މީގެ 1400 އެތަކެއް އަހަރެއް ކުރީން ސައިންސް ޢިލްމެއްގެ ގޮތުގައި ކުރިއަރައިފައިނުވި ނަމަވެސް، މި ޒަމާނުގެ ޢިލްމީ ހޯދުންތަކުން ޤުރުއާނުގައި ބަޔާންވެފައިހުރި ސައިންޓިފިކް ހެކިތަކާއި ޙަޤީޤަތްތަކުގެ ތެދުކަން ހާމަވެގެންދެއެވެ. އޭގެތެރެއިން ބައެއް ކަންކަމަށް ބަލައިލާނަމެވެ.

ދެ ފެން އެއްނުވެ ކަނޑުގައި ހުންނަ ކަމަށް ފަހުގެ ދިރާސާތަކުން ދައްކައެވެ. ވަޙީބަސްފުޅެއްގެ މާނައިގައިވެއެވެ. "އެ އިލާހު ދެ ކަނޑު (އެބަހީ: ކޯރާއި، ކަނޑު) ހައްދަވައި، ފޮނުއްވިއެވެ. އެ ދެ ކަނޑު ހިނގަމުންގޮސް ބައްދަލުވެއެވެ. (9) އެ ދެ ކަނޑު ދެމެދުގައި، ހުރަހެއްވެއެވެ. އެ ދެ ކަނޑު ވެސް އެއްކަނޑު އަނެއްކަނޑެއްގެ މައްޗަކަށް އަރައެއް ނުގަނެތެވެ. (10)" (އައްރަޙްމާން)

ޑޮކްޓަރީ ޢިލްމު ކުރިއަރައި ގޮސް ދަރިމައިވުމުގެ މަރުޙަލާތައް މިހާރު ސްކޭންތަކުން ބަލައިލެވެއެވެ. މާތް ﷲ ވަނީ އަންހެނާގެ ރަޙިމުގައި ދަރި އުފެދިގެން އަންނަ މަރުޙަލާތައް ކީރިތި ޤުރުއާނުގައި ބަޔާންކޮށްދެއްވައިފައެވެ. އެ އިލާހު ވަޙީކުރެއްވި ބަސްފުޅެއްގެ މާނައިގައި ވެއެވެ. "ދެން ތިމަން އިލާހު އެ އިންސާނާ، ރައްކާތެރި ތަނެއްގައި، މަނިތިއްކެއްގެ ގޮތުގައި ލެއްވީމެވެ. ދެން ތިމަން އިލާހު އެ މަނިތިކި، ގަނޑުލޭކޮޅަކަށް ހެއްދެވީމެވެ. ދެން އެ ގަނޑުލޭކޮޅު، މަސްކޮޅަކަށް ހެއްދެވީމެވެ. ދެން އެ މަސްކޮޅު، ކަށްޓަށް ހެއްދެވީމެވެ. ދެން އެ ކަށީގައި މަސްލެއްވީމެވެ. ދެން އެހެން އުފެއްދެވުމަކުން އެ އިންސާނާ އުފެއްދެވީމެވެ. ފަހެ އެންމެ ފުރިހަމައަށް ތަކެތި ހައްދަވާ ﷲ، މަތިވެރިވެވޮޑިގެންވެއެވެ." (އަލްމުއުމިނޫން 12-14)

މި އަޔާތުގައި ބަޔާންވެފައިވާ "ޢަލަޤާ" ޢަރަބިބަހުން. ލޭބޯ ފަންޏެއްކަމަށްވާ "ލީޗް"، ނުވަތަ ގަނޑުލޭކޮޅެއް ނުވަތަ އެލުވިފައިވާ އެއްޗެއް ގޮތަށް ވެސް މާނަކުރެވެއެވެ. މައިމީހާގެ ރަޙިމުގައި ދަރިފުޅު އޮންނައިރު މަންމަގެ ހަށިގަނޑުން ("ލީޗް ވާރމް" ލޭ ދަމާހެން) ކާނާ ލިބިގަނެއެވެ. އަދި ފުރަތަމަ މަރުޙަލާތަކުގައި ލޭ ދައުރުނުވާ ގަނޑު ލޭކޮޅެއް ފަދައިން ވެސް މިހާރުގެ ސްކޭންތަކުން ފެނެއެވެ. އަދި އޭގެ ފަހުގެ މަރުޙަލާތަކުގައި "ޕްލެސެންޓާ" (ފޫޅު ރަޙިމާ ގުޅިފައިވާ ބައި) މައިމީހާގެ ހަށިގަނޑުން ނުނެއްޓި ރަޙިމުގެ ތެރޭގައި ދަރިފުޅާ ގުޅިފައިވާތަން ފެނިގެންދެއެވެ. 

