މި މަހުގެ 5 ވަނަ ދުވަހު ސްރީލަންކާގެ ދެހިވަލަ އިން ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނުނު، ދ. މީދޫ މާކޯނި 24 އަހަރުގެ އަފްހަމް ނަސީރުގެ އޮޓޮޕްސީ ނިމި ޖަނާޒާގެ ތައްޔާރީތައް ފެށިއްޖެއެވެ.

މިއަދު ހެދުނުން ފެށިގެން ކަޅުބޯވިލަ ހޮސްޕިޓަލުގައި ކުރިއަށް ދިޔަ އޮޓޮޕްސީގެ ކަންކަން ކުރިއަށް ދިޔައީ އާއިލާއަށް ހަށިގަނޑު ދެއްކުމަށްފަހުއެވެ.

އަފްހަމްގެ ޖަނާޒާ އޮންނާނީ ޖާވައްތަ މިސްކިތުގައި މިރޭ ޢިޝާ ނަމާދަށް ފަހުއެވެ.

އާއިލާގެ ފަރާތުން "ތީރު" އާ ވާހަކަ ދައްކަމުން އަފްހަމްގެ ބޭބެ އަފްރަހު ބުނީ، އޮޓޮޕްސީގެ ރިޕޯޓް މާދަމާގެ ވަގުތެއްގައި ލިބޭނެ ކަމަށް ބެލެވޭ ކަމަށާ، މަރުގެ އަސްލު ސަބަބު މި ރިޕޯޓަށް ފަހު ސާފު ވެގެން ދާނެކަމަށެވެ.

އަފްހަމްގެ ކުއްލި މަރާއި ގުޅިގެން އާއިލާގެ ފަރާތުން އަފްހަމްގެ މަންމަ، ބައްޕަ އަދި ދޮންބައްޕަގެ އިތުރުން ބޭބެ ލަންކާއަށް ގޮސްފައިވަނީ ރޭގެ ވަރަށް ދަންވިފަހުންނެވެ.

ސްރީލަންކާގެ ފުލުހުން ކުރިއަށް ގެންދާ ތަހުގީގަށް އެއްބާރުލުން ދިނުމަށް ދިވެހި ފުލުހުންގެ ޓީމެއްވެސް ވަނީ ލަންކާއަށް ގޮސްފައެވެ.