ރަނގަޅު ޞިއްޙަތެއްގައި ހުރުމަކީ ކޮންމެ މީހަކަށް ވެސް މުހިންމު ކަމެކެވެ. ހަށިގަނޑުގެ ދުޅަހެޔޮކަމާއި ނަފްސާނީ ދުޅަހެޔޮކަމަކީ ވެސް ފުރިހަމަ ޞިއްޙަތަކަށް ބޭނުންތެރި ކަމެކެވެ. މި ޒަމާނަކީ ނަފްސާނީ ބަލިމަޑުކަން ފެތުރި އެ ބަލިތައް ގިނަ ބަޔަކު ތަހައްމަލުކުރާ ޒަމާނެކެވެ. މި މަޢުޟޫއުގައި އިވޭ އެއް އަޑަކީ އީމާންތެރިކަން ވަރުގަދަ ނަމަ ނަފްސާނީ ބަލިމަޑުކަމެއް ހިތާމައެއް މުޞީބާތެއް ކުރިމަތިވިޔަސް ދެރަވެ ކަރުނައަޅަން ނުޖެހޭނޭ ވާހަކައެވެ.

ނިކަން ބައްލަވާށެވެ! ޔަޢުޤޫބުގެފާނު ކީރިތި ކުރެއްވި ކުރެއްވުމުގައި އެކަލޭގެފާނުގެ ލޯފުޅުގެ އަލިކަން ނެތިގެން ދިޔައެވެ. ނަބިއްޔާ ޞައްލަﷲ އަލައިހި ވަޞައްލަމްގެ ދަރިކަލުން އިބްރާހީމްގެފާނު އަވަހާރަވީހިނދު އެކަލޭގެފާނު ކަރުނައެޅުއްވިއެވެ. ޚަދީޖަތުގެފާނާއި އަބޫޠާލިބު އަވަހާރަވީ އަހަރަކީ ހިތާމައިގެ އަހަރު ކަމުގައި ވެގެންދިޔައެވެ. މި ދެންނެވި ބޭބޭފުޅުންގެ އީމާންކަން ބަލިކަށީއޭ ބުނެވޭނޭ ބާއެވެ؟

ހިތާމަކުރުމާއި މިފަދަ އެންމެހައި ބަލިމަޑުކަމަކީ މާތް ﷲ ލައްވަވައިފައިވާ ކަންކަމެވެ. ނަފްސާނީ ބަލިމަޑުކަން މީހަކަށް ކުރިމަތިވެދާނޭ ބައިވަރު ސަބަބުތައް ހުރެއެވެ. އޭގެތެރޭގައި އުފެދުމުގެ (ހޯމޯނަލް) މައްސަލައެއް ނުވަތަ ޢާއިލީ ގޮތުން (ޖެނެޓިކަލް) ކަމެއް ވާރުތަ ވެފައި ވުން ހިމެނެއެވެ. ދިރިއުޅޭ މާހައުލުން ކުރާ އަސަރަކީ ވެސް މީގެ ސަބަބެއް ކަމުގައި ވެދާނެ އެވެ. ހަނގުރާމައެއް ހިނގާ ތަނެއް ނުވަތަ ދެބަސްވުން އާންމު މާޙައުލުތަކުން މި ކަމުގެ އަސަރު ފެންނަލެއް ބޮޑުކަމުގައި ބުނެވެއެވެ. އީމާންކަން ބަލިވުން ވެސް އެއީ މީގެ ސަބަބެކެވެ. މި ކަންކަން އެކުއެކީ ވެސް ކުރިމަތިވެދާނެ އެވެ. 

ދީނީގޮތުން ބަލައިގެން ނަފްސާނީ ބަލިތަކުން ސަލާމަތްވުމަށް އެދޭ ނަމަ އަންނަނިވި ދެ ކަމަށް ވިސްނައިލަން ޖެހެއެވެ. ފުރަތަމައީ މާތް ﷲ މަޢުރިފާކޮށް ދެނެގަތުމެވެ. އެ ކަލާނގެ އިސްމުފުޅުތައް ދަސްކުރުމެވެ. ޙަދީޘްފުޅެއްގެ މާނައިގައި ވެއެވެ. "ތިމަން ރަސްކަލާނގެއާ މެދު ތިމަން ރަސްކަލާނގެ އަޅާ އުންމީދު ކުރާ ގޮތެއްގައި ތިމަންރަސްކަލާނގެ ވޮޑިގެންވަމެވެ." (ބުޚާރީ) މާތް ﷲ މަޢުރިފާވުމުން އެ ކަލާނގެއާ މެދު ހެޔޮކޮށް އުންމީދުކުރެވެއެވެ.

