އިސްލާމްދީނުގެ ރުކުންތަކުގެ ތެރެއިން ނަމާދު ގާއިމްކުރުމަކީ އެއް ރުކުނެވެ. ނަމާދު އޭގެ ވަގުތުގައި އަދާކުރުމަކީ މުސްލިމުންގެ މައްޗަށް އޮތް ވާޖިބެކެވެ. ނަމާދު އޭގެ ވަގުތުގައި އަދާކުރުމާއި އެކު، ނަމާދު ކުރުމަށްވެސް އެތައް އިރުޝާދުތަކެއް މާތް ނަބިއްޔާ ވަނީ ދަސްކޮށްދެއްވާފައެވެ.

ނަމާދު ކުރުމުގައި ފިރިހެނުން، މިސްކިތުގެ ޖަމާއަތުގައި ނަމާދުކުރުން މޮޅުއިތުރުވެގެން ވެއެވެ. މިސްކިތުގެ ޖަމާއަތުގައި ނަމާދު ކުރާއިރުގައިވެސް ސަމާލުކަންދޭން ޖެހޭ އެތައް ކަމެއް ހުރެއެވެ. އެގޮތުން ސަފުތައް ސީދާ ކުރުމާއި، ގާތްގާތުގައި ސަފުތައް ތަރުތީބު ކުރުން ހިމެނެއެވެ. ހަމަ އެގޮތަށް މިސްކިތުގެ ނުވަތަ ޖަމާއަތުގެ ފުރަތަމަ ސަފު ހޯދުމަކީވެސް އެކަމުގެ އަޖުރު އިތުރުކަމެއް ކަމަށް ޢިލްމުވެރިން ވިދާޅުވެއެވެ.

އިސްލާމީ ދަރުސްތައް ދިނުމުގައި މަޝްހޫރު ދީނީ ޢިލްމުވެރިޔާ މުފްތީ މެންކް ވިދާޅުވާ ގޮތުގައި މިސްކިތުގެ ފުރަތަމަ ސަފުން ކިރިޔާވެސް ޖާގައެއް އޮތްނަމަ، އެ ޖާގައަކަށް ދަހިވެތިވާށެވެ! އެހެނީ އެކަމުގެ ހެޔޮ، އިންތިހާއަށް އޮތަތީއެވެ. 

އާދޭހެވެ! ކަންއޮތީ މިހެން ކަމުގައި ވީނަމަވެސް، މިސްކިތުގެ ކުރީސަފަށް ޝައުގުވެރިވާ މީހުން މިހާރު އިންތިހާއަށް މަދެވެ. ގަމަތް ދިނުމާއި އެކު ނުވަތަ ސަފަށް ގޮވުމާއި އެކު، މިސްކިތުގެ ތަޅުމުން ފޫ ހިތްލައިލުންވެސް ގިނަ މީހުންނަށް ވަނީ ބުރައަކަށެވެ. މާ ފަހުން މިސްކިތައް އަރާ މީހުންވެސް ގޮސް ކުރީ ސަފު ފުރާލާއިރު، ކުރިން މިސްކިތައް އެރުނު ބައެއް މީހުނަށް އެ ނަސީބު ބޮޑުކޮށް ފަހިވެފައި އޮތެއް ކަމަކު، އެކަމަށް ޝައުގުވެރިކަމެއް ނުބަހައްޓައެވެ. މިއީ ހިތާމަ ހުރި ކަމެކެވެ.

ޖަމާއަތުގެ ސަފުތައް ތަރުތީބު ކުރަމުން ދާއިރު، ކުރީ ސަފުން ޖާގައެއް ލިބި، ދެވަނަ ސަފުގައި ހުންނަ މީހަކު ކުރީ ސަފަށް ޖެހިލަން ލިބޭ ފުރުސަތުގައިވެސް، އެ މަގާމަށް ދަހިވެތިކަމެއް ނުފެނެއެވެ. ފެންނަނީ ކޮންމެވެސް މީހަކު ދާނެ ކަމަށް ހީކޮށް، "ފާކުރާ" މަންޒަރެވެ! މިއީ ހިތާމަ ހުރި ކަމެކަމެކެވެ!

އަހަރެމެންގެ ތެރޭގައި މިސްކިތުގެ ކުރީސަފު ހޯދުމުގެ ޝައުގުވެރިކަން ކުޑަވަމުން މި ދަނީ ކީއްވެގެންތޯއެވެ! ދީނީ ޢިލްމުވެރިންގެ ދައުރު ކުޑައީތޯއެވެ! ދީނީ ގޮތުން އެހާ ހޭލުންތެރިކަން ނެތީތޯއެވެ! ނުވަތަ އެކަމުގެ ޝައުގުވެރިކަން ނެތީތޯއެވެ! ނުވަތަ ފަރުވާކުޑައީތޯއެވެ! ކޮންމެ ސަބަބެއް އޮތެއް ކަމަކު، އެހެން ނުހަދާށެވެ! މިސްކިތުގެ ކުރީސަފުން ޖާގައެއް ލިބޭތޯ ގަދައަޅާ މަސައްކަތް ކުރާށެވެ! ކޮންމެ ނަމާދަކަށް މިސްކިތައް ނުދެވިދާނެއެވެ! އެހެންކަމުން މިސްކިތައް ދެވޭ ހަމަ ކޮންމެ ނަމާދެއްގައި އެ ކުރީ ސަފު ލިބޭތޯ ބަލާށެވެ! މާތް ﷲ އީ މޮޅަށް ދެނެވޮޑިގެންވާ ދީލަތިވަންތަ އިލާހެވެ!