މިއަހަރުގެ އަޟްޙާ ޢީދު ވަރަށް ކުލަގަދަކޮށް ބ.ދަރަވަންދޫގައި!

1443 ވަނަ އަހަރުގެ އަޟްޙާ ޢީދު ވަރަށް ކުލަގަދަކޮށް ބ.ދަރަވަންދޫގައި ފާހަގަކުރުމަށް އެރަށު ކައުންސިލުންނާއި ރައްޔިތުން އަދި އެހެނިހެން ފަރާތްތައް ވެސް ގުޅިގެން މަސައްކަތް ފަށައިފިއެވެ.

އެގޮތުން ދުވަހަށް ވަމުންދާ ތައްޔާރީތަކާބެހޭ ގޮތުން 'ޓީވީއެމް'ގެ ހެނދުނު ހެނދުނާ ޕްރޮގްރާމުގައި ވާހަކަފުޅު ދައްކަވަމުން ދަރަވަންދޫ ކައުންސިލްގެ ރައީސް ޢަލީ ސަމީޙް ވިދާޅުވެފައިވަނީ ދަރަވަންދޫއަކީ އެންމެ ކުރީއްސުރެ ވެސް ވަރަށް ކުލަގަދަކޮށް ޢީދު ފާހަގަކުރަމުން އައި ރަށެއް ކަމަށާއި ނަމަވެސް ފަހަކަށް އައިސް ރަށުގައި ސިޔާސީ ކަންތައްތައް އުފެދިގެން ޢީދުގެ ފޯރި ތަންކޮޅެއް ކުޑަވެ، އަދި ވޭތުވެ މިދިޔަ ދެތިން އަހަރު ވެސް ކޯވިޑް-19ގެ ސަބަބުން އެއްވެސް ވަރަކަށް ޢީދު ފާހަގަ ނުކުރެވިފައިވާ ވާހަކައެވެ. އެހެންކަމުން މިއަހަރުގެ ޢީދު އޭގެ ދެގުނައަށް ފޯރިގަދަވާނެ ކަމަށާއި މިހާތަނަށް ދަރަވަންދޫގެ ރައްޔިތުން ނުދެކޭ ފަދަ ޢީދަކަށް ވެގެންދާނެކަމީ ޝައްކެއް ވެސް އޮތް ކަމެއް ނޫން ކަމަށް، ސަމީޙް ވަނީ ވިދާޅުވެފައެވެ. 

އެގޮތުން ބ.ދަރަވަންދޫގެ ޢީދު ކުޅިވަރުތައް ބާއްވަން ރާވާފައިވަނީ ދެޖިންސު މަސްހުނި ނުވެ ކުޅިވަރުތައް ކުޅެވޭ ގޮތަށެވެ. އަންހެނުންނަށް ޚާއްޞަކޮށް ސަޤާފީ ކުޅިވަރުތަކެއް ރޭވިފައިވާއިރު އޭގެތެރޭގައި ރަށުން ބޭރުން އަންނަ މެހެމާނުންނަށް އަޝްރަފްތާގެ ނެށުމެއް ހުށަހެޅުމާއި، އުމުރުން ދުވަސްވީ މީހުންނަށް ޚާއްޞަކޮށް ކުރުފަލިޖެހުން ފަދަ ކުޅިވަރުތައް އޮންނާނެއެވެ. އަދި ހަމައެއާއެކު ފިރިހެން ބޭފުޅުންނަށް ޚާއްޞަކޮށްގެން މަންގަލަން ދަނޑިޖެހުމާއި ދަރަވަންދޫގެ އެންމެ ޚާއްޞަ އެއް ކުޅިވަރު ކަމަށްވާ ބޮޑުމަސް ބޭނުމުގެ ކުޅިވަރު ޒަމާނަށް ފައްތައިގެން އެންމެ ފުރިހަމަ ގޮތަކަށް ކުރިއަށް ގެންދަން ވަނީ ރޭވިފައެވެ.