ދެވަނައީ މިންވަރަށް ރުހެން ދަސްކުރުމެވެ. އެ ކަލާނގެ ވަޙީކުރެއްވި ބަސްފުޅެއްގެ މާނައިގައި ވެއެވެ. "ކަލޭގެފާނު ވިދާޅުވާށެވެ! ﷲ އަޅަމެންނަށް ލިޔުއްވައިފައިވާ ކަމެއް މެނުވީ، އަޅަމެންނަށް ނުޖެހޭނެތެވެ. އެ އިލާހީ، އަޅަމެންގެ އެހީތެރިވަންތަ އިލާހެވެ. ފަހެ މުއުމިނުން ހަމައެކަނި، ﷲ އަށް ވަކީލުކުރާ ހުށިކަމެވެ!" (ތަޢުބާ: 51)

އަދި މާތް ﷲ ވަޙީކުރެއްވި ބަސްފުޅެއްގެ މާނައިގައި ވެއެވެ. "ހަމަކަށަވަރުން ތިމަން އިލާހު ތިޔަބައިމީހުން އިމްތިޙާނު ކުރައްވާހުށީމެވެ." (ބަޤަރާ: 155) މާތް ﷲ އެކި މީހުން އިމްތިޙާނު ކުރައްވާނީ އެކި ގޮތަށެވެ. ނަފްސާނީ ބަލިމަޑުކަމުން ވެސް އިމްތިޙާނުކުރައްވައިފާނެތެވެ. އަދިވެސް އެ ކަލާނގެ ވަޙީކުރެއްވި ބަސްފުޅެއްގެ މާނައިގައި ވެއެވެ. "ﷲ، އެއްވެސް ނަފުސަކަށް، އެ ނަފުސަކަށް ކުޅަދާނަވެގެންވާ ކަމަކަށް މެނުވީ ތަކުލީފެއް ނުޖައްސަވަތެވެ." (ބަޤަރާ: 286) ނަފްސާނީ ބަލިމަޑުކަމަކީ ވެސް ހައްލު ގެނެވޭނޭ ކަމެކެވެ. ޙަދީޘްފުޅެއްގެ މާނައިގައި ވެއެވެ. "މާތް ﷲ ކޮންމެ ބައްޔަކަށް ޝިފާ ލައްވަވައިފައި ވެއެވެ. ތިޔަބައިމީހުން ބަލިވުމުން ފަރުވާ ހޯދާށެވެ." (އަބޫ ދާވޫދް) އޭގެތެރޭގައި ޖިސްމާނީ ބަލިބައްޔާއި ނަފްސާނީ ބަލިބަލި ވެސް ހިމެނެއެވެ. ޒަމާނުއްސުރެ ނަފްސާނީ ބަލިބައްޔަށް ފަރުވާދޭ ޚާއްޞަ ތަންތަން މުސްލިމުންގެ ތެރޭގައި ވެސް ހުރިކަން ފާހަގަކުރާން ޖެހެއެވެ. 

ނަފްސާނީ ބަލިމަޑުކަމުން އަރައިގަތުމަށް އެ ކަމުގެ ޚާއްޞަ ޑޮކްޓަރުންގެ ކިބައިން ފަރުވާ އާއި ތެރަޕީ ލިބިގަންނަ ހާލަތަށް ގޮސްފި ނަމަ އެކަން ނުކޮށް ދޫކޮށްނުލާށެވެ. ފަރުވާ ހޯދާން ވާނެއެވެ. މިފަދަ އެންމެހާ ބަލިތަކުން މާތް ﷲ އަޅަމެން ރައްކާތެރި ކުރައްވާށިއެވެ! އާމީން.

 

(ނަފްސާނީ ބަލިމަޑުކަން - މުޙައްމަދު ސަމޫހު ސަޢީދު؛ ދީނުގެ މަގު، އަހަރު 3، އަދަދު 52، ޞ.4، 22 ޑިސެންބަރު 2023)