މަޝްހޫރު ދީނީ ޢިލްމުވެރިޔާ ޑރ. ޔާސިރް ޣާޛީ ގެ ދަރުހެއްގައި ޑރ. ޔާސިރް ވިދާޅުވީ އިންސާނުންނަށް ގިނަ ގިނައިން ދޭންވީ އެއް ނަޞޭޙަތަކީ ރުޅި ކޮންޓްރޯލް ކުރުން ނުވަތަ ރުޅި މަޑުކުރުމުގެ ނަޞޭޙަތް ކަމަށެވެ. އެކަމަށް އިޝާރާތް ކުރައްވާ ޑރ. ޔާސިރް ވިދާޅުވީ އެއްދުވަހަކު، ރަސޫލް ޞައްލަ ﷲ ޢަލައިހި ވަސައްލަމަގެ އަރިއަހުން ނަޞޭޙަތްޕުޅަކަށް އެދިވަޑައިގެން ދެންނެވި ޒުވާން ޞަޙާބީއަކަށް، ތިން ފަހަރު މަތިން ތަކުރާރުކުރައްވައި ނަޞޭޙަތް ދެއްވީ ރުޅި ކޮންޓްރޯލްކުރުމަށް ކަމަށެވެ.

ރުޅި ކޮންޓްރޯލުކުރުމަކީ ކޮންމެ މީހަކުވެސް އެންމެ ބޮޑަށް ސަމާލުކަންދޭންޖެހޭނެ ކަންތަކެވެ. ބައެއް މީހުންނަށް އަމިއްލަ ގޭތެރޭގައިވެސް ރުޅި ކޮންޓްރޯލެއް ނުކުރެވެއެވެ. ވަޒީފާގެ މާޙައުލުގައި ރުޅިގަދަކުރެވެއެވެ. އެންމެ ގާތް އެކުވެރިންނާއިއެކުގައި ހުރެފައިވެސް ރުޅިގަދަކުރެވެއެވެ. މަޖިލިސްތަކުގައި ރުޅި އިސްކުރެވެއެވެ. އަދި ބައެއް މީހުންނަށް މިސްކިތްތަކުގައިވެސް އެބަ ރުޅިގަދަކުރެވެއެވެ. 

ރުޅިއަކީ އިންސާނާގެ ޠަބީޢަތުގައި ލައްވަވާފައިވާ ކަމަކަށްވުމުން ކޮންމެ މީހަކަށްވެސް ރުޅިއައުދެވޭނެއެވެ. އެއީ ޠަބީޢީ ގޮތުން މައްސަލައެއްވެސް ނޫނެވެ. މައްސަލައަކަށްވަނީ ރުޅި ކޮންޓްރޯލްނުކުރެވުމެވެ. ރުޅިކޮންޓްރޯލު ނުކުރެވުމުން ކުރެވޭ ނުބައި ޢަމަލުތަކެވެ. ބުނެވޭ ނުބައިބަސްތަކެވެ. ނުކުންނަ ހިތި ނަތީޖާތަކެވެ.

ފަސޭހައިންރުޅި އާދެވޭ އަދި ރުޅި ކޮންޓްރޯލްނުކުރެވޭ ސަބަބުތަކުގެ ތެރޭގައި ޞިއްޙީ މައްސަލަތައްވެސް ހިމެނެއެވެ. ވީމާ ރުޅިކޮންޓްރޯލްނުކުރެވޭނަމަ ޑޮކްޓަރަކަށް ދައްކައިގެން ޝިފާހޯދަންވެސް މަސައްކަތްކުރަންޖެހޭނެއެވެ. އަދި އެކަމަށް އެމީހާއަށް ކުރެވެންހުރި ހުރިހާ މަސައްކަތެއްވެސް ކުރަންޖެހޭނެއެވެ.

ރުޅި ކޮންޓްރޯލްކުރަން ކުރަންހުރި ކަންތައްތަކުގެ ތެރޭގައި ރުޅިއައުމުން އައޫޛްކިޔުމާއި، ވުޟޫކުރުމާއި، ބަސްނުބުނެ ހިނދުކޮޅަކު މަޑުކޮށްލުމާއި، ކޮޅަށް ހުއްޓައި ރުޅި އަތުވެއްޖެނަމަ އިށީނުމާއި އިށީނދެ އިންދައި ރުޅިއަތުވެއްޖެނަމަ އޮށޯވެލުން ނުވަތަ ތަނެއްގައި ލެގިލުމާއި ރުޅިއައުމަކީ ޝައިޠޯނާގެ ސަބަބުން މެދުވެރިވާ ކަމެއްކަން ހަނދުމަކޮށް ﷲ ތަޢާލާގެ މަތިން ހަނދުމަކުރުމާއި ޛިކުރުކުރުން ފަދަ ކަންކަން ހިމެނޭ ކަމަށް ޑރ. ޔާސިރް ވަނީ ފާހަގަ ކުރައްވާފައެވެ.

މުޖުތަމައުތައް ހަލާކާ ފަސާދައިގެ މަގަށް ދީލައިލަނީ އެ މުޖުތަމައުތަކުގައި އުޅޭ ރުޅި ކޮންޓްރޯލު ނުކުރެވޭ މީހުންގެ ސަބަބުންނެވެ. އެބައިމީހުންގެ ރުޅި ގަދަ ވެގެން ދާ ހިނދެއްގައި އެބައިމީހުނަށް ހެޔޮ ނަސޭހަތެއް ދޭން ކެރޭ މީހަކު އެ މުޖުތަމައުތަކުގައި ނޫޅެއެވެ. އެފަދަ މީހުންގެ ރުޅި އެއްމެ ފަހުން ބަދަލުވެ ދަނީ އެފަދަ މުޖުތަމައުތަކުގައި ހިފާ ހަސަދައިގެ އަލިފާނަކަށެވެ. ނަފްރަތުގެ ކަށިތަކަކެށެވެ. އެހެންކަމުން މުޖުތަމައެއްގައި އުޅޭ ރުޅި ގަދަ މީހުންގެ ރުޅި ކޮންޓްރޯލް ކުރުމަށް އެ މުޖުތަމައެއްގެ އެންމެން ގުޅިގެން މަސައްކަތް ކޮއްދޭން ޖެހޭނެއެވެ. އެއީ އެ މުޖުތަމައަކަށާއި އެ ރުޅި ގަދަ މީހާއަށްވެސް ދެދުނިޔޭގެ ބާއްޖަވެރިކަން ހުރި ކަމެކެވެ.

އިންސާނުން ރުޅި އައުން ވަނީ ހަމަ އެކަނި ﷲ ގެ މަގުގައެވެ. ރުޅި އަންނަން ޖެހޭނީ ހަމައެކަނި ﷲ އަށް ޓަކައެވެ. އެނޫން އެއްވެސް ސަބަބެއް، މި އިންސާނާ ރުޅި އައުމުގައި ދެއްކޭކަށް ނެތެވެ. މާތް ﷲ އަހަރެމެން އެންމެންނީ ރުޅި މަޑު، ރުޅި ކޮންޓްރޯލް ކުރާ ބަޔަކު ކަމުގައި ލައްވާށިއެވެ! އާމީން!

 

ހަވާލާ: ޑރ. ޔާސިރް ޣާޛީ