ޙަލާލުގޮތުގައި ކައިވެނިކޮށްގެން އުޅޭ އަނބިމީހާއާއި އެކު އެއްދާންކޮށް އޭނާގެ ޖިންސީ އެދުން ފުއްދާދިނުމަކީ ކުރެވޭ ޞަދަގާތެއް ކަމާއި، އެ ހިތްހަމަ ޖެހުން ލިބިގަތުން އެއީ އަނބިންގެ ޙައްގެއް ކަމަށް މަޝްހޫރު ދީނީ ޢިލްމްވެރިޔާ މުފްތީމެންކް ވިދާޅުވެއްޖެއެވެ.
މިކަމާ ގުޅޭގޮތުން ވާހަކަ ދައްކަމުން މުފްތީ މެންކް ވިދާޅުވީ ބައެއް ފިރިހެނުން އެމީހުންގެ އަނބިންގެ މި ހައްގުގެ މަތިން ހަންދާން ނެތޭ ކަމަށާ، މިކަމަށް ފަރުވާކުޑަ ކުރާ ފިރިން ﷲ އަށް ބިރުވެތިވާންޖެހޭ ކަމަށެވެ. މަސައްކަތުން އެނބުރި ގެއަށް އައުމަށްފަހު ވަރުބަލި ވީ ކަމަށްބުނެ އަނބިމީހާއަށް ދޭންވާ ސަމާލު ނުދޭ ފިރިން އުޅޭކަމަށް ފާހަގަކޮށް، ކީރިތި ރަސޫލާގެ ހަޔާތްޕުޅުން މިސާލު ނަންގަވާ މެންކް ވިދާޅުވީ އެކަލޭގެފާނުގެ އަނބިއަނބިކަނބަލުންގެ މައްސަރު ދުވަސްވަރުވެސް، ޖިމާޢުވުން ނޫން އެތައް ގޮތަކުން ރަސޫލާ އެކަނބަލުންނާ ލޯބި ކުރެއްވިކަމަށާ، އިސްލާމްދީނުގެ މަތިވެރި އުސޫލުތަކުގައި ހިފަހައްޓައިގެން ޒަވާޖީ ހަޔާތްކުރިއަށް ގެންދާނަމަ ކޮންމެ ދުވަހަކީ އުފާވެރިކަމުން ފުރިގެންވާ ދުވަހެއްކަމަށެވެ. އަނބިމީހާއާ ލޯބިކުރުމަށް ރޭގަނޑުގެ ވަގުތު ހޭދަކުރުމަކީ ރޭއަޅުކަން ކުރުންފަދަ ކަމެއް ކަމަށާ، ނަމަވެސް ދެމަފިރިން ނިދަންވަދެ މެންދަން ވަންދެން ފޯނާއި ކުޅެން ތިބޭކަމީ ހިތާމަ ކުރަން ޖެހޭ ކަމެއްކަން ފާހަގަކުރެއްވިއެވެ.
އިތުރަށް މެންކް ފާހަގަކުރެއްވިގޮތުގައި، އަނބިމީހާއާއި އެކުގައި ޖިމާޢު ވުމަށްފަހު ފަތިސްނަމާދުގެ ކުރިން ހިނައިގަތުމުން އެކަން ގޭގައި އުޅޭ އެންމެނަށް އެނގުނު ނަމަވެސް އެކަމާ ލަދުވެތި ވާން ނުޖެހޭ ކަމަށެވެ. އެއީ އިސްލާމްދީނުގައި އެކަން ކުރަން އަންގަވާފައިވާ ގޮތްކަމަށް މެންކް ވިދާޅުވިއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން