ކީރިތި ޤުރުއާން ކިޔެވޭ ހިނދު، އެއަށް ކަނުލާ އަޑުއެހުމަކީ އަމުރުވެވިގެންވާ ކަމެކެވެ. އެކަން ބަޔާންކުރައްވައި މާތް ﷲ ވަޙީކުރައްވައިފައި ވެއެވެ. ﴿وَإِذَا قُرِئَ ٱلْقُرْءَانُ فَٱسْتَمِعُوا۟ لَهُۥ وَأَنصِتُوا۟ لَعَلَّكُمْ تُرْحَمُونَ﴾ (އަލް-އަޢްރާފް: 204) މާނައީ: "އަދި ޤުރުއާން ކިޔަވާހިނދު ތިޔަބައިމީހުން ހަނުތިބެ، އެއަށް ކަނުލައި އަހާށެވެ! (އެއީ) ތިޔަބައިމީހުންނަށް ރަޙުމަތް ލެއްވުމަށް ޓަކައެވެ." މި އާޔަތުން އެނގޭ ގޮތުގައި ކީރިތި ޤުރުއާން ކިޔަވާ އަޑު އިވުމުން، ހަނުތިބެ ކަނުލައި އޭގެ އަޑުއެހުމަކީ މާތް ﷲގެ ރަޙުމަތް އެ މީހަކަށް ލިބޭނޭ ކަމެކެވެ. އަޅަމެން އެފަދަ މީހުން ތެރެއިން ލައްވާށިއެވެ!

ކީރިތި ޤުރުއާނުގެ އަޑު މިއަދު ގިނަ މީހުން އަހަނީ އެއަށް ކަނުލައި ވިސްނަމުން ބާވައެވެ؟ އާޔަތުގައި އެ އަންގަވާ ފަދައިން ﷲގެ ޙަޟްރަތުން އަންނަ ރަޙުމަތް ލިބޭ ބަޔަކު ފަދައިން ބާވައެވެ؟ މި ސުވާލު ކޮންމެ ބޭފުޅަކު ވެސް އެ ބޭފުޅެއްގެ އަމިއްލަ ނަފުސާ ކޮށްލަވާށެވެ!

ކީރިތި ޤުރުއާން އަޑުއަހާ މީހުން ތެރޭ ދެ ވައްތަރެއްގެ ބަޔަކު އެބަ ތިއްބެވެ. އެއް ބަޔަކީ އެބައިމީހުންގެ ކަންފަތާ ހަމައަށް އެކަނި އޭގެ އަޑު ފޯރާ މީހުންނެވެ. އަނެއް ބަޔަކީ ކީރިތި ޤުރުއާނުގެ އަޑު އެ ބައެއްގެ ކަންފަތުގެ އެތެރެއިންލައިފައި ގޮސް އެމީހުންގެ ހިތާ ހަމަޔަށް ފޯރާ ބަޔެކެވެ.

އެ ބައެއްގެ ހިތަށް ކީރިތި ޤުރުއާނުގެ އަޑު އިވޭ މީހުންނަކީ މާތް ﷲގެ ޙަޟްރަތުން ރަޙުމަތް ލިބޭ މީހުންނެވެ. އެއީ މަތިވެރި ޞަޙާބީންގެ މިސާލެވެ. އެ ބޭކަލުންނަށް ކީރިތި ޤުރުއާނުގެ އާޔަތްތަކުން ހިތްހަމަޖެހުން ލިބިލެއްވިއެވެ. އަދި އެ އާޔަތްތަކުން އެ ބޭފުޅުންގެ ޙަޔާތްޕުޅަށް އެންމެ އެދެވޭ އަސަރުކުރިއެވެ. ތަޤުވާ އިތުރުވިއެވެ.

