އިސްލާމްދީނަކީ އެ ނޫން އެހެން އެއްވެސް ދީނެއްގައި ދޭދޭ ފަރުދުންގެ ދެމެދު އޯގާތެރިކަމާއި އިޙްތިރާމު ބަޔާންކޮށް ނުދެވޭވަރަށް، އެ ކަމުގެ އެންމެ އިންތިހާއީ އާޚިރު ނުކުތާއަށް ދާންދެން ކިޔަވައިދީ ތަރުބިއްޔަތުކުރާ ދީނެވެ. އިންސާނަކު ހެދިބޮޑުވެ ފުރާ ފުރިހަމަވަމުން އަންނައިރު އޭނާގެ ވަށައިގެންވާ އެންމެންނަށް އިޙްތިރާމު ކުރަން ދަސްކޮށްދޭ ދީނެވެ.

އެގޮތުން ބަލާއިރު މައިންބަފައިންނާއި، ގާތްތިމާގެ މީހުންނާއި، އަވަށްޓެރިންނާއި، ދުރު ރައްޓެހިންނާއި، ޓީޗަރުންނާއި، ބެލެހެއްޓުން ތެރިންނާއި، ވެރިންނާއި، މި ނޫން އެންމެންނަށް އިޙްތިރާމުކުރަން ދަސްކޮށްދެނީ، ވަކި ކުލައަކަށް، ވަކި އުމުރަކަށް، ވަކި ގިންތިއަކަށް، ވަކި ފަންތިއަކަށް، އަދި ކިއެއް ވަކި ދީނަކަށް ވެސް ބެލުމެއް ނެތި އެންމެންނަށް ހަމަހަމަކޮށެވެ. 

މި ހުރިހާ މުޢާމަލާތީ އިޙްތިރާމެއްގެ ތެރެއިން ވެސް މައިންބަފައިންނަށް ކަމޭހިތައި އޯގާތެރިކަމާ އެކު އިޙްތިރާމުކުރުން އެއީ ކޮންމެ ދަރިއެއްގެ މައްޗަށް ވާޖިބުކުރައްވައިފައިވާ ކަމެކެވެ. މަންމަގެ ނަން މި ކަމުގައި ބައްޕައަށް ވުރެ އިސްވެގެން އާދެއެވެ. މި ކަމަށް އޮތް އެންމެ ބޮޑު ހެއްކަކީ ލުޤްމާން ސޫރަތުގެ އަންނަނިވި އާޔަތެވެ. އެ އާޔަތުގެ މާނައިގައި ވެއެވެ. "އިންސާނ އަށް، އޭނާގެ މައިންބަފައިންނަށް (ހެޔޮކޮށް ހިތުމަށް) ތިމަންރަސްކަލާނގެ ވަޞިއްޔަތް ކުރެއްވީމެވެ. އޭނާގެ މައިމީހާ ބަލި ނިކަމެތިކަމުގެ މައްޗަށް، ބަލި ނިކަމެތިކަމާ އެކު މާބަނޑުގައި އޭނާ އުފުލިއެވެ. އަދި އޭނާ ކިރު ތުނބުން ވީއްލުންވަނީ، ދެ އަހަރުގައެވެ. (ތިމަންރަސްކަލާނގެ އަމުރު ކުރެއްވީމެވެ. ) ތިމަންރަސްކަލާނގެއަށާއި، ތިބާގެ މައިންބަފައިންނަށް ޝުކުރު ކުރާށެވެ! އެނބުރި ރުޖޫޢަވުން ވަނީ، ހަމަ ތިމަންރަސްކަލާނގެ ޙަޟްރަތަށެވެ."

ﷲއާ ޝިރުކު ކުރުމަށް ތިބާއަށް މައިންބަފައިން އަމުރުކުރި ކަމުގައި ވިޔަސް އެ ދެ މީހުންނާ ޢަދާވާތްތެރި ނުވުމަށް އަންގަވައި ވަޙީކުރައްވަނީ "އަދި ދުނިޔޭގައި ހެޔޮގޮތުގައި އެ ދެ މީހުންނާ އެކު އުޅޭށެވެ!" ﷲއާ ޝިރުކުކުރަން ދެވޭ ދައުވަތަކީ އޭނާގެ މަންމަ ނުވަތަ ބައްޕަގެ ފަރާތުން އައި ދައުވަތެއް ކަމުގައި ވިޔަސް އެ ކަމަށް އިޖާބަދީގެން ނުވާނެ އެވެ. އިޖާބަ ނުދީގެން މައިންބަފައިން އޭނާއަށް ގޯނާކުރިޔަސް، އެ މީހުންނާ ދޭތެރޭ ދުނިޔޭގެ މުޢާމަލާތުތަކުގައި ހެޔޮކޮށް ހިތަންވާނެއެވެ. ބަލިވެއްޖެ ނަމަ އެހީތެރިވާންވާނެ އެވެ. ކަމަކު އެދިއްޖެއްޔާ އެ ކަމެއް ކޮށްދޭންވާނެއެވެ. އިޙްތިރާމުކުރަން ވާނެއެވެ. އެ މަގުން އެ ކަން ކުރުމަށް މާތް ﷲ ވަނީ މުސްލިމުންނަށް އަންގަވައިފައެވެ.

މިހާވަރުގެ ބޮޑު އިޙްތިރާމަކާއި ޤަދަރެއް މައިންބަފައިންނަށް އިސްލާމްދީނުގައި ދެއްވައިފައި އޮންނައިރު ވެސް، އަދުގެ މުސްލިމުންނަށް މި ކަންކަން އެނގިފައި އޮންނަނީ ވަރަށް ކުޑަކޮށެވެ. ކިޔަވައި ދަސް ވެސް ނުކުރަނީއެވެ. ބައްޕަގެ ހައިބަތެއް، މަންމަގެ މަޤާމެއް، ބޮޑުވަމުން އަންނަ ކުދިންނަށް ކިޔަވައިދޭނެ ފުރުޞަތުތައް ވެސް މިއަދު އަންނަނީ ހަނިވަމުންނެވެ.

 

(މައިންބަފައިންނަށް ދުނިޔޭގައި ހެޔޮކޮށް ހިތާށެވެ! - އައްޝެއިޚް މުޙައްމަދު އަފްޟަލް؛ ދީނުގެ މަގު، އަހަރު 3، އަދަދު 35، ޞ.1 - 25 އޮގަސްޓް 2023)