ވަގުތަށް ކަމޭހިތުމާއި ގަޑިއަށް ފަރުވާތެރިވުމަކީ ވަރަށް ތަފާތު ދެކަމެއް!

ވަގުތަކީ އަޅުގަނޑުމެންގެ ދިރިއުޅުމުގައި އޭގެ މުހިއްމުކަން ބޮޑު އެއްޗެކޭ ބުނެވިދާނެއެވެ. އެހެނީ ވަގުތަކީ އަޅުގަނޑުމެންނަށް ލިބޭ މުހުލަތެކެވެ. ގިނަ މީހުންނަށް ވަގުތާއި ގަޑިއަކީ އެކައްޗެއްގެ ގޮތުގައި ހީވެފައި އޮވެއެވެ. މިއީ ހަގީގަތުގައި ވަރަށް ބޮޑު އޮޅުމެކެވެ. ވަގުތަށް ކަމޭހިތުމާއި ގަޑިއަށް ފަރުވާތެރިވުމަކީ ވަރަށް ތަފާތު ދެކަމެކެވެ.

ވަގުތަކީ މުއްދަތެއް އެކުލެވިގެންވާ އެއްޗެކެވެ. އެއީ ވަކި ގަޑިއަކުން ފެށިގެން އަނެއް ގަޑިއަކާއި ހަމައަށް ދެމިގެންދާ މުއްދަތެކެވެ. މިސާލަކަށް، އަޅުގަނޑުމެން ދުވަހެއްގެ ވަގުތު ބަހާލަނީ މަސައްކަތުގެ ވަގުތު، އަރާމުކުރުމުގެ ވަގުތު، އާއިލާއާއެކު ހޭދަކުރާ ވަގުތު އަދި އަޅުކަން ކުރުމުގެ ވަގުތުގެ ގޮތުގައެވެ. މި ކޮންމެ ވަގުތަކީވެސް ވަކި މުއްދަތެއް އެކުލެވޭ ވަގުތުކޮޅެކެވެ.

އެހެންނަމަވެސް، ގަޑިއަކީ ވަކި ހާއްސަ މިނެޓަކާއި ސިކުންތެކެވެ. މިސާލަކަށް، ހެނދުނު 8:00 އަކީ ވަކި ހާއްސަ ގަޑިއެކެވެ. އެއީ އެ ދުވަހެއްގެ 8 ގަޑިއިރާއި 0 މިނެޓާއި 0 ސިކުންތު ހަމަވާ ގަޑިއެވެ. ގަޑިއަށް ފަރުވާތެރިވުމަކީ މި ވަކި ހާއްސަ ގަޑިއަށް ސަމާލުކަން ދިނުމެވެ. މި މިނެޓާއި މި ސިކުންތައް ފަރުވާތެރިވުމެވެ.

ވަގުތައް ކަމޭހިތުމަކީ ލިބޭ ވަގުތު އެންމެ ފައިދާހުރި ގޮތުގައި ބޭނުންކުރުމެވެ. މިސާލަކަށް، މަސައްކަތުގެ ވަގުތުގައި ފުރިހަމައަށް މަސައްކަތުގައި އުޅުމާއި، އާއިލާއާއެކު ހޭދަކުރާ ވަގުތުގައި އާއިލާއަށް ފުރިހަމަ ސަމާލުކަންދިނުމެވެ. ނަމަވެސް، ގަޑިއަށް ފަރުވާތެރިވުމަކީ ކަނޑައެޅިފައިވާ ވަކި ގަޑިއަކަށް ހާޒިރުވުން ނުވަތަ ވަކި ކަމެއް ފެށުމެވެ.

ވަގުތަށް ކަމޭހިތާ މީހަކަށް ގަޑިއަށް ފަރުވާތެރިނުވެވުމަކީވެސް އެކަށީގެންވާ ކަމެކެވެ. މިސާލަކަށް، މުހިންމު އަދި ކޮންމެހެން އެ ވަގުތެއްގައި ނިންމަންޖެހޭ މަސައްކަތެއްގައި އުޅެނިކޮށް، އެހެން ބައްދަލުވުމަކަށް ދިއުމުގެ ގަޑި ޖެހުމުން، އެ މަސައްކަތް ނުނިންމާ ދިއުމަކީ އެ ވަގުތަށް ކަމޭނުހިތުން ކަމުގައި ވެދާނެއެވެ. ނަމަވެސް، ގަޑިއަށް ފަރުވާތެރިވާ މީހަކު އެ ބައްދަލުވުމަށް ގަޑިއަށް ދާނެއެވެ. އަދިވެސް އެހެން މިސާލަކަށް ބަލާލާނަމެވެ. އެކަކީ ގަޑި ނުޖެހި، ބަރާބަރު ގަޑިއަށް އިނގިލި ޖެހުމަށްފަހު މަސައްކަތަށް ނުކުންނަ، ގަޑިއަށް ފަރުވާތެރި މުވައްޒަފެކެވެ. އަނެކަކީ ދޭތެރެ ދޭތެރެއިން ގަޑި ޖެހޭ މުވައްޒަފެކެވެ. އެއްކަލަ ގަޑި ނުޖެހި އަންނަ މުވައްޒަފަށް، މަސައްކަތު ވަގުތުގައި ހަވާލު ކުރެވޭ މަސައްކަތް، މަސައްކަތު ވަގުތުގައި ނިންމައެއް ނުލެވެއެވެ. ނަމަވެސް ގަޑި ޖެހިގެން އަންނަ މުވައްޒަފަށް، މަސައްކަތު ވަގުތުގައި ހަވާލުކުރާ މަސައްކަތްތައް ވަގުތުން ވަގުތަށް ނިންމައެވެ. މި ހާލަތުގައި ގަޑިއަށް ފަރުވާތެރިވި މީހާ ވަގުތަށް ކަމޭހިތާފައެއް ނެތެވެ. ނަމަވެސް ގަޑިއަށް ފަރުވާތެރި ނުވެވުނު މީހާ، ވަގުތަށް ކަމޭހިތާފައިވާކަން އެބަ އެނގެއެވެ.

ވަގުތަށް ކަމޭހިތުމާއި ގަޑިއަށް ފަރުވާތެރިވުމަކީ ތަފާތު ދެ ކަމެކެވެ. ވަގުތަށް ކަމޭހިތުމަކީ ލިބޭ ވަގުތު އެންމެ ފައިދާހުރި ގޮތުގައި ބޭނުންކުރުމެވެ. އަދި ގަޑިއަށް ފަރުވާތެރިވުމަކީ ކަނޑައެޅިފައިވާ ވަކި ގަޑިއަކަށް ހާޒިރުވުމެވެ. ނުވަތަ ކަމެއް ފެށުމެވެ. މި ދެކަމަކީ އާއްމުކޮށް ވާހަކަ ދައްކާއިރު އެއް ކަމެއްގެ ގޮތުގައި ސިފަ ކުރެވުނަސް ތަފާތު ދެ ކަމެކެވެ. ގަޑިއަށް ފަރުވާތެރިވުމާއި ވަގުތައް ކަމޭހިތުމުގެ ތެރެއިން، އުފެއްދުންތެރި ސިފަ އަކީ ވަގުތަށް ކަމޭހިތުމެވެ.