ކީރިތި ޤުރުއާނުގެ އަޑުން އެހެން މީހުންގެ ކަންފަތްތަކަށް ހިތްހަމަޖެހުން ހޯދައިދޭ މީހުންނާއި އެ ހިތްހަމަޖެހުން ލިބިގަންނަ މީހުންގެ މިސާލަކީ ރަސްގެފާނުގެ ދަރުބާރަށް ޅެން ކިޔަން ދިޔަ މީހާގެ މިސާލެވެ. އޭނާ ރަސްގެފާނަށް ޅެން ކިޔައިދިނުމުން ރަސްގެފާނު އޭނާ އަށް ހަދިޔާއެއްގެ ގޮތުގައި ގެއެއް ދެއްވާނަމޭ ވިދާޅުވިއެވެ. އޭނާ އަނެއްކާ އެހެން ޅެމެއް ކިޔައިދިނެވެ. މިފަހަރު ރަސްގެފާނު ވިދާޅުވީ އޭނާ އަށް ދަނޑުބިމެއް ދޭނެ ކަމަށެވެ. އޭނާ ހުއްޓުމެއް ނެތި ޅެން ކިޔަމުން ގެންދިޔައެވެ. ރަސްގެފާނު ވެސް އޭނާ އަށް ހަދިޔާބަދިޔާ ދޭނެކަމުގެ ޚަބަރު ދެއްވަމުންގެންދެވިއެވެ. ރަންރިއްސާއި ޖަވާހިރާއި މައުދަނެވެ. ލޮއިގެ ކަންވާރާއި ފަށުވިފޭރާމާއި ދެން ވެސް އަގުހުރި އެތައް އިނާމެކެވެ.

އެ ދުވަހު ޅެންކިޔާ މީހާ ގެއަށް ދިޔައީ ވަރަށް އުފަލުންނެވެ. އަދި ރަސްގެފާނު ދެއްވަން ވިދާޅުވި ގިނަ ހަދިޔާތަކުގެ ވާހަކަ އަނބިމީހާއަށް ކިޔައިދިނެވެ. ހަފުތާ ދެ ހަފުތާ، މަސް ދެ މަސް ފާއިތުވެ ދިޔައިރު ވެސް އޭނާގެ އިނާމުތަކުގެ އެއްވެސް ޚަބަރެއް ނުވެގެން އަނބިމީހާ އޭނާއަށް ބުންޏެވެ. "ރަސްގެފާނު އަރިހަށް ގޮސް އޭގެ ޚަބަރެއް އޮޅުންފިލުވަން ވީ ނޫން ހެއްޔެވެ؟"

އޭނާ ރަސްގެފާނާ ބައްދަލުކޮށް އެ ވާހަކަ ދެންނެވުމުން، ރަސްގެފާނު ވިދާޅުވިއެވެ. "ތިބާ ތިމަންގެ ކަންފަތަށް ރީތި ހިތްގައިމު އަޑުތަކެއް އިއްވީއެވެ. ތިމަންނާ ވެސް ތިބާގެ ކަންފަތަށް އެއަށް ވުރެ މާ ހިތްހަމަޖެހޭ އަޑުތަކެއް އިއްވީއެވެ. އެއީ ޢަމަލުކުރާކަށް އިއްވި އަޑުތަކެއް ނޫނެވެ."

މިއީ އަޅުގަނޑުމެންގެ ޙާލުކަމުގައި ވެގެން ނުވާނެއެވެ. ކީރިތި ޤުރުއާނުން ލިބޭ ރިސާލަތުގެ އަޑު ހިތްތަކާ ހަމައަށް ފޯރުވާށެވެ!

 

(ކީރިތި ޤުރުއާނުގެ އަޑު ހިތްތަކާ ހަމައަށް ފޯރުވާށެވެ! - އައްޝެއިޚް ޙާރިޘް ޒާހިރު؛ ދީނުގެ މަގު، އަހަރު 3، އަދަދު 28، ޞ.2 – 07 ޖުލައި 2023)