ހެނދުނުގެ ރަން ދޯދިތަކުން ކައުނު ފަވާލައި، ގަސްތަކުގެ ތެރެއިން ޖެހެމުންދިޔަ ފިނި ރޯޅިން މުޅި މާހައުލަށް ގެނެސްދެނީ ހިތްގައިމު އަމާންކަމެކެވެ. ދުރުން އިވޭ ކަނޑުގެ ރާޅުތަކުގެ އަޑުން ކޮންމެ އިންސާނެއްގެ ހިތަށް ވެސް ތާޒާކަން ގެނެސްދޭނެ ފަދަ ހިތްފަސޭހަ ހެނދުނެކެވެ. ނަމަވެސް، ކޮޓަރީގެ ކުޑަދޮރު ކައިރީގައި އިން އާލިޔާގެ ހިތަކަށް އެއިން އެއްވެސް އަލިކަމަކުން ދިރުމެއް ނުލިބުނެވެ. އެހާ ރީތި އުޑެއްގެ ދަށުގައި މިފަދަ ނާމާން އަނދިރިކަމެއް ވަންހަނާވެފައި އޮވެދާނެ ކަމާމެދު އޭނާ އިނީ ބިރުން ފިތްކަނޑައިގެންދާ ހާލުގައެވެ. ނިދި ގެއްލި، ގޭތެރެއިން އިވޭ ކޮންމެ ކުޑަ އަޑަކަށް ސިހިސިހި އިން އާލިޔާ މަސައްކަތްކުރީ ހުރިހާ ކަމެއް އާދައިގެ ގޮތުގައި ދައްކައިގެން އެ ބިރުވެރިކަމާ ދުރުވެވޭތޯއެވެ. ނަމަވެސް އެ އުއްމީދު ވިއްސިވިހާލިވީ މެންދުރުފަހު އޭނާގެ ފޯނަށް އައި މެސެޖަކުންނެވެ. އެއީ ނުދަންނަ ނަންބަރަކުން ފޮނުވާފައިވާ ފޮޓޯއެކެވެ. ފޮޓޯއިން ފެންނަނީ ހަމަ އެވަގުތު އާލިޔާ ކުޑަދޮރު ކައިރީގައި އިން މަންޒަރެވެ. އެ ފޮޓޯ ނަގާފައިވަނީ ކޮޓަރީގެ އެތެރެއިން، އޭނާގެ ފަހަތުންނެވެ. ފޮޓޯގެ ތިރީގައި ލިޔެފައި އޮތެވެ: "އާލިޔާގެ އަވިދޯދިތައް ތި މޫނުގައި ބީހިލުމުން ތި ސޫރަ މާ ބޮޑަށް ވެސް ފުރިހަމައެވެ." އާލިޔާގެ ދެއަތް ގަނޑުފެންކޮޅެއްހެން ފިނިވެގެން ދިޔައެވެ. ކުޑަދޮރުގެ ފަރުދާ ކަހާލައި، އެނދު ދަށާއި ކޮޓަރީގެ ހުރިހާ ދިމާއެއް ހޯދިއިރު ވެސް އެއްވެސް މީހެއްގެ ހިލަމެއް ނެތެވެ.
އިރުއޮއްސި އަނދިރިވުމުން، އާލިޔާ ފާޚާނާގެ ލޯގަނޑު ކުރިމައްޗަށް ހުއްޓުނީ މޫނުމަތިން ފެންނަން ހުރި ވަރުބަލިކަން ފިލުވައިލުމަށެވެ. އިސްތަށިގަނޑު އޮމާންކުރަން ހުއްޓައި، ލޯގަނޑުން އޭނާގެ ފަހަތުގައި ހުރި ސިފައެއް ފެނި ހުއްޓުން އެރިއެވެ. އެއީ ކަޅު ހެދުމެއްގައި ހުރި، ހިތްގައިމު ރީތި ސިފައެއް ލިބިފައިވާ ޒުވާނެކެވެ. ނަމަވެސް އޭނާގެ ދެލޮލުގައި ވަނީ އިންސާނަކަށް ނުއުފުލޭ ފަދަ ބިރުވެރި އަނދިރިކަމެކެވެ. އާލިޔާ ފަސްއެނބުރި ބަލައިލިއިރު އެތަނުގައި އެއްވެސް މީހަކު ނެތެވެ. އަލުން ލޯގަނޑަށް ބަލައިލިއިރު، އެ ސިފަ ހަމަ އެހުރި ގޮތަށް ހުއްޓެވެ. އޭނާ މަޑުމަޑުން އަތް އުފުލައި ލޯގަނޑުގައި އަތް ޖައްސައިލުމަށްފަހު، ހިނިތުންވެލަމުން ބުންޏެވެ.
