އަހަރެމެން މުސްލިމުންގެ ތެރޭގައި ކިތައްމެ ގިނައިން އަޅުކަންކުރިނަމަވެސް އެކަމުން ލިބެންޖެހޭ ރޫޙާނީ ފައިދާ ނުލިބޭ ބަޔަކު އުޅެއެވެ. އޭގެ ތެރެއިން އެންމެ ޢާއްމު އެއްބާވަތުގެ މީހުންގެ ކިބައިން ފެންނާނެ ޢަލާމާތަކީ ރުޅިގަދަވެ ރުޅި ކޮންޓްރޯލްނުކުރެވުން ކަމަށް މަޝްހޫރު ދީނީ ޢިލްމުވެރިޔާ މުފްތީ މެންކް ވަނީ ވިދާޅުވެފައެވެ.

ދަންނާށެވެ! ކަމެއް ދިމާވި ނަމަވެސް ރުޅި އިސްކުރުމަކީ އެމީހާގެ ދަހިވެތިކަމުގެ ބޮޑުކަން އަނގައިދޭ ކަމެކެވެ. ރުޅިއަކީ ހައްލު ހޯދަން މަސައްކަތްކޮށް ހައްލެއް ނުފެނުމުން، އެންމެފަހުން ބޭނުންކުރަން އޮންނަ ހަތިޔާރު ކަމަށް ހަދާށެވެ. އެޙާލަތުގައިވެސް ރުޅި އަންނަން ޖެހޭނީ ހުއްދަ މިންވަރަށެވެ! އަތުންފައިން ބޮޑެތި ގޯސްތައް ހެދި، ދުލުން ނުބައިބަސްތައް ބުނެވޭ މިންވަރަކަށް ނޫނެވެ.

އެހެންކަމުން، ދިރިއުޅުމުގައި ދިމައިވާ ބައެއް ކަންކަމުން، ރުޅިއަކީ ފުރަތަމަ ބޭނުންކުރާ ހަތިޔާރަށް އެއްގޮތަކަށްވެސް ހަދައިގެން ނުވާނެއެވެ. ހަމަ އެއާއިއެކު މައްސަލަތައް ޙައްލުކުރަން ބޭނުންކުރާ ހަތިޔާރަކީ އޯގާތެރިކަން ކަމުގައި ހަދައިފިނަމަ މާފަސޭހައިން ގިނަ މައްސަލަތައް ޙައްލުކުރެވޭނެއެވެ. މުފްތީ މިހެން ވިދާޅުވީ މުފްތީގެ އަމިއްލަ ތަޖުރިބާއިން ކަންވެސް އޭނާ ވަނީ އެ ދަރުސްގައި ފާހަގަ ކޮށްފައެވެ.

ކަމެއް ދިމާވާއިރަށް ރުޅި އިސްކުރާނަމަ އެކަމުން އެނގިގެންދަނީ އެމީހަކު ނަމާދުކޮށް ރޯދަހިފައި އަދި ކީރިތި ޤުރުއާން ކިޔަވައި ޞަދަޤާތްދީ ހެދިނަމަވެސް އެކަންކަމުގެ ސަބަބުން ތިމާއަށް ލިބެން ޖެހޭ ރޫޙާނީ ފައިދާ ނުލިބޭ ކަމެވެ. އަޅުކަން ކުރުމުން ލިބެން ޖެހޭ ރޫޙާނީ ފައިދާ ލިބެމުން ނުދާނަމަ ޤަބޫލުކުރަން ޖެހޭނީ އެމީހަކު އިޞްލާޙްކުރަންޖެހޭ ގިނަ ކަންތައްތަކެއް އެބަހުރި ކަމެވެ. އެކަންކަމަށް ވިސްނައި، އަމަލުތައް އިޞްލާޙްކުރަން އަވަސްވެގަންނާށެވެ!

މުފްތީ ފާހަގަ ކުރާ ގޮތުގައި ގިނައިން އަތް އިސްކުރަނީ ފިރިހެނުންނެވެ. ފިރިހެނުންނަށް މުފްތީ ދޭ ނަސޭހަތަކީ ހަޤީޤީ ބާރު ހުރި މީހަކު އެމީހަކަށްވުރެ ބަލިކަށި މީހަކަށް އަތް އިސްކުރުމަކީ ކުރާނެ ކަމެއް ނޫނެވެ. ހަމަ އެފަދައިން ހެޔޮކޮށް ހިތަން ޖެހޭ މީހަކު ނިކަމެތިކޮށް ހިތުގައި ޖެއްސުމަކީވެސް ކުރާނެ ކަމެއް ނޫނެވެ.

ގިނަ ފަހަރު މިފަދަ މައްސަލަތައް ކުރިމަތިވެ އަނިޔާ ލިބެނީ އަންހެނުންނަށެވެ. ފިރިހެނުންނަށް މިފަދަ މައްސަލަތައް ކުރިމަތިވަނީ ނިސްބަތުން މަދުންނެވެ. މިއީ އަންހެނުންނަށްވުރެ އެތައް ގުނައަކަށް، ޖިސްމާނީގޮތުން ބާރު ގަދަ ފިރިހެނުން ލަދުގަންނަން ޖެހޭނެ ކަމެއްކަމަށް މުފްތީ ވަނީ ފާހަގަކޮށްފައެވެ. ހަމަ އެފަދައިން އަނބިންނާއި ދަރިންގެ ބެލެނިވެރިކަމާއި ހަވާލުވެހުރި މީހެއްގެ ހައިޞިއްޔަތުންވެސް ލަދު ގަންނަން ޖެހޭނެ ކަމެކެވެ. އެފަދަ އަމަލުތައް ކުރަނީ މިފަދަ އެއްވެސް ކަމަކަށް ހޭލުންތެރިކަމެއް ނެތް މީހުންނެވެ. އެމީހުންނަކީ ޖާހިލުން ކަމަށް ބުނެވޭ އެއް ސަބަބަކީވެސް އެއީއެވެ.

މިހިރަ މިހިރަ ކަންކަމަކީ އަޅުކަންތަކުން ހާސިލްކުރަން ޖެހޭ ރޫހާނީ ފައިދާތައް ހާސިލް ނުވުމުގެ ނަތީޖާއެވެ. އެހެންކަމުން އަޅުކަންތަކުގައި ރޫހާނީ ފައިދާ އޭގެ އެއްމެ ފުރިހަމައަށް ލިބޭތޯ ބަލަންވާނެއެވެ. އެކަން ކުރެވެން އޮތީ އަޅުކަންތަކުގައި އިހުލާސްތެރިވެ، އިހުސާންތެރިވެގެންނެވެ.

 

ހަވާލާ: މުފްތީ މެންކް