކޮށް މަސައްކަތްކުރާ ވަޤުތެއްގައި ނުވަތަ ފިކުރުބޮޑުވެފައި ހުއްޓައި ދަރިއަކު ސުވާލެއް ކޮށްފިނަމަ ނުވަތަ ވާހަކަ ދައްކަން އުޅެފިނަމަ ވަރަށް ގިނަ ފަހަރަށް ބެލެނިވެރިންނަށް ނުވަތަ މައިންބަފައިންނަށް ރުންކުރު ޖަވާބެއް ދެވޭކަމަށެވެ. ހިތާމައަކީ އެކަމުން ދަރިފުޅަށް ކުރާނެ ނޭދެވޭ އަސަރާއިމެދު ވިސްނާ ނުލެވޭ ކަމެވެ. މުފްތީ ވިދާޅުވާ ގޮތުގައި ބައެއް މީހުންނަށް ޤަބޫލުކުރެވިފައި އޮންނަނީ އެގޮތަށް ކަންކަން ކުރިނަމަވެސް ދަރިންނަށް މާބޮޑު އަސަރެއް ނުކުރާނެ ކަމަށެވެ. އެފަދަ ރުންކުރު ޖަވާބެއް އެގޮތަށް ދެވުނަކަސް އެކުދިންނަށް އެކަމުން ނުރަނގަޅު އަސަރެއް ނުކުރާނެ ކަމަށެވެ.

ނަމަވެސް މުފްތީ އިތުރަށް ވިދާޅުވަނީ ޙަޤީޤަތަކީ އެއީ ނޫންކަމަށެވެ. އެދަރިފުޅު ބޮޑުވެ މައިންބަފައިން މުސްކުޅިވާދުވަހު މައިންބަފައިންނާއި އެދަރިން ހަމައެގޮތަށް މުޢާމަލާތުކުރުން އޮންނާނީ ވަރަށް ގާތް ކަމެއްގެ ގޮތުގައެވެ. އަދި އެދަރިންގެ ޙަޔާތުގެ ބައިވެރިންނާއި އަދި އެދަރިންނަށް ލިބޭ ދަރިންނާއިވެސް ހަމައެފަދައިން މުޢާމަލާތު ކުރެވުންވެސް އޮންނަނީ ވަރަށް ގާތް ކަމެއްގެ ގޮތުގައި ކަމަށް މުފްތީ ވިދާޅުވެއެވެ.  

ވީމާ ކިތަންމެ ބުރަކޮށް މަސައްކަތްކުރަން ހުރިނަމަވެސް، އަދި ކިތަންމެ ބޮޑު ކަންބޮޑުވުމެއްގައި ހުރިނަމަވެސް ދަރިންނާއި މުޢާމަލާތުކުރަންވާނީ ވަރަށް ބޮޑަށް ސަމާލުކަންދީގެންނެވެ. އެހެނީ އެއީ ތިބާގެ ދަރިން ކަމުގައި ވާތީއެވެ. އެދަރިންގެ ކުށަކީ ކޮބާ ހެއްޔެވެ؟ އަބަދުވެސް އަހަރެމެންގެ ދަރިންނާއި ދޭތެރޭ މުއާމަލާތު ކުރަންވާނީ އޯގާތެރިކަމާއިއެކުގައެވެ. ބެލެނިވެރިން ނުވަތަ މައިންބަފައިން އެކަކު އަނެކަކަށް ހުރި ކަންބޮޑުވުންތައް ދަރިންނަށް ދެއްކުމަކީ އެއްގޮތަކަށްވެސް ކޮށްގެންވާނެ ކަމެއް ނޫނެވެ. ދެމަފިރިންގެ ކަންކަން ހައްލު ކުރަންވާނީ ދެމަފިރިން ވާހަކަ ދައްކައިގެންނެވެ. ދަރިން އެކަންކަމާ ނުބައްސާށެވެ.  

މުފްތީ އިތުރަށް ވިދާޅުވީ، ބެލެނިވެރިންނަށް މަސައްކަތްބުރަވަނީވެސް ކަންބޮޑުވާންޖެހޭ ޙާލަތު ކުރިމަތިވަނީވެސް އެއްވެސް ދަރިއެއްގެ ސަބަބުން ކަމަށް ދެކިގެން ނުވާނެކަމަށެވެ. އެފަދަ ކަމެއް މެދުވެރިވުމުގައި ދަރިންގެ އެއްވެސް ކުށެއް ނުއޮންނާނެއެވެ. އޮތްނަމަ އޮތް މައްސަލައެއް އޮންނާނީ ބެލެނިވެރިންގެއެވެ. ވީމާ ދަރިންނަށް އެކަންކަމުގެ "ވަރު ބޭލުން" ވާނީ ދަރިންނަށް ކުރެވޭ ވަރަށް ބޮޑުއަނިޔާއަކަށެވެ.  މިކަމަކީ ދަރިން ތަރުބިއްޔަތުކުރުމުގައި ވަރަށް ބޮޑަށް ސަމާލުކަންދޭންޖެހިފައިވާ ކަމެކެވެ.  އާދައިގެ ކަމެއް ކަމުގައި ދެކުނު ނަމަވެސް މިއީ ބޮޑު ކަމެކެވެ. އިސްލާހު ކުރަންޖެހޭނެ ކަމެކެވެ.

 

ހަވާލާ: މުފްތީ މެންކް (ދަރުސް) - 2023