އެމެރިކާގެ މަޝްހޫރު ބާސްކެޓް ކުޅުންތެރިޔާ މައިކަލް ޖޯޑަން ކުރިން ބޭނުން ކޮށްފައިވާ ޖާޒީ އެއް ބޮޑު އަގުގައި ނީލަމެއްގައި ވިއްކާލައިފިއެވެ. މި ޖާޒީ ވިއްކާލީ 1.38 މިލިޔަން ޑޮލަރަށެވެ. 1982 ގައި ނޯތު ކެރޮލައިނާ ޔުނިވަސިޓީގެ ޓާރް ހީލްސް އަށް ޖޯޑަން ކުޅުނު އިރު ބޭނުންކުރި މިޖާޒީ ވިއްކައިލީ ހެރިޓޭޖް އޮކްޝަނުން އިންތިޒާމުކޮށްގެން ހޮނިހިރު ދުވަހު ބޭއްވި ނީލަމެއްގައެވެ. މިޖާޒީ ބޭނުން ކޮށްފައިވަނީ 2 ސީޒަން އަކުއެވެ. އެއީ 1982 ވަނަ އަހަރާއި 1983 ވަނަ އަހަރެވެ. އެ ޖާޒީ ގައި ބޭނުން ކޮށްފައިވަނީ މަޑު ނޫކުލައާއި ހުދު ކުލައެވެ.

މީގެ ކުރިން ވެސް ޖޯޑަންގެ ޖާޒީއެއް ނީލަމެއްގައި ވިއްކާފައިވެ އެވެ. އެއީ 1986-1987 އަށް އޭނާ ކުޅުނު ޝިކާގޯ ބުލްސް އަށް ކުޅުނު އިރު ބޭނުންކުރި ޖާޒީ އެވެ. ހެރިޓޭޖުން އިންތިޒާމުކުރި އެ ނީލަމުގައި އެ ފަހަރު ޖާޒީ ވިކުނީ 480،000 ޑޮލަރަށެވެ.

ބާސްކެޓް ބޯޅަ ކުޅެގެން އެންމެ ފުރަތަމަ މިލިޔަނަރަކަށް ވުމުގެ ޝަރަފު ހޯދާފައިވާ 58 އަހަރުގެ މައިކަލް ޖޯޑަން އަކީ  ޝިކާގޯ ބުލްސް އާއި އެކު ޗެމްޕިއަންޝިޕް 6 ފަހަރަށް ހޯދާފައިވާ ކުޅަދާނަ ކުޅުންތެރިއެކެވެ.

ޝާލެޓް ހޯނެޓްސް ކިޔާ އަމިއްލަ ބާސްކެޓް ޓީމެއް ވެސް އޮންނަ ޖޯޑަން އަށް "ބާސްކެޓްބޯލް ހޯލް އޮފް ފޭމް" ގެ ޝަރަފު ވެސް ލިބިފައިވެ އެވެ.