ސްރީލާންކާގައި މަރުވެފައި އޮއްވާ އިއްޔެ ފެނުނު ދ. މީދޫ މާކޯނި 24 އަަހަރުގެ އަފްހަމް ނަސީރުގެ މަރާއި ގުޅިގެން ހިންގާ ތަހުގީގު ވަރަށް ހަލުވި ސްޕީޑްގައި ކުރިއަށް އެބަ ގެންދެއެވެ.

އެގޮތުން އަފްހަމް އާ އެންމެ ގާތް އަދި އެންމެ ފަހުން ދިމާވި ދެ އެކުވެރިންގެ ބަޔާން، ލަންކާ ފުލުހުން ރޭވަނީ ނަގާފައެވެ. 7 ގަޑިއިރަށް ދެމިގެން ދިޔަ މި ބައްދަލުުމުގައި އެންމެ ފަހުން އަފްހަމް އާ ބައްދަލު ވެ ދެކެވުނު ވާހަކައާއި އަފްހަމްގެ މޫޑު ހުރިގޮތް ވަރަށް ތަފްސީލްކޮށް އަހާ އޮޅުން ފިލުވާފައިވެއެވެ. މިހާ ގިނަ ވަގުތަށް ދެމިގެންދާ ގޮތަށް ތަހުގީގީ ބަޔާންތައް ނަގާފައި ވަނީ، މި މައްސަލަ އަވަސްކޮށް މިއަދުގެ މެންދުރާއި ހަމައަށް ޕޯސްޓް މޯޓަމްގެ މަސައްކަތް ފަށަން ގަސްތު ކުރާތީ ކަމަށް ފުލުހުން ވަނީ އަފްހަމްގެ ރަޙްމަތްތެރިންނަށް އަންގާފައެވެ.

މި ބައްދަލުވުމުގައި އަފްހަމްގެ ހަށިގަނޑުގެ ކައިރިން ފެނުނު ދަބަހަކީ އޭނާގެ އެއްޗެއްތޯ ވަނީ އަހާ ޔަގީންކޮށްފައެވެ. ނަމަވެސް ދަބަހުން އަދި އޭނާގެ ހަށިގަނޑު އޮތް ތަނުން އަފްހަމްގެ ފޯނާއި ލެޕްޓޮޕް އަދި އެއަރޕޮޑް ގެ އެއްފަޅި ފެނިފައި ނުވާތީ އިތުރަށް އެކަންކަން ބަލަމުން އަންނަ ކަމަށް ވެސް ފުުލުހުން ހާމަކުރިއެވެ.

ބަޔާންނެގި ދެ ރަޙްމަތްތެރިންގެ ތެރެއިން އެކަކީ ދިވެއްސެކެވެ. ދެން ހުރީ އަފްހަމްއާއި އެކުގައި ކިޔަވާ، ލަންކާއަށް ނިސްބަތްވާ ކުއްޖެކެވެ. މި ދެކުދިން ރޭގެ ދަންވަރު 00.30 ގައި ވެއްލަވައްތަ ޕޮލިހަށް ގެންދިޔަގޮތަށް ބަޔާން ނެގުމަށް ފަހު ފޮނުވާލީ ހެނދުނު 7.30 ގައެވެ.

އަފްހަމް އަކީ އޭނާގެ ކޮލެޖްގެ ރަޙްމަތްތެރިޔާ އާއި އެކު ކޮންމެ ދުވަހަކު ކަހަލަ ގޮތަކަށް ވެއްލަވައްތަ ބީޗަށް ދުވަންދާ ދާ ކުއްޖެކެވެ. އަފްހަމްގެ ހަށިގަނޑު ފެނިފައިވާ މިގޮތަށް ދުވަންގޮސް އާންމުކޮށް އެމީހުން މަޑުކުރާ ބެންޗް ކާރިންނެވެ.

އަފްހަމްގެ ހަށިގަނޑު ރާއްޖެގެނައުމަށް އެދި އެކަމާގުޅުން ހުރި ކަންކަން ރާއްޖޭގެ ފޮރިން މިނިސްޓްރީ މެދުވެރިކޮށް ކުރަން ގަސްދުކުރާ ކަމަށް އޭނާގެ އާއިލާގެ މެމްބަރަކު ވަނީ މައުލޫމާތު ދީފައެވެ.