"އާލިޔާގެ ތި ލޮލަށް އަހަރެން ފެނިއްޖެ ދޯ ." ބިރުން ފިއްކަނޑައިގެން ގޮސް އާލިޔާ ދުވެފައި ނުކުތް ނަމަވެސް، ކޮރިޑޯގެ ބޮކިތައް ކުއްލިއަކަށް ނިވި، މުޅިތަން އަނދިރިވިއެވެ. އެވަގުތު އޭނާގެ އަތުކުރީގައި ގަނޑުފެން ފަދަ ފިނި އަތަކުން ވަރަށް ބާރަށް ހިފެހެއްޓިއެވެ. ތަދުން ގޮސް ހަޅޭއްލަވައިގަންނަން އުޅެނިކޮށް، ކަންފަތްދޮށުން ވައިއަޑަކުން ބުނެލި އަޑު އިވުނެވެ. "ކީއްވެ އަހަރެން ދެކެ ބިރުން ތި ދުވަނީ؟" މަންމަ ދުވެފައި އައިސް އަލި އަޅުވާލުމާއެކު އެ އަތް ގެއްލިގެން ދިޔައެވެ. އާލިޔާގެ އަތުކުރީގައި ރަތްވެފައިވާ އިނގިލީގެ ނިޝާންތައް ހުއްޓެވެ. އެކަމަކު އާލިޔާއަށް އެންމެ ބޮޑު ސިހުމެއް ލިބުނީ މަންމަގެ މޫނުމަތިންނެވެ. މަންމަ ހުރީ ކަންބޮޑުވެފައި ނަމަވެސް، އެއްވެސް ވަރަކަށް ހައިރާންވެފައެއް ނޫނެވެ. މަންމަ އެފަދަ ކަމަކަށް އިންތިޒާރުކުރަމުން ދިޔަ ފަދައެވެ. އެރޭ ނިދީގެ ތެރޭގައި ވެސް އާލިޔާއަށް ފެނުނީ ނާމާން ހުވަފެނެކެވެ. އެ ޒުވާނާ އެތައް ޒަމާނެއް ވަންދެން އޭނާގެ އިންތިޒާރުގައި ހުރި ވާހަކައާއި، އިންސާނަކަށް އާލިޔާ ޖަހައިގަންނަން ފުރުސަތު ނުދޭނެ ކަމަށް ބުނެ ކުރި ވަރުގަދަ އިންޒާރެވެ. ބިރުން ހޭލެވުނު ވަގުތު ފޯނަށް އައިސްފައި އޮތީ ހަމަ އެ ޖިންނީގެ މެސެޖެކެވެ. އާލިޔާ އިސްއުފުލައި ކޮޓަރީގެ ލޯގަނޑާ ދިމާއަށް ބަލައިލިއިރު، މުޅި ލޯގަނޑު ވަނީ އަނދިރިވެފައެވެ. އެ އަނދިރިގަނޑުގެ ތެރެއިން އެ ޒުވާނާގެ މޫނު ފާޅުވެ، ލޯގަނޑުގައި ތުންފަތް ޖައްސައިލުމާއެކު، ބިއްލޫރިގަނޑު ރެނދުލައިގެން ދިޔަ އަޑު މުޅި ކޮޓަރީގައި ގުގުމައިގަތެވެ. "އަރާމުގަ ނިދާލާ. ކުރިޔަށް އޮތްތާނގަ އާލިޔާވާނީ އަހަރެންގެ އަނބިމީހާއަށް". ފާރުތަކުގެ ތެރެއިން އެ ވައިއަޑު އިވިގެން ދިޔައެވެ. ލޯގަނޑުގައި އެޅި ރެނދު ފުޅާވަމުން ދިޔައިރު އާލިޔާއަށް ޔަގީންވީ އެންމެ ކަމެކެވެ. އެ ނުފެންނަ މަޚްލޫގު ހަމައެކަނި އޭނާއަށް ފާރަލަނީކީ ނޫނެވެ. އޭނާ ދުނިޔެއަށް ނުކުމެ، އާލިޔާ ގެންދިއުމަށް ދަނީ ފިޔަވަޅު އަޅަމުންނެވެ.
- ނުނިމޭ-