އަޅުގަނޑުމެންގެ ތެރޭގައި ވަރަށް އާންމުކޮށް ފެންނަ މަންޒަރެކެވެ. ކޮފީތައްޓެއް ހިފައިގެން އިންނަ މީހާގެ ދެ އިނގިލި މެދުގައި ސިގަރެޓެއް އިންނާނެއެވެ. ސިގަރެޓެއް ބޯން އިށީންނަނަމަ ކޮފީ ތައްޓެއް ކޮންމެހެން ބޭނުންވެއެވެ. ސިގަރެޓަކީ އެއަށް ދެވިހިފާ އަދި އޭގެ ސަބަބުން ވަރަށް ގިނަގުނަ ގެއްލުންދޭ އެއްޗެއްކަމުން، ސިގިރެޓާއި މީހުން ދުރުކުރުމަށް ވަކާލާތު ކުރާ މީހުން ވަރަށް ގިނައިން މިކަން މިހެން ނުކުރުމަށް އިރުޝާދު ދެއެވެ. ސިގަރެޓާ ނުލާވެސް ކޮފީ ބޮވޭނެ ކަމާ ސިގަރެޓް ބުއިމަކީ "ކޫލް" ކަމެއް ނޫން ކަމަށް ބުނެއެވެ.

ނަމަވެސް މިކަމުގެ ސަބަބުން ދިމާވާ އެންމެ ބޮޑު ގެއްލުމުގެ ވާހަކަ އެހާ ތިލަކޮށް ކިޔާދެވިފައެއް ނުހުރެއެވެ. އެހެންކަމުން ސިގަރެޓާއި އެކުގައި ކޮފީ ބުއިމަކީ ޒަމާނުއްސުރެ އަޅުގަނޑުމެން ދިވެހިންގެ މެދުގައި ވެސް ހިނގަމުން އަންނަ އާދައެކެވެ. މީހުން ސިގަރެޓް ބޮނީ އޭގައި ހިމެނޭ ނިކޮޓިންގެ އެހީގައި ނާރުތަކަށް ހަމަޖެހުން ގެނައުމަށެވެ. ކޮފީއަކީ މީހާ "ހޭލައްވާލާ" އެއްޗެކެވެ. މި ހާލަތުގައި ކޮފީގައި ހިމެނޭ ކެފެއިން އަދި ސިގަރެޓްގައި ހިމެނޭ ނިކޮޓިން އަކީ ވެސް "ސްޓިމިއުލަންޓް" އެވެ. އެހެންކަމުން ތަފާތު ދެ މަސައްކަތެއް ކުރާ  ދެ ސްޓިމިއުލަންޓް އެއްފަހަރާ ބޭނުންކުރުމަކީ އެއިން ވަރަށް ބޮޑެތި ގެއްލުން ލިބޭ ކަމެކެވެ.

ނާރުތަކަށް ހަމަހިމޭންކަން ގެނައުމަށް އެންމެ ގިނަ ބަޔަކު ބޭނުންކުރާ ކެފެއިން ހިމެނެނީ މެތެލްޒެންތީންގެ ކްލާސްގައެވެ. މިއީ ސައިކޯއެކްޓްިވް ޑްރަގެކެވެ. އެހެން ސައިކޯއެކްޓިވް ޑްރަގްތަކާއި ޚިލާފަށް މިއީ ގާނޫނީ ގޮތުން ހުއްދަ އެއްޗެކެވެ. ހަމަ އެގޮަތުން ސިގަރެޓްގައި ހިމެނޭ ނިކޮޓިން ހަށިގަނޑުގެ ތެރެއަށް ދިއުމުން، އުފާވެރިކަން ގެނެސްދޭ ހޯމޯން ކަމަށްވާ ޑޯޕުމިން އުފައްދަން ފަށައެވެ. ނަމަވެސް މިއީ އިންތިހާއަށް ދެވިހިފާ އެއްޗެކެވެ. ސިގަރެޓަކީ މަދުން ބުޔަސް ގިނައިން ބުޔަސް އެއިން ގެއްލުން ލިބޭ އެއްޗެކެވެ. ސިގިރެޓެއް ދަމާލުމުން އެއިން ބޭރުވާ 7000 އަށް ވުރެ ގިނަ ކެމިކަލްގެ ތެރޭގައި ކެންސަރު ޖައްސާ 69 ކެމިކަލް ހިމެނެއެވެ. މިއީ ހަމަ ބުނެލާ ވާހަކައެއް ނޫނެވެ. ދުނިޔޭގެ ސިއްޙަތު ޖަމްޢިއްޔާ އިން މި އަހަރުގެ ޖުލައި މަހު އާންމުކުރި ތަފާސް ހިސާބުތަކަށް ބަލާއިރު، ދުންފަތުގެ ސަބަބުން ޖެހޭ އެކިއެކި ބަލިތަކުގައި އަހަރަކު 8 މިލިއަނަށް ވުރެ ގިނަ މީހުން މަރުވެއެވެ.

މިއާ ޚިލާފަށް މެދު މިންވަރަކަށް ބޯނަމަ ކޮފީއަކީ، އެއިން އެތައް ފައިދާއެއް ލިބޭ އެއްޗެކެވެ. އެގޮތުން ކެފެއިންގެ ސަބަބުން އަލްޒައިމަރ، ޑެމެންޝިޔާ، ސްޓްރޯކް އަދި ކެންސަރު ޖެހުމުން ދުރުކޮށްދެއެވެ. ނަމަވެސް މާ ގިނައިން ކޮފީ ބޯނަމަ ޑިހައިޑްރޭޝަން އާއި ނުނިދުމުގެ މައްސަލައާ ކުރިމަތިލާން ޖެހެއެވެ.

ކޮފީ އާއި ސިގަރެޓްއެއްކޮށް ބޭނުންކުރުމުން އޭގެ އެންމެ ބޮޑު ގެއްލުމެއް ލިބެނީ ހިތަށެވެ. ކޮފީގެ ސަބަބުން ލޭގެ ހިނގުން އަވަސްކޮށްލާ އިރު، ސިގަރެޓްގެ ސަބަބުން ލޭގެ ހިނގުމަށް ބުރޫ އަރައެވެ. މިކަމުގެ ސަބަބުން ލޭ ހޮޅިތަކުގައި ސަރުބީ ޖަހާ އޭގައި ހުންނަ "ދެމުން" ކުޑަ ވެގެން ދެއެވެ. ލޭހޮޅިތަކުގައި ސަރުބީ ޖަހާ ލޭ ހިނގަން އޮންނަ މަގު ހަނި ވުމުގެ ހަރޓް އެޓޭކް ޖެހުމާއި ސްޓްރޯކް ޖެހުމުގެ ފުރުސަތު ވަރަށް ބޮޑުތަނުން އިތުރުވެގެން ދެއެވެ.

އެހެންކަމުން މިއީ މިކަމާ އަޅުގަނޑުމެން ފުންކޮށް ވިސްނާ އަޅުގަނޑުމެންގެ ވައްޓަފާޅިއަށް ބަދަލު ގެންނަންވީ ވަގުތެވެ. ކުއްލިއަކަށް ހުއްޓާނުލެވުނަސް މަދު ކުރަމުުން ގޮސް ސިގަރެޓް މުޅިން ދޫކޮށްލަން ވީއެވެ. ދުވާލެއްގެ މައްޗަށް 400 މިލިގްރާމަށްވުރެ ގިނަ ނުވާ ވަރަށް ކޮފީ ބުއިން އެންމެ ރަގަޅެވެ.