ކާފައެއްގެ މުދާ ފޮށިތެރެއިން ފެނުނު ބޮމެއް ގޮވައިގެން އިންޑިއާނާގެ މީހަކު މަރުވެއްޖެ އެވެ.

ލޭކް ކައުންޓީ ޝެރިފްސް ޑިޕާޓްމަންޓުން ކުރި ޕޯސްޓެއްގައި ބުނެފައި ވަނީ މިހާދިސާ ހިނގީ ލޭކްސް އޮފް ދަ ފޯ ސީޒަންސްގެ ކޮމިއުނިޓީގަ އެވެ.

މިހާދިސާ ހިނގަން މެދުވެރިވީ އެ އާއިލާއިން ކާފަގެ ސާމާނު ބަލަމުން ދަނިކޮށް އޭގެތެރެއިން އަތުބޮމެއް ފެނުމުންނެވެ.

"އެ ޑިވައިސްގައި ހުރި ޕިން މީހަކު ދަމައިގަނެގެން ގޮއްވާލި ކަމަށް ރިޕޯޓްތައް ބުނާ،" ޝެރިފް އޮސްކާ މާޓިނޭޒް ޖޫނިއާ ނެރުނު ބަޔާނެއްގައި ބުނެފައިވެއެވެ. ހާދިސާ ހިނގަން މެދުވެރިވީ އެބޮން ފެނުނު މީހާ އޭގެ ޕިން ނައްޓާލުމާއި އެކު ބޮން ގޮވުމުންނެވެ. އެމީހާ ވަނީ ބޮންގޮވި ވަގުތު މަރުވެފައެވެ.

އެމީހާގެ ދެ ކުދިން ކަމަށްވާ 14 އަހަރުގެ ފިރިހެން ކުއްޖަކާއި 18 އަހަރުގެ އަންހެނަކު ވަނީ މިހާދިސާގާއި ޒަހަމްވެ ފަރުވާދީފައެވެ. މިހާދިސާގެ ތަހުގީގު މިހާރު ދަނީ ކުރިއަށެވެ.

އެފްބީއައި އިން ބުނާ ގޮތުގައި ބައެއް އާއިލާތަކުން ހީވެސް ނުކުރާ ގޮތަކަށް ގޮވާތަކެތި ފެނިފައި ވަނީ އެމީހުންގެ މައިންބަފައިން ނުވަތަ އަސްކަރީ ވެޓެރަންސްގެ ކާފަ އާއި މާމަގެ މުދާތެރެއިންނެވެ. ބައެއް ވެޓެރަންސް ފުރަތަމަ އަދި ދެވަނަ ބޮޑު ހަނގުރާމައާއި ކޮރެއާ ހަނގުރާމައާއި ވިއެޓްނާމް ހަނގުރާމަ އާއި ގަލްފް ހަނގުރާމައިގެ ހަނދާނީ އެއްޗެއްގެ ގޮތުގައި ގޮވާތަކެތި ރައްކާކޮށްފައި ހުންނަ ކަމަށް ބުނެވެއެވެ.

ކަމާބެހޭ ފަރާތްތަކުން ބުނާ ގޮތުގައި ބޮމެއް ނުވަތަ އެނޫންވެސް ގޮވާ އެއްޗެއް ފެނިއްޖެ ނަމަ އެ ޑިވައިސްއާ ދުރަށް ގޮސް ވަގުތުން 911 އަށް ގުޅަން ޖެހެ އެވެ.