މާހެފުމަކީ ރޯދައަށް ކުރިމަތިކޮށް އެމަސް ފެށުމުގެ ކުރިން އެމަހުގެ ފުރަތަމަ ދުވަހާއި ގާތް ދުވަހެއްގައި ޖަމާއަތް ހަދައިގެން މާހެފުމުގެ ނަމުގައި ކާ ކެއުމެކެވެ.

އިހުޒަމާނުގައި މާހެފުން ބާއްވަނީ ރޯދައަށް ހަނދުބަލާރޭ ކަމުގައިވާ ޝައުބާން މަހުގެ 29 ވަނަ ދުވަހު އެވެ. އެރޭ އެފެންނަ ހަނދަށް ކިޔައި އުޅުނީ “ހުޅެވިހަނދު” އެވެ. 

ރަމަޟާން މަހަކީ އަމިއްލަ ނަފްސު ޠޯހިރުކުރުމާއި އޯގާތެރިވުމުގެ މަހެކެވެ. މުސްލިމުންނަށް އަންނަ މާތް އަޅުކަމުގެ އުފާވެރި މަހެ ކެވެ. ޒަމާނުއްސުރެ ދިވެހީން މިމާތް މައްސަރަށް މަރުޙަބާ ކިޔަނީ މާހެފުން ބާއްވައިގެން އާއިލާ އަދި އެކުވެރިންނާއި އެކު އެއްތަންވެ އުފަލާއިއެކުއެވެ. އަޅުގަނޑުމެން ގަބޫލުކުރާ ގޮތުގައި ކާނާގެ ރަހަ ހަގީގަތުގައި ވެސް ރަނގަޅުވާނީ ލޯބިވާ މީހުންނާ ހިއްސާ ކޮށްގެނެވެ. 

ރޯދަމަސް ފެށެން ކައިރި ވުމާއެކު ރާއްޖޭގެ ކެފޭ ރެސްޓޯރެންޓް ތަކުންވެސް މާހެފުމުގެ ތަފާތު ޕެކޭޖްތައް ތައާރަފް ކުރެއެވެ. އަދި ބައެެއް ގޭގޭގައި އެންމެން ބަހާލައިގެން ވެސް ކާނާ ތައްޔާރު ކުރެއެވެ..

ސަގާފީ މާހެފުމުގައި ކާނާ ބިނާވެފައިވަނީ އިހުޒަމާނުގައި އެންމެ ފަސޭހައިން ލިބެމުން ދިޔަ ބާވަތްތަކުގެ މައްޗަށެވެ. މި ކެއުންތަކުގައި މައިގަނޑު ގޮތެއްގައި ހިމެނެނީ ކާށި، ވަޅޯ މަހާއި، އަލަ ކައްޓަލަ، ކަށިކެޔޮ ފަދަ ތަފާތު ބާވަތް ތަކުންނެވެ. ކުޅިރޮށި ފޮނިފާރޮށި ބޮނޑިބަތް މާޖެއްސި ހަނޑޫ އަދި މާފުށަކީ ވެސް މާހެފުންތަކުގައި ތައްޔާރުކުރާ ބާވަތްތަކެވެ. 

މިޒަމާނުގައި ކާނާގެ ބާވަތްތައް އިތުރުވެ ޒަމާނާ ގުޅޭ ބައެއް ތަކެތި ވެސް މާހެފުންތަކުގައި ބޭނުންކުރެއެވެ. އޭގެތެރޭގައި ޕިއްޒާ ,ކޭކް,ސަބްމެރިން އަދި ހެދިކާ ވެސް ހިމެނެއެވެ. މާހެފުންތައް ބާއްވަންޖެހޭނީ ކާބޯތަކެތި އިސްރާފުނުވާ ގޮތަށެވެ.

ކޮންމެ ގޮތަކަށް މާހެފުން ބޭއްވިނަމަވެސް މީގައި ކެއުމަށް ވުރެން މުހިއްމީ އާއިލާ އަދި އެކުވެރިނަށް ގުޅުން ބަދަހިވުމެވެ. އެއްބަޔަކު އަނެއްބަޔަކު ބައްދަލުވެ ހީސަމާސާކޮށް އުފާކޮށްލުމެވެ. އޭރުން ރޯދައަށް ސިކުނޑި ތާޒާ ކޮށްދެއެވެ.