ފަލަސްޠީނުގެ ހާލަށް ރިއާޔަތްކޮށް، އެ ގައުމުގެ މުސްލިމުންނާ އެ މާތް ބިމުގެ މަތިން މާތް ﷲ ލޯބިވެ ވޮޑިގެން ނުވާ ކަމަށާއި މާތް ﷲ އެބައިމީހުންގެ ހާލަށް ނުބައްލަވާކަމުގެ ވާހަކަ އަކީ ކާފިރުން މިއަދު މުސްލިމުންނާ ދެކޮޅަށް ބުނެ އުޅޭ ބަހެކެވެ. އެބައިމީހުން މިފަދައިން ބުނެ އުޅެނީ މުސްލިމުންގެ އީމާންތެރިކަން ބަލިކަށިކޮށްލާ ނިކަމެތިކޮށްލާށެވެ. އަގީދާގެ ސާބިތުކަން ނިގުޅައިގަންނާށެވެ. ނަމަވެސް ކާފިރުންގެ މިފަދަ ވާހަކަތަކުގައި އެއްވެސް މުސްލިމަކު ޖެހިގެން ނުވާނެއެވެ.

އެފަދަ ބަސްތައް ރައްދު ކުރާ މީސްމީހުންނަށް، މަޝްހޫރު ދީނީ ޢިލްމުވެރިޔާ މުފްތީ މެންކް ކުރާ ސުވާލަކީ އަހުރެމެންގެ ލޮބުވެތި ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަގެ އަނބިއަނބިކަނބަލުންގެ ގަނޑުވަރުކޮޅުތަކުގެ ބަދިގެކޮޅުތަކުގައި 3 މަސްވަންދެން ކައްކަވާނެ އެއްވެސް އެއްޗެއް ލިބިވަޑައިނުގަންނަވާތީ އުނދުންކޮޅު ރޯނުކުރައްވަވައި ތިއްބަވަން ޖެހިވަޑައިގަތީ ﷲ ތަޢާލާ މިއުންމަތަށް ފޮނުއްވެވި އެންމެ މާތް އިންސާނާ، އަހުރެމެންގެ ލޮބުވެތި ނަބިއްޔާ މުޙައްމަދު ޞައްލަ ﷲ ޢަލައިހި ވަސައްލަމަ އާއި އިތުރު ޞާޙިބާގެ އަނބިއަނބިކަންބަލުންނާއި ދަރިދަރިކަލުންނާއި ދަރިދަރިކަނބަލުން ދެކެ ލޯބިފުޅުވެވޮޑިނުގަންނަވާތީހެއްޔެވެ؟ 

ދުނިޔެއަށް ފޮނުއްވެވި އިންސާނުންގެ ތެރެއިން އެންމެހައި މީސްތަކުންނަށްވުރެ މަތިވެރި ދަރަޖަ ދެއްވަވައި، އިސްރާއާއި މިޢްރާޖްގެ ދަތުރުފުޅު މިންވަރުކުރެއްވެވި އެފަދަ މާތް ޞާޙިބާ ދޫކޮށްލެއްވެވީ ހެއްޔެވެ؟ 

މުފްތީ ވިދާޅުވަނީ ހަމަހިލާ އެހެންނަކުން ނުވާނެކަމަށެވެ. އަދި މުފްތީ ވިދާޅުވީ އިސްލާމީ ތާރީޚުން އެނގިގެންދަނީ އެމީހަކު ދެކެ ﷲ ތަޢާލާ ލޯބިފުޅުވެވޮޑިގަންނަވާ މިންވަރު ބޮޑުވި ވަރަކަށް، އެ މީހަކަށް ނުވަތަ ބަޔަކަށް ކުރިމަތިކުރައްވަވާ އިމްތިޙާންތައް ބޮޑުވެފައި ވަރުގަދަވާނެކަމެވެ. 

ލޮބުވެތި އަޚުންނާއި އުޚުތުންނޭވެ! ﷲ ތަޢާލާ އާއިމެދު އެފަދަ ބަސްތައް ބުނާ ކާފިރުންނަށް ރައްދު ދޭށެވެ. އެފަދަ ބަސްތަކުގައި މުސްލިމުން ނުޖެހޭށެވެ. އީމާންތެރިކަމަށް ކުޑަނަމަވެސް ލޮހުސާނެއް ވިޔަ ނުދޭށެވެ. 

ކާފިރުން އެވާހަކަ އެގޮތަށް ދެއްކިއެއް ކަމަކު، ފަލަސްޠީނުގެ މުސްލިމުންގެ ގޮވުމަކީ އެއް ގޮވުމެކެވެ. އެއީ އެބައިމީހުންނަށް ﷲ ފުދިގެންވާ ކަމަށް އެބައިމީހުން ގޮވާ ގޮވުމެވެ. އަދި ﷲ ގެ މަތިވެރިކަން އަބަދު ހަނދުމަ ކުރުމާއިއެކު، ވީ ހާލަކައިގެން އެކަލާންގެއަށް ޝުކުރުވެރިވުން މަތީ އެބައިމީހުން ދެމި ތިބެއެވެ. މާތް ﷲ ފަލަސްޠީނަށް ނަޞްރު ދެއްވާ ކާމިޔާބީ އާއި އަމާންކަން މިންވަރު ކުރައްވާށި! އާމީން!