މި މަހުގެ 5 ވަނަ ދުވަހު ސްރީލަންކާގެ ދެހިވަލަ އިން ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނުނު، ދ. މީދޫ މާކޯނި 24 އަހަރުގެ އަފްހަމް ނަސީރުގެ އޮޓޮޕްސީ ނިމި ރޭވަނީ ޖަނާޒާގެ ކަންކަން ނިންމާލަފައެވެ. ސްރީލަންކާގެ ޖާވައްތަ މިސްކިތުގައި އޮތް ޖަނާޒާގައި އާއިލާގެ ގާތް މީހުންބައިވެރިވިއެވެ.

އޮޓޮޕްސީގެ ކުރިން އާއިލާ އަށް ވަނީ އަފްހަމްގެ ހަށިގަނޑު ދައްކާފައެވެ. އަދި ހަށިގަނޑު ބެލުމަށްފަހު އާއިލާގެ ފަރާތުން ވާހަކަ ދައްކަމުން އަފްހަމްގެ ބޭބެ ބުނީ، އަފްހަމްގެ ހަށިގަނޑުގައިވަނީ އެންމެ ޒަޚަމެއް ކަމަށާ ނަމަވެސް މި ޒަޚަމަކީ ވަރަށް ބޮޑު އަދި ވަރަށް ފުންކޮށް ކަރުގައި އިން ޒަޚަމެއް ކަމަށެވެ.

އަފްހަމްގެ މަރަށް 5 ދުވަސް ވެގެން ދިޔައިރުވެސް އަފްހަމް އެންމެ ފަހުވަގުތު ހިފައިގެން އުޅުނު ފޯނާއި ލެޕްޓޮޕް ހޯދިފައެއް ނުވެއެވެ. އަފްހަމްގެ އާއިލާއިން ގަބޫލު ކުރާގޮތުގައި ފޯނު ފެނިއްޖެނަމަ މި ތަހުގީގަށް ބޭނުންވާ ވަރަށް މުހިންމު މައުލޫމާތުތަކެއް ލިބުމުގެ ފުރުސަތު ވަރަށް ބޮޑެވެ.

އިއްޔެ ކަޅުބޯވިލަ ހޮސްޕިޓަލުގައި ހެދުނު އޮޓޮޕްސީގެ ރިޕޯޓް މިއަދުގެ ވަގުތެއްގައި ލިބޭނެ ކަމަށް ބެލެވެއެވެ. މިވަގުތު ކުރިއަށް ދަނީ ކޯޓުން އަފްހަމްގެ މަރުގެ ސެޓްފިކެޓް ހޯދުމުގެ މަސައްކަތެވެ.

އާއިލާގެ ފަރާތުން އަފްހަމްގެ ބޭބެވަނީ ދިވެހި ހައިކަމިޝަންގެ މުވައްޒަރުންނާއި މި މައްސަލައާއި ގުޅިގެން ލަންކާއަށް ދިޔަ ދިވެހި ފުލުހުންގެ ޓީމަށް ފަށްފަށުން ޝުކުރުވެރިވާކަން ހާމަކޮށްފައެވެ. ޒުވާން ކޮއްކޮގެ ކުއްލި މަރާއި ގުޅިގެން އެ ދެފަރާތުން އާއިލާއަށް ދެމުންދާ އެހީތެރިކަން އުމުރަށް ހަނދާންބަހައްޓާނެކަމަށް އާއިލާއިން ހާމަކުރެއެވެ. އިއްޔެ ހެދުނުން ފެށިގެން ރޭގެ ޖަނާޒާ ނިމުމާއި ހަމައަށް ހައިކަމިޝަންގެ މުވައްޒަފުންނާއި ދިވެހި ފުލުހުން އަންނަނީ އަފްހަމްގެ އާއިލާ އާ ވަރަށް ގާތުން މަސައްކަތްކޮށް، އާއިލާއަށް ހިތްވަރުދެމުންނެވެ. އަދި މިއަދުވެސް ހެދުނުން ފެށިގެން ތިބީ އަފްހަމްގެ އާއިލާ އާއި އެކުގައެވެ.

ސްރީލަންކާގެ ފުލުހުން ކުރިއަށް ގެންދާ ތަހުގީގަށް އެއްބާރުލުން ދިނުމަށް ދިވެހި ފުލުހުންގެ ޓީމެއްވެސް ވަނީ ލަންކާއަށް ގޮސްފައެވެ. ނަމަވެސް މިމަރާއި ގުޅޭ ގޮތުން މާގިނަ ކަންކަމެއް އަދި ހޯދިފައެއް ނުވެއެވެ. އަފްހަމްގެ މަރުގެ މައްސަލާގައި 3 މީހެއްގެ ބަޔާން ނަގާ، އަފްހަމް އުޅުނުގެ ބަލާ ފާސްކޮށްފައިވެއެވެ. ނަމަވެސް މި މައްސަލާގައި އެއްވެސް މީހަކު ހައްޔަރުކުރި ކަމެއް ފުލުހުން ހާމައެއް ނުކުރެއެވެ.