ދަރަވަންދޫ ކައުންސިލްގެ ރައީސް ޢަލީ ސަމީޙް ވިދާޅުވި ގޮތުގައި މިހާރު ދަނީ އެކިއެކި ކުޅިވަރުތަކަށް ބޭނުންވާ ސާމާނުތައް ތައްޔާރުކުރަމުންނެވެ. އެގޮތުން މިއަހަރުގެ ފިޠުރު ޢީދު ނިމުނު ހިސާބުން ރަށުގައި "ޢީދު އޮފީސް"ގެ ނަމުގައި ޖަގަހައެއް ހުޅުވާ، އަޟްޙާ ޢީދަށް ތައްޔާރުވުން އެ ޖަގަހައިގައި މެދުކެނޑުމެއްނެތި ކުރިއަށްދާކަމެވެ. އަދި ރަށުގެ އެކި ބޮޑެތި މަގުމަގުގައި ދިދަ ދެމުމަށްޓަކައި އަންހެން ބޭފުޅުން ވެސް ކޮންމެ ދުވަހަކުވެސް މަސައްކަތް ކުރަމުންދާކަން ސަމީޙް ފާހަގަކޮށްފައިވެއެވެ. މިކަމާ ގުޅިގެން އިތުރަށް ވާހަކަ ދައްކަވަމުން ދަރަވަންދޫ ކައުންސިލްގެ މެމްބަރު ފަރަހަ އާދަމް ވިދާޅުވެފައިވަނީ މިއަހަރުގެ އަޟްޙާ ޢީދުގައި ކުރިއަށްވުރެ ވެސް ގިނަ މީހުން ބައިވެރިކޮށްގެން ޙަރަކާތްތައް ކުރިއަށް ގެންދަން ގަސްދުކުރާކަމެވެ. 

ދަރަވަންދޫގެ ހުރިހާ ރައްޔިތުންހެން އަޟްޙާ ޢީދުގެ ކުޅިވަރުތަކަށް ތައްޔާރުވަމުން ދާއިރު ފާހަގަކޮށްލަންޖެހޭ އަނެއް ކަމަކީ މިފަހަރުގެ ޢީދުގައި އަވައްޓެރި މަލިކު ބޭފުޅުންގެ އައިޓަމްތަކެއް ވެސް ބާއްވަން ހަމަޖެހިފައިވުމެވެ. އެގޮތުން މަލިކު ބޭފުޅުންގެ ސްޓޭޖް ޝޯވ އާއި އެބޭފުޅުންގެ ސަޤާފަތުގެ އެކިއެކި ކަންކަން ދައްކާލުން އޮންނާނެއެވެ. "މަގޭ ޢީދު"ގެ ނަމުން ނަން ދީގެން ދަރަވަންދޫގައި ޢީދު ފާހަގަކުރުމަށް ތައްޔާރުވަމުންދާއިރު މިފަހަރުގެ ޢީދަކީ 03 ދުވަހުގެ ޢީދެއް ނޫން ކަމަށާއި ޖުލައި 07 ވަނަ ދުވަހުން ފެށިގެން 14 ވަނަ ދުވަހާ ހަމަޔަށް މެދުކެނޑުމެއް ނެތި ކުޅިވަރުތައް ކުރިއަށްދާނެކަމަށް ސަމީޙް ވަނީ ވިދާޅުވެފައެވެ. އަދި ކުޅިވަރުތަކުގެ ތެރޭގައި މުބާރާތެއް ގޮތަށް ވާދަކުރެވޭ ޙަރަކާތްތައް ކަމަށްވާ ރިލޭ ރޭސް، މަސްރޭސް އަދި ތުވާލި ބޯޅަ ފަދަ ޙަރަކާތްތައް ވެސް އޮންނާނެއެވެ. އަދި މީގެ އިތުރުން ސްކޫލް ކުދިންނަށް ޚާއްޞަކޮށް ޢާއިލީ ހަވީރެއް ބޭއްވުމަށް ވެސް ވަނީ ހަމަޖެހިފައެވެ. 

މި ޢީދު ޙަރަކާތްތައް ޝަރަފުވެރި މެހެމާނަކަށް ނާއިބުރައީސް ފައިސަލް ނަސީމް ވަޑައިގަންނަވާ ގޮތަށް ހަމަޖެހިފައިވުމުން ނާއިބު ރައީސާއެކު ޢީދު ސަލާމްކުރުން އޮންނާނެ ވާހަކަ ވެސް ސަމީޙް ވަނީ ފާހަގަކުރައްވާފައެވެ.