ވިލާތައް އުފެދޭ ނިޒާމު ވެސް ކީރިތި ޤުރުއާނުގައި ވަނީ ބަޔާންކުރައްވައިފައެވެ. "ހަމަކަށަވަރުން ﷲ، ވިލާ ހިންގަވާތީ ކަލޭގެފާނު ދެކެވަޑައި ނުގަންނަަވަމުތޯއެވެ؟ ދެން އެ ވިލާތައް އެއްކުރައްވައެވެ. ދެން މަތިމައްޗަށް ހުންނަ ވިލާތަކެއް ކަމުގައި ލައްވައެވެ. ފަހެ އެ ވިލާތަކުގެ ތެރެއިން، ވާރޭ ނުކުމެގެން އަންނާތީ ކަލޭގެފާނު ދެކެވަޑައިގަންނަވާނެއެވެ." (އައްނޫރު 43) ވިލާތައް އުފެދެނީ ކުދި ވިލާތައް ވައިރޯޅިތަކުން ދަމައިގަނެ، އެއް ވިލާގަނޑު އަނެއް ވިލާގަނޑާއި އެކުވެގެންނެވެ. މީގެ ސަބަބުން ވިލާތައް އުޑުގައި ފެތުރި މަތިމައްޗަށް ބަރިބަރިއަށް އިންތިޒާމުވެގެންދެއެވެ.

ތަދު އިހުސާސްކުރާ ރިސެޕްޓަރސްތަކެއްގެ ވާހަކަ ކީރިތި ޤުރުއާނުގައި އޮވެއެވެ. ކުރީގައި ބެލެވިފައި އޮންނަނީ ތަދު އިހުސާސްކުރެވެނީ ސިކުނޑިއަށް ކަމަށެވެ. ތަދު އިހުސާސްކުރާ ރިސެޕްޓަރސްތަކެއް އިންސާނާގެ ހަންގަނޑުގައި ހުންނަކަން ދެނެގަނެވުނީ ފަހުގެ ދިރާސާތަކުންނެވެ. "ހަމަކަށަވަރުން ތިމަން އިލާހުގެ އާޔަތްތަކަށް ކާފިރުވި މީހުން ނިކަންހުރެ ތިމަން އިލާހު އެބައިމީހުން ނަރަކައަށް ވައްދަވާ ހުށީމެވެ. އެބައިމީހުންގެ ހަންތައް ރޯފިލައްޖެ ކޮންމެ ހިނދަކު، އެބައިމީހުންގެ ހަންތައް އެ ނޫން ހަންތަކަކަށް ބަދަލު ކުރައްވަމެވެ. އެއީ، އެބައިމީހުން އަޒާބުގެ ރަހަ ލިބިގަތުމަށް ޓަކައެވެ." (އައްނިސާ 56) މި އާޔަތުން އެނގެނީ ތަދު އިހުސާސް ކުރެވެނީ ހަންގަނޑުގެ ޒަރިއްޔާއިން ކަމެވެ.

"ސައިންޓިފިކް" ފަހުގެ ވަސީލަތްތަކުން ނޫނީ ނުހޯދޭނެ އެތައް މަޢުލޫމާތެއް ކީރިތި ޤުރުއާނުގައި ބަޔާންވެފައި އޮތުމީ، މި ޤުރުއާން އެއީ މާތް ﷲގެ ކަލާމްފުޅުކަން ސާބިތުވާ ހެއްކެކެވެ.

 

(ޤުރުއާނުގައިވާ ބައެއް ސައިންޓިފިކް ޙަޤީޤަތް - މުޙައްމަދު ސަމޫޙު ސަޢީދު؛ ދީނުގެ މަގު، އަހަރު 3، އަދަދު 41، ޞ.4 - 06 އޮކްޓޫބަރު